বাংলাদেশৰ ক্ষমতাচ্যুত প্ৰাক্তন প্ৰধানমন্ত্ৰী শ্বেখ হাছিনাই এইবাৰ এক চাঞ্চল্যকৰ অডিঅ’ বাৰ্তাযোগে ড° মহম্মদ ইউনুছৰ চৰকাৰক তীব্ৰ প্ৰত্যাহ্বান জনাইছে। বৰ্তমানৰ অন্তৱৰ্তীকালীন প্ৰশাসনক ‘ফেচিষ্ট’ আখ্যা দি হাছিনাই দেশৰ অস্তিত্ব ৰক্ষাৰ বাবে দেশবাসীক ‘দ্বিতীয় স্বাধীনতা’ৰ যুঁজত অৱতীৰ্ণ হ’বলৈ জনোৱা আহ্বানে চুবুৰীয়া দেশখনৰ ৰাজনীতিত পুনৰ জোকাৰণি সৃষ্টি কৰিছে।
এই আহ্বানৰ ২৪ ঘণ্টা পূৰ্বে হাছিনাৰ পুত্ৰ সজীব ৱাজেদ জয়ে আন্তঃৰাষ্ট্ৰীয় সংবাদ মাধ্যমত জনাইছিল যে তেওঁৰ মাতৃয়ে আচলতে ৰাজনীতিৰ পৰা অৱসৰ ল’ব বিচাৰিছিল। কিন্তু তাৰ মাজতে পোহৰলৈ অহা হাছিনাৰ এই নতুন বাৰ্তাই আৱামী লীগৰ ভৱিষ্যতক লৈ এক নতুন চৰ্চাৰ সূচনা কৰিছে।
হাছিনাই অডিঅ’ বাৰ্তাত অভিযোগ কৰিছে যে ২০২৪ চনৰ ৫ আগষ্টৰ গণ-অভ্যুত্থান কোনো স্বতঃস্ফূৰ্ত আন্দোলন নাছিল, বৰঞ্চ এয়া আছিল এক সুপৰিকল্পিত ষড়যন্ত্ৰ। তেওঁ কয়, “ফেচিষ্ট আৰু উগ্ৰপন্থী শক্তিয়ে মোক বলপূৰ্বকভাৱে ক্ষমতাৰ পৰা আঁতৰাবলৈ এক সূক্ষ্ম ষড়যন্ত্ৰ ৰচনা কৰিছিল। মোক জনসাধাৰণে নিৰ্বাচিত কৰিছিল, কিন্তু আজি দেশখন সন্ত্ৰাসবাদৰ কবলত পৰিছে।”
প্ৰাক্তন প্ৰধানমন্ত্ৰীগৰাকীয়ে ড°মহম্মদ ইউনুছক উদ্দেশ্যি কয়, “ইউনুছক মই স্পষ্টকৈ কৈছোঁ, নিজৰ দেশৰ মানুহক আওকাণ কৰা বন্ধ কৰক।” তেওঁৰ মতে, বৰ্তমানৰ চৰকাৰখনে বাংলাদেশক এখন বিশাল কাৰাগাৰত পৰিণত কৰিছে আৰু আইন-শৃংখলা সম্পূৰ্ণৰূপে ধ্বংস হৈছে। নাৰী নিৰ্যাতন আৰু ন্যায়িক ব্যৱস্থাৰ পতনৰ কথা উল্লেখ কৰি তেওঁ ইয়াক এক ‘অন্ধকাৰ যুগ’ বুলি অভিহিত কৰে।
কেৱল আভ্যন্তৰীণ শক্তিয়ে নহয়, বাংলাদেশৰ সম্পদ লুণ্ঠনৰ বাবে বিদেশী শক্তি সক্ৰিয় হৈ উঠা বুলিও হাছিনাই গুৰুতৰ অভিযোগ উত্থাপন কৰে। তেওঁ লগতে কয় যে, “অনিৰ্বাচিত চৰকাৰৰ সুযোগ লৈ বিদেশী শক্তিয়ে বাংলাদেশৰ মাটি আৰু সম্পদ লুটপাত কৰিছে।” এই পৰিস্থিতিৰ পৰা দেশখনক উদ্ধাৰ কৰিবলৈ তেওঁ দেশবাসীক পুনৰবাৰ ‘মুক্তিযুদ্ধ’ৰ শপত লৈ ৰাজপথলৈ ওলাই আহিবলৈ আহ্বান জনায়।
উল্লেখ্য যে, ২০২৪ চনৰ জুলাই মাহত আৰম্ভ হোৱা কোটা সংস্কাৰ আন্দোলনে এক চৰম পৰ্যায় লাভ কৰিছিল, যাৰ পৰিণতিত ৫ আগষ্টত হাছিনা চৰকাৰৰ পতন ঘটে আৰু তেওঁ দেশ এৰি পলায়ন কৰিবলৈ বাধ্য হয়। এতিয়া এই নতুন অডিঅ’ বাৰ্তাই চুবুৰীয়া দেশখনৰ ৰাজনীতিত কেনে প্ৰভাৱ পেলায়, সেয়া হ’ব লক্ষ্যণীয়।
