গুৱাহাটীৰ নীলাচল পাহাৰত থকা ঐতিহ্যমণ্ডিত মা কামাখ্যা মন্দিৰৰ প্ৰস্তাৱিত প্ৰৱেশ কৰিডৰ প্ৰকল্পৰ কাম আগবঢ়াই নিয়াৰ ক্ষেত্ৰত থকা সকলো আইনী বাধা এতিয়া আঁতৰ হৈছে। গুৱাহাটী উচ্চ ন্যায়ালয়ে এই গুৰুত্বপূৰ্ণ প্ৰকল্পটোৰ পুনৰ উন্নয়ন পৰিকল্পনাক লৈ চলি থকা বিতৰ্কৰ অৱসান ঘটাই নিৰ্মাণ কাৰ্যৰ অনুমতি প্ৰদান কৰিছে। মুখ্য ন্যায়াধীশ আশুতোষ কুমাৰ আৰু ন্যায়াধীশ অৰুণ দেৱ চৌধুৰীৰ নেতৃত্বত গঠিত বিচাৰপীঠে এই প্ৰকল্পটোক প্ৰত্যাহ্বান জনাই দাখিল কৰা জনস্বাৰ্থৰ গোচৰ আৰু ৰিট আবেদনসমূহৰ শেহতীয়াকৈ নিষ্পত্তি কৰিছে। ৰাজ্য চৰকাৰে আদালতক জনোৱা আশ্বাস আৰু বিশেষজ্ঞৰ প্ৰতিবেদনৰ ভিত্তিত সন্তুষ্ট হৈ ন্যায়ালয়ে এই ঐতিহাসিক সিদ্ধান্ত গ্ৰহণ কৰে।
প্ৰকল্পটোৰ নিৰ্মাণক লৈ থকা মূল চিন্তা আছিল মন্দিৰৰ প্ৰাচীন স্থাপত্য আৰু পবিত্ৰ ভূগৰ্ভস্থ পানীৰ উৎসসমূহৰ সুৰক্ষা। এই সন্দৰ্ভত অসমৰ মহাধিবক্তাই আদালতত স্পষ্ট কৰি দিয়ে যে মন্দিৰৰ মূল গাঁথনি বা প্ৰাকৃতিক জলস্তৰৰকোনো ধৰণৰ ক্ষতি নোহোৱাকৈহে কাম কৰা হ’ব। প্ৰয়োজনীয় সকলো চৰকাৰী অনুমতি লাভ নকৰা পৰ্যন্ত আৰু জলবিজ্ঞান তথা ভূ-পদাৰ্থ বিজ্ঞানৰ বিশদ অধ্যয়ন সম্পূৰ্ণ নোহোৱালৈকে কোনো ধৰণৰ নিৰ্মাণ কাৰ্য আৰম্ভ কৰা নহ’ব বুলি চৰকাৰে প্ৰতিশ্ৰুতি দিছে। আই আই টি গুৱাহাটী আৰু ৰুৰকীৰ নেশ্যনেল ইনষ্টিটিউট অৱ হাইড্ৰ’লজীৰ দৰে আগশাৰীৰ প্ৰতিষ্ঠানে এই অঞ্চলটোৰ পৰিৱেশ আৰু স্থায়িত্বৰ ওপৰত চলোৱা অধ্যয়নৰ পাছতহে প্ৰকল্পটো আগবঢ়াই নিয়াৰ সিদ্ধান্ত লোৱা হৈছে।
উল্লেখযোগ্য যে এই প্ৰকল্পটোৰ স্বচ্ছতাক লৈ একাংশ লোকে প্ৰশ্ন উত্থাপন কৰিছিল। বিশেষকৈ মন্দিৰৰ পবিত্ৰতা আৰু ঐতিহ্য সুৰক্ষা আইন উলংঘা হোৱাৰ আশংকাত আদালতত আবেদন দাখিল কৰা হৈছিল। আবেদনকাৰীসকলে বিচাৰিছিল যে চৰকাৰে এই নিৰ্মাণৰ সন্দৰ্ভত এখন শ্বেতপত্ৰ প্ৰকাশ কৰক আৰু নিবিদা প্ৰক্ৰিয়াৰ সঠিক পৰীক্ষা কৰক। তেওঁলোকৰ যুক্তি আছিল যে এনে বৃহৎ নিৰ্মাণ কাৰ্যই শতিকা পুৰণি মন্দিৰটোৰ ধৰ্মীয় পৰিৱেশ আৰু ভক্তসকলে পবিত্ৰ বুলি গণ্য কৰা প্ৰাকৃতিক জলসম্পদৰ ক্ষতি কৰিব পাৰে। অৱশ্যে চৰকাৰে আদালতক নিশ্চিত কৰিছে যে বিশেষজ্ঞৰ পৰামৰ্শসমূহ আখৰে আখৰে পালন কৰা হ’ব আৰু মন্দিৰৰ একো ক্ষতি হ’বলৈ দিয়া নহ’ব।
আদালতে ৰাজ্য চৰকাৰৰ শপতনামা আৰু বিশেষজ্ঞৰ প্ৰতিবেদনসমূহ পৰীক্ষা কৰি কয় যে তীৰ্থযাত্ৰীসকলৰ সুবিধাৰ বাবে চৰকাৰে গ্ৰহণ কৰা এই জনকল্যাণমূলক প্ৰকল্পটো বাধা দি ৰখাৰ কোনো যুক্তি নাই। অৱশ্যে ন্যায়ালয়ে এক বিশেষ নিৰ্দেশনাত উল্লেখ কৰিছে যে যদি ভৱিষ্যতে নিৰ্মাণ কাৰ্যৰ সময়ত কোনো ধৰণৰ নিয়ম উলংঘা হোৱা দেখা যায়, তেন্তে আবেদনকাৰীসকলে পুনৰ আদালতৰ কাষ চাপিব পাৰিব।
