ৰে’লৱেত গ্ৰুপ ‘ডি’ পদৰ বাবে অনলাইন আবেদন প্ৰক্ৰিয়া আৰম্ভ হৈছে। ৰে’লৱে নিযুক্তি ব’ৰ্ডে ২১,৯৯৭টা খালী পদত নিযুক্তিৰ বাবে এক অধিসূচনা জাৰি কৰিছে। আজিৰে পৰা আৰম্ভ হৈছে আৱেদন প্ৰক্ৰিয়া।
অহা ২ মাৰ্চলৈকে অনলাইনযোগে কৰিব পাৰিব আবেদন। দাখিল কৰা আবেদনৰ মাচুল পৰিশোধৰ অন্তিম তাৰিখ ৪ মাৰ্চ। আবেদন প্ৰপত্ৰত শুধৰণিৰ উইণ্ডো ৫ মাৰ্চৰ পৰা ১৪ মাৰ্চলৈ খোলা থাকিব। প্ৰাৰ্থীসকলে www.rrbapply.gov.in ত গৈ আবেদন কৰিব পাৰিব।
আৰ আৰ বিয়ে জনাইছে যে প্ৰাৰ্থীয়ে মাত্ৰ এটা ৰে’লৱে জ’নৰ বাবেহে আবেদন কৰিব পাৰিব। যদি আপুনি এটাতকৈ অধিক ৰে’লৱে জ’নৰ বাবে আবেদন কৰে তেন্তে প্ৰ-পত্ৰ নাকচ কৰা হ’ব। যেনে কোনোবাই যদি আৰ আৰ বি কলকাতাত আৱেদন কৰে, তেন্তে তেওঁ আৰ আৰ বি গুৱাহাটীত আবেদন কৰিব নোৱাৰিব। তেনে ক্ষেত্ৰত তেওঁৰ দ্বিতীয়খন আবেদন নাকচ কৰা হ’ব। সেইদৰে, একেটা আৰ আৰ বিতে এটাতকৈ অধিক পদৰ বাবে আবেদন কৰিলে পৃথকে পৃথকে আবেদন কৰিব নালাগে। অন্যথা প্ৰ-পত্ৰ বাতিল কৰা হ’ব।
ৰে’লৱেৰ গ্ৰুপ ‘ডি’ নিযুক্তিৰ বয়সৰ সীমা কিমান?
প্ৰাৰ্থীৰ বয়স ১৮ৰ পৰা ৩৩ বছৰৰ ভিতৰত হ’ব লাগিব। বিধি অনুসৰি অন্যান্য পিছপৰা শ্ৰেণীৰ (OBC) অন্তৰ্গত প্ৰাৰ্থীৰ বয়সৰ সীমাত তিনি বছৰৰ ৰেহাই থাকিব। অনুসূচিত জাতি আৰু অনুসূচিত জনজাতিৰ প্ৰাৰ্থীক বয়সৰ সীমাত পাঁচ বছৰৰ ৰেহাই প্ৰদান কৰা হ’ব। ২০২৬ চনৰ ১ জানুৱাৰীৰ হিচাপত বয়সৰ সীমা নিৰ্ধাৰণ কৰা হ’ব বুলি আৰ আৰ বিয়ে জনাইছে।
ৰে’লৱে গ্ৰুপ ‘ডি’ৰ বাছনি কেনেদৰে কৰা হ’ব?
একক পৰ্যায়ৰ কম্পিউটাৰ ভিত্তিক পৰীক্ষা (চিবিটি) আৰু শাৰীৰিক দক্ষতা পৰীক্ষা (পিইটি)ৰ ভিত্তিত প্ৰাৰ্থী নিৰ্বাচন কৰা হ’ব। চিবিটিত সফল হোৱা প্ৰাৰ্থীক পিইটিৰ বাবে মাতিব। চিবিটি মাত্ৰ এটা পৰ্যায়ত হ’ব। তাৰ পিছত ডকুমেণ্ট ভেৰিফিকেচন আৰু মেডিকেল হ’ব।
ৰেলৱে গ্ৰুপ ‘ডি’ৰ বাবে চিবিটিৰ আৰ্হি কি?
লিখিত পৰীক্ষাৰ আৰ্হি যোৱাবাৰৰ দৰেই ৰখা হৈছে। কোনো পৰিৱৰ্তন কৰা হোৱা নাই। চিবিটি ৯০ মিনিটৰ হ’ব। মুঠ ১০০ টা প্ৰশ্ন থাকিব। সাধাৰণ বিজ্ঞান আৰু গণিতৰ পৰা ২৫-২৫ টা প্ৰশ্ন থাকিব। সাধাৰণ বুদ্ধি আৰু ৰিজনিঙৰ ৩০টা আৰু কাৰেণ্ট এফেয়াৰ্ছৰ ২০টা প্ৰশ্ন থাকিব। নিগেটিভ মাৰ্কিং: আৰ আৰ বি গ্ৰুপ ‘ডি’ চি বি টিত প্ৰতিটো ভুল উত্তৰৰ বাবে এক তৃতীয়াংশ নম্বৰ কৰ্তন কৰা হ’ব।
