প্ৰাক্তন কেন্দ্ৰীয় মন্ত্ৰী তথা জ্যেষ্ঠ কংগ্ৰেছ নেতা সুৰেশ কালমাডীৰ পৰলোকপ্ৰাপ্তি ঘটিছে। জানিব পৰা মতে, প্ৰাক্তন কংগ্ৰেছ নেতাগৰাকী পুনেৰ দীননাথ মংগেশকাৰ চিকিৎসালয়ত চিকিৎসাধীন হৈ আছিল। মঙলবাৰে তাতেই তেওঁৰ মৃত্যু হয়। মৃত্যুৰ সময়ত তেওঁৰ বয়স আছিল ৮১ বছৰ।
উল্লেখযোগ্য যে ২০১০ চনত দিল্লীত অনুষ্ঠিত হোৱা কমনৱেলথ গেমছত প্ৰয়াত নেতাগৰাকীৰ বিৰুদ্ধে ব্যাপক দুৰ্নীতিৰ অভিযোগ উত্থাপন হৈছিল। তাৰ বাবে কালমাডীক গ্ৰেপ্তাৰো কৰা হৈছিল।
জানিব পৰা মতে, কিছুদিন ধৰি অসুস্থ হৈ আছিল কালমাডী। চিকিৎসালয়ত চিকিৎসাধীন হৈ থকা অৱস্থাতে তেওঁ শেষ নিশ্বাস ত্যাগ কৰে। মঙলবাৰে বিয়লি পুনেৰ বৈকুণ্ঠ শ্মশানত কালমাডীৰ অন্তিম অনুষ্ঠান সম্পন্ন কৰা হ’ব।
প্ৰয়াত কলমাডীৰ পৰিয়ালত তেওঁৰ পত্নী, জোঁৱাই, বোৱাৰী, নাতি-নাতিনী আছে। শেষকৃত্যৰ পূৰ্বে প্ৰয়াত নেতাগৰাকীৰ মৃতদেহ কালমাডী হাউচত শ্ৰদ্ধাঞ্জলি জনোৱাৰ বাবে ৰখা হ’ব। লক্ষণীয় যে কংগ্ৰেছ নেতা হিচাপে পুনেত কালমাডী অতি জনপ্ৰিয় আছিল।
যদিও তেওঁ ৰে’ল বিভাগৰ ৰাজ্যিক মন্ত্ৰী আছিল, তথাপিও ভাৰতীয় ক্ৰীড়া জগতত কালমাডী সুপৰিচিত আছিল। তেওঁ ভাৰতীয় অলিম্পিক সন্থাৰ সভাপতি আছিল। তাৰ পৰাই কলমাডীৰ নাম কমনৱেলথ গেমছৰ দুৰ্নীতিৰ লগত জড়িত হৈ পৰে। কংগ্ৰেছে কালমাডীক দলৰ পৰা বহিষ্কাৰ কৰিছিল।
পৰৱৰ্তী সময়ত ২০১৬ চনত কালমাডী অলিম্পিক সন্থাৰ আজীৱন সভাপতি নিৰ্বাচিত হয়। কিন্তু ক্ৰীড়া মন্ত্ৰীয়ে সেই নিৰ্বাচনৰ তদন্তৰ নিৰ্দেশ দিয়ে। তাৰ বাবেই কালমাডীয়ে কাৰ্যভাৰ গ্ৰহণ কৰা নাছিল।
কিন্তু মৃত্যুৰ পূৰ্বে কমনৱেলথ গেমছৰ দুৰ্নীতিৰ পৰা ক্লিন চিট লাভ কৰিছিল কালমাডীয়ে। যোৱা এপ্ৰিল মাহত ইডিয়ে কমনৱেলথ গেমছ কেলেংকাৰিৰ ‘ক্লজাৰ ৰিপ’ৰ্ট’ দিল্লীৰ আদালতত দাখিল কৰিছিল।
প্ৰতিবেদনত স্পষ্টকৈ উল্লেখ আছে যে দীৰ্ঘদিনীয়া তদন্তৰ পিছতো কমনৱেলথ গোচৰত আৰ্থিক দুৰ্নীতিৰ কোনো প্ৰমাণ পোৱা নগ’ল। ইডিৰ ক্লজাৰ ৰিপ’ৰ্ট মানি লয় আদালতে। ইতিমধ্যে ২০১৪ চনতে এই গোচৰত চিবিআইয়ে ক্লজাৰ ৰিপ’ৰ্ট দিছিল। কমনৱেলথ গেমছত চিবিআইয়েও কোনো দুৰ্নীতি পোৱা নাছিল।
