মধ্যপ্ৰদেশৰ খাৰগোন জিলাত নৰ্মদা নদীৰ পাৰত ৰহস্যজনকভাৱে একেলগে প্ৰায় ২০০টা ভাটৌ মৃত্যুৰ ঘটনাই তীব্ৰ চাঞ্চল্যৰ সৃষ্টি কৰিছে। প্ৰশাসনৰ তৰফৰ পৰা জনোৱা হৈছে যে প্ৰাথমিকভাৱে খাদ্যত বিষক্ৰিয়া হোৱাৰ বাবেই এই বৃহৎ সংখ্যক চৰাইৰ মৃত্যু হৈছে।
যোৱা চাৰি দিন ধৰি বদৱাহ অঞ্চলৰ নৰ্মদা নদীৰ ওপৰত থকা এটা একুৱাডাক্ট দলঙৰ ওচৰত ইটোৰ পিছত সিটো মৃতদেহ উদ্ধাৰ কৰা হৈছে। এই ঘটনাক কেন্দ্ৰ কৰি আৰম্ভণিতে অঞ্চলটোত বাৰ্ড ফ্লুৰ আতংক বিয়পি পৰিছিল যদিও মৰণোত্তৰ পৰীক্ষাৰ প্ৰতিবেদনে সেই সম্ভাৱনা সম্পূৰ্ণৰূপে নুই কৰিছে।
জিলা বন্যপ্ৰাণী ৱাৰ্ডেন টনি শৰ্মাই জানিবলৈ দিছে যে উদ্ধাৰৰ সময়ত কেইটামান চৰাই জীৱিত আছিল যদিও বিষক্ৰিয়া ইমানেই তীব্ৰ আছিল যে চিকিৎসাৰ সুযোগ পোৱাৰ আগতেই সেইবোৰৰ মৃত্যু ঘটে।
বৰ্তমান পৰিস্থিতি নিয়ন্ত্ৰণ কৰিবলৈ উক্ত এলেকাত চৰাইক খাদ্য খুওৱা সম্পূৰ্ণৰূপে নিষিদ্ধ কৰা হৈছে। বন বিভাগৰ এটা বিশেষ দলে সেই স্থানত ২৪ ঘণ্টা নজৰদাৰী চলাই আছে যাতে কোনো লোকে চৰাইক বাহিৰা খাদ্য দিব নোৱাৰে। মৃত চৰাইবোৰৰ ভিচেৰা নমুনা অধিক উন্নত পৰীক্ষাৰ বাবে জব্বলপুৰলৈ প্ৰেৰণ কৰা হৈছে।
পশু চিকিৎসা বিভাগৰ বিষয়া মণীষা চৌহানে জনোৱা মতে ভাটৌবোৰৰ দেহত বিষক্ৰিয়াৰ স্পষ্ট লক্ষণ পোৱা গৈছে। পশু চিকিৎসা সম্প্ৰসাৰণ বিষয়া সুৰেশ বাঘেলে উল্লেখ কৰিছে যে মৃত চৰাইবোৰৰ পাকস্থলীত চাউল আৰু সৰু পাথৰৰ টুকুৰা পোৱা গৈছে।
তেওঁৰ মতে মানুহে বহু সময়ত নজনাৰ বাবে চৰাইক এনে কিছুমান খাদ্য খাবলৈ দিয়ে যিবোৰ চৰাইৰ বাবে অত্যন্ত ক্ষতিকৰ। ইয়াৰ উপৰি কীটনাশক ছটিওৱা পথাৰৰ পৰা সংগ্ৰহ কৰা আহাৰ বা নৰ্মদাৰ দূষিত পানী খোৱাৰ বাবেও এনে হ’ব পাৰে বুলি সন্দেহ কৰা হৈছে।
আনহাতে একেটা সময়তে মধ্যপ্ৰদেশৰ ইন্দোৰৰ ভগীৰথপুৰাত দূষিত পানী খাই ১৪ জন লোকৰ মৃত্যু হোৱা ঘটনাই পৰিস্থিতি অধিক চিন্তনীয় কৰি তুলিছে। গৱেষণাগাৰৰ প্ৰতিবেদন অনুসৰি পানীৰ পাইপলাইন ফাটি যোৱাৰ ফলত পানী বিষাক্ত হৈ পৰিছিল আৰু সেই পানী খোৱাৰ ফলতেই এই শোকাৱহ ঘটনাটো সংঘটিত হৈছে।
