দিল্লীৰ জৱাহৰলাল নেহৰু বিশ্ববিদ্যালয় চমুকৈ জেএনইউত প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহৰ বিৰুদ্ধে আপত্তিজনক শ্লোগান দিয়া কাৰ্যক লৈ তীব্ৰ উত্তেজনাৰ সৃষ্টি হৈছে। এই ঘটনাক কেন্দ্ৰ কৰি এতিয়া অভিযুক্ত ছাত্ৰ-ছাত্ৰীসকলৰ বিৰুদ্ধে কঠোৰ ব্যৱস্থা গ্ৰহণৰ বাবে সাজু হৈছে বিশ্ববিদ্যালয় কৰ্তৃপক্ষ। এই সন্দৰ্ভত জেএনইউৰ মুখ্য নিৰাপত্তা বিষয়াই ইতিমধ্যে দিল্লীৰ বসন্ত কুঞ্জ আৰক্ষী থানালৈ এখন পত্ৰ প্ৰেৰণ কৰিছে। পত্ৰখনৰ জৰিয়তে কেম্পাছৰ ভিতৰত উচটনিমূলক শ্লোগান দিয়া ছাত্ৰ-ছাত্ৰীসকলৰ বিৰুদ্ধে এফআইআৰ ৰুজু কৰিবলৈ আৰক্ষীক আনুষ্ঠানিকভাৱে অনুৰোধ জনোৱা হৈছে।
বিশ্ববিদ্যালয় কৰ্তৃপক্ষৰ মতে দেশৰ শীৰ্ষ পৰ্যায়ৰ ৰাজনৈতিক নেতাৰ বিৰুদ্ধে এনেধৰণৰ শ্লোগান দিয়াটো গণতান্ত্ৰিক মৰ্যাদাৰ পৰিপন্থী। ইয়াৰ উপৰি এনে আচৰণে বিশ্ববিদ্যালয়ৰ নিৰ্ধাৰিত আচৰণ বিধি উলংঘা কৰিছে বুলিও পত্ৰখনত উল্লেখ কৰা হৈছে। কৰ্তৃপক্ষই স্পষ্ট কৰি দিছে যে এই শ্লোগানসমূহ কোনো স্বতঃস্ফূৰ্ত আৱেগৰ ফল নাছিল, বৰঞ্চ সচেতনভাৱেহে এনে কৰা হৈছিল। শিক্ষানুষ্ঠানৰ অনুশাসন আৰু শান্তি-সম্প্ৰীতি বজাই ৰখাৰ স্বাৰ্থত এই পদক্ষেপ গ্ৰহণ কৰা হৈছে আৰু অভিযুক্ত ছাত্ৰ-ছাত্ৰীসকলৰ নামো ইতিমধ্যে আৰক্ষীক যোগান ধৰা হৈছে।
এই সমগ্ৰ ঘটনাৰ সূত্ৰপাত হৈছিল ২০২০ চনৰ দিল্লী দাঙ্গাৰ অভিযুক্ত উমৰ খালিদ আৰু শ্বাৰ্জিল ইমামৰ জামিন আবেদন উচ্চতম ন্যায়ালয়ে নাকচ কৰাৰ পাছত। আদালতে মন্তব্য কৰিছিল যে দাঙ্গাৰ ষড়যন্ত্ৰত তেওঁলোকৰ গুৰুত্বপূৰ্ণ ভূমিকা আছিল। ইয়াৰ পিছতে জেএনইউৰ একাংশ ছাত্ৰ-ছাত্ৰীয়ে সোমবাৰে সন্ধিয়া প্ৰতিবাদ সাব্যস্ত কৰে আৰু প্ৰধানমন্ত্ৰী তথা গৃহমন্ত্ৰীৰ বিৰুদ্ধে তীব্ৰ শ্লোগান দিয়ে। এই ঘটনাক কেন্দ্ৰ কৰি বিজেপি দলো ক্ষুব্ধ হৈ পৰিছে। কেন্দ্ৰীয় মন্ত্ৰী গিৰিৰাজ সিঙে এই কাৰ্যক তীব্ৰ গৰিহণা দি জেএনইউক একাংশ জাতীয় বিৰোধী মানসিকতাৰ লোকৰ আশ্ৰয়স্থল বুলি সমালোচনা কৰিছে।
