মেঘালয়ৰ পিছত এইবাৰ ৰাজস্থান। আকৌ এবাৰ বিয়াৰ পিছত প্ৰেমিকৰ লগ লাগি স্বামীক হত্যা কৰাৰ ঘটনা পোহৰলৈ আহিছে। পত্নীগৰাকীয়ে বিয়াৰ মাত্ৰ তিনিমাহৰ ভিতৰতে প্ৰাক্তন প্ৰেমিক আৰু বন্ধুসকলৰ সৈতে মিলি স্বামীক হত্যা কৰি পৰিকল্পনা ৰচনা কৰাৰ অভিযোগ উত্থাপন হৈছে। সংবাদ মাধ্যমৰ বাতৰি অনুসৰি ৰাজস্থানৰ এই ঘটনাৰ লগত মেঘালয়ৰ হানিমুন মাৰ্ডাৰৰ বহু সাদৃশ্য আছে।
তাৰিখটো আছিল ৩০ জানুৱাৰী। ৰাতি তেতিয়া ৯ টা বাজিছিল। ৰাজস্থানৰ শ্ৰীগংগানগৰ জিলাৰ এখন থানালৈ ফোন আহিল। আৰক্ষীক জনোৱা মতে, পথত এজন পুৰুষ আৰু এগৰাকী মহিলা অচেতন হৈ পৰি আছে। আৰক্ষীয়ে খৰধৰকৈ অঞ্চলটোলৈ গৈ দুয়োকে উদ্ধাৰ কৰে। স্থানীয় স্বাস্থ্য কেন্দ্ৰলৈ নিয়াৰ সময়ত চিকিৎসকে লোকজনক মৃত বুলি ঘোষণা কৰে।
লগত থকা মহিলাগৰাকীয়ে আৰক্ষীক জনোৱা মতে, মৃত লোকজন তেওঁৰ স্বামী। সিহঁতে ফুৰিবলৈ ওলাই গৈছিল। সেই সময়তে এখন গাড়ীয়ে তেওঁলোকক খুন্দা মাৰে। মহিলাগৰাকীয়ে পিন্ধা সোণৰ গহনাও লুটপাত কৰাৰ অভিযোগ উত্থাপন কৰে। প্ৰথম অৱস্থাত আৰক্ষীয়ে সমগ্ৰ বিষয়টোক দুৰ্ঘটনা আৰু ডকাইতিৰ অপৰাধ বুলি গণ্য কৰিছিল। শ্ৰীগংগানগৰৰ এছ পি অমৃতা দুহানে সংবাদ মাধ্যমৰ আগত এইদৰে কয়।
সৰ্বভাৰতীয় সংবাদ মাধ্যমৰ আগত তেওঁ কয়, “এজাহাৰ লাভ কৰাৰ পিছত আমি সেই স্থান পৰিদৰ্শন কৰিলোঁ। ফৰেনছিক বিজ্ঞান লেবৰ দলকো তদন্ত কৰিবলৈ অৱগত কৰা হয়। মৃত লোকজনৰ নাম আশীষ আৰু মহিলাগৰাকীৰ নাম অঞ্জু।”
কিন্তু তদন্ত আগবাঢ়ি যোৱাৰ লগে লগে আৰক্ষীৰ সন্দেহ বাঢ়ি আহিল। সংবাদ মাধ্যমৰ বাতৰি অনুসৰি আশীষৰ চিকিৎসা প্ৰতিবেদন অঞ্জুৰ বক্তব্যৰ সৈতে মিল নাছিল। আশীষৰ শৰীৰত আঘাতৰ চিন আৰু ডিঙি চেপি ধৰাৰ চিন থকা বুলি চিকিৎসা প্ৰতিবেদনত প্ৰকাশ পাইছে। কিন্তু অঞ্জুৰ মেডিকেল ৰিপৰ্টত তেওঁৰ শৰীৰত কোনো ধৰণৰ আঘাতৰ চিন দেখা পোৱা নাই। ইয়াৰ পিছত আৰক্ষীয়ে অঞ্জুৰ ফোন কলৰ ৰেকৰ্ড চালে। তেতিয়াই সত্য পোহৰলৈ আহিল।
আৰক্ষীয়ে অঞ্জুৰ কল ৰেকৰ্ডৰ পৰা এটা নম্বৰ পাইছিল। তদন্ত আগবাঢ়ি যোৱাৰ লগে লগে পোহৰলৈ আহিল যে ফোন নম্বৰটো সঞ্জু নামৰ এজন ব্যক্তিৰ। তেতিয়া পুলিচে গম পালে যে সঞ্জু আচলতে অঞ্জুৰ প্ৰেমিক। অঞ্জুৰ বিয়াৰ আগৰে পৰাই দুয়োৰে সম্পৰ্ক আছিল। আৰক্ষীয়ে জনোৱা মতে, অঞ্জুৱে প্ৰেমিকৰ সৈতে ষড়যন্ত্ৰ কৰি স্বামীক হত্যাৰ পৰিকল্পনা কৰিছিল। সেইটো দুৰ্ঘটনা বুলি ঢাকি ৰখাৰ চেষ্টা কৰা হৈছিল।
আৰক্ষীয়ে জনোৱা মতে, তিনিমাহ পূৰ্বে অঞ্জু আৰু আশীষৰ বিয়া হৈছিল। কিন্তু অঞ্জু এই বিবাহত সুখী নাছিল। তেওঁ পিতৃৰ ঘৰলৈ গৈছিল। তাতে আকৌ সঞ্জুৰ লগত তেওঁৰ যোগাযোগ হ’ল। তাতেই আৰম্ভ হ’ল আশীষক হত্যা কৰাৰ পৰিকল্পনা। পৰিকল্পনা অনুসৰি অঞ্জু শহুৰেকৰ ঘৰলৈ উভতি আহিল।
আশীষৰ ৰাতিৰ আহাৰ খোৱাৰ পিছত খোজ কঢ়াৰ অভ্যাস আছিল। অঞ্জুৱেও তেওঁৰ লগত খোজ কাঢ়িবলৈ আৰম্ভ কৰিলে। ৩০ জানুৱাৰীত অঞ্জু আশীষৰ লগত বাহিৰলৈ ওলাই যায়। সেই সময়ত সঞ্জু আৰু তেওঁৰ দুই বন্ধু ৰকি ওৰফে ৰোহিত আৰু বাদল ওৰফে সিদ্ধাৰ্থ ওচৰতে লুকাই আছিল। তেওঁলোকে আশীষক হত্যা কৰে। সন্দেহৰ পৰা হাত সাৰিবলৈ অঞ্জুৱে সঞ্জু আৰু লগৰ কেইজনৰ হাতত গহনা আৰু ফোনটো গতাই দিয়ে।
আৰক্ষীৰ সূত্ৰ অনুসৰি অঞ্জুৱে নিজৰ বক্তব্য অবিৰতভাৱে সলনি কৰাত সন্দেহ কৰা হৈছিল। তাৰ পিছত তদন্ত আৰু বাকী থকা প্ৰমাণৰ ভিত্তিত চাৰিজন লোকক গ্ৰেপ্তাৰ কৰা হয়।
উল্লেখ্য যে যোৱা বছৰ ৰাজা ৰঘুবংশী আৰু সোণম বিয়াৰ পিছত হানিমুনৰ বাবে মেঘালয়লৈ যায়। তাতে নিৰুদ্দেশ হৈ পৰে ৰাজা আৰু সোণম। ১২ দিনৰ অন্তত উদ্ধাৰ হয় ৰাজাৰ মৃতদেহ। উত্তৰ প্ৰদেশৰ গাজীপুৰৰ এখন ধাবাত উদ্ধাৰ কৰা হয় সোণমক। যদিও প্ৰথমে দুৰ্ঘটনা বুলি কোৱা হৈছিল, পিছলৈ তদন্তত এইটো এটা হত্যাকাণ্ড বুলি জানিব পৰা যায়। প্ৰেমিক ৰাজ কুশৱাহাৰ সৈতে ষড়যন্ত্ৰ কৰি সোণমে স্বামী ৰাজাক হত্যা কৰিছিল। ভাড়াতীয় হত্যাকাৰীও নিযুক্ত কৰা হৈছিল।
