আমেৰিকা-ৰাছিয়াৰ ভূ-ৰাজনৈতিক অৰিয়াঅৰিৰ বাবে বিপদত পৰিছে তিনিগৰাকী ভাৰতীয় নাৱিক। বুধবাৰে অশান্ত উত্তৰ আটলাণ্টিক মহাসাগৰত আমেৰিকান সেনাই ৰাছিয়াৰ পতাকা থকা তেল টেংকাৰ ‘মেৰিনেৰা’ জব্দ কৰে।
আমেৰিকাৰ নিষেধাজ্ঞা উলংঘা কৰি ভেনিজুৱেলাৰ পৰা তেল পৰিবহণ কৰাৰ অভিযোগত আমেৰিকাই জাহাজখনক আটক কৰি ৰাখিছে। ৰাছিয়াৰ চৰকাৰী সংবাদ মাধ্যম ‘আৰ টি’ৰ মতে জাহাজখনৰ ক্ৰু মেম্বাৰৰ ভিতৰত আছিল তিনিজন ভাৰতীয় নাগৰিক।
‘আৰ টি’ৰ বাতৰি অনুসৰি ‘মেৰিনেৰা’ত মুঠ ২৮ জন ক্ৰু আছিল। গৰিষ্ঠসংখ্যক ১৭ জন আছিল ইউক্ৰেইনৰ নাগৰিক। ইয়াৰ উপৰিও ছয়জন জৰ্জিয়ান, তিনিজন ভাৰতীয় আৰু দুজন ৰাছিয়ান। ৰাছিয়াৰ চৰকাৰী সংবাদ মাধ্যমেও প্ৰকাশ কৰিছে যে প্ৰথমে টেংকাৰখন কেৰিবিয়ান দেশ গায়ানাৰ পতাকাবাহী আছিল। ইয়াক ভাড়া কৰিছিল এজন ব্যক্তিগত ব্যৱসায়ীয়ে।
বৰ্তমান আমেৰিকাৰ জিম্মাত আছে জাহাজখন। কিন্তু জব্দ কৰাৰ পিছত আমেৰিকালৈ লৈ যোৱা হৈছে নে আন ঠাইলৈ লৈ যোৱা হৈছে সেয়া এতিয়াও স্পষ্ট হোৱা নাই। পেন্টাগনে অভিযোগ কৰিছে যে ভেনিজুৱেলাৰ তেল যোগানৰ ওপৰত আমেৰিকাৰ কঠোৰ নিষেধাজ্ঞা অমান্য কৰি জাহাজখনে ‘ছাঁয়া বহৰ’ৰ অংশ হিচাপে কাম কৰিছিল। আমেৰিকাৰ যুদ্ধজাহাজ আৰু হেলিকপ্টাৰৰ পৰা কমাণ্ডো অৱতৰণ কৰি ৱাশ্বিংটনে জাহাজখনৰ নিয়ন্ত্ৰণ লয়।
এতিয়া আটাইতকৈ ডাঙৰ প্ৰশ্নটো হ’ল জাহাজত থকা তিনিজন ভাৰতীয় নাৱিকৰ কি হ’ব? হোৱাইট হাউছৰ প্ৰেছ সচিব কেৰ’লিন লেভিটে স্পষ্ট কৰি দিছে যে জাহাজখনৰ নাৱিকসকলক তৎক্ষণাত মুকলি কৰি দিয়া নহ’ব। আমেৰিকাৰ আদালতত বিচাৰৰ বাবে তেওঁলোকক আমেৰিকালৈ লৈ যোৱা হ’ব পাৰে।
এই পৰ্যন্ত এই সন্দৰ্ভত ভাৰত চৰকাৰৰ কোনো আনুষ্ঠানিক সঁহাৰি বা বিবৃতি পোৱা নাই। অৱশ্যে চাউথ ব্লকে পৰিস্থিতি নিৰীক্ষণ কৰি আছে বুলি অনুমান কৰা হৈছে। ভাৰতীয় দূতাবাসে আমেৰিকা আৰু ৰাছিয়াৰ সৈতে যোগাযোগ কৰি ভাৰতীয় নাৱিকসকলক আইনী সহায় আগবঢ়াব পাৰে বুলিও অনুমান কৰা হৈছে।
