অসমৰ অৰ্থনীতিৰ অন্যতম চালিকা শক্তি হিচাপে পৰিগণিত হোৱা দুশ বছৰীয়া চাহ উদ্যোগটোক জীয়াই ৰখাত চাহ বাগিচাৰ শ্ৰমিকসকলে গুৰুত্বপূৰ্ণ ভূমিকা পালন কৰি আহিছে। অতি নূন্যতম মজুৰিতে কঠোৰ পৰিশ্ৰম কৰি ৰাজ্য তথা দেশৰ অৰ্থনীতিলৈ অৱদান আগবঢ়াই অহা এই চাহ জনজাতি আৰু আদিবাসী লোকসকল আজিও নানা সামাজিক আৰু আৰ্থিক নিৰাপত্তাহীনতাত ভুগিবলগীয়া হৈছে। চৰকাৰে এইসকল লোকৰ উন্নয়নৰ বাবে ইখনৰ পাছত সিখন অভিলাষী আঁচনি ৰূপায়ণ কৰিছে যদিও তেওঁলোকৰ মৌলিক সমস্যাসমূহৰ যেন আজিও অন্ত পৰা নাই।
বছৰ বছৰ ধৰি দৈনিক অতি কম মজুৰিতে কাম কৰি অহা চাহ শ্ৰমিকসকলে দীৰ্ঘদিন ধৰি মজুৰি বৃদ্ধিৰ দাবী জনাই আহিছে। চৰকাৰে এই বিষয়ত সঠিক পদক্ষেপ গ্ৰহণ নকৰাৰ অভিযোগ তুলি শেহতীয়াকৈ অসম চাহ জনজাতি ছাত্ৰ সন্থা (আটাছা) পুনৰ প্ৰতিবাদত নামি পৰিছে। সংগঠনটোৱে ডিব্ৰুগড় জিলা আয়ুক্তৰ কাৰ্যালয়ৰ সন্মুখত এক তিনি ঘণ্টীয়া ধৰ্ণা কাৰ্যসূচী ৰূপায়ণ কৰে। তেওঁলোকৰ মূল দাবীসমূহ হৈছে- চাহ শ্ৰমিকৰ দৈনিক মজুৰি ৫৫১ টকালৈ বৃদ্ধি কৰা, চাহ জনগোষ্ঠীক জনজাতিকৰণৰ মৰ্যাদা প্ৰদান কৰা, চাহ বাগিচা তথা বস্তি অঞ্চলত বসবাস কৰা চাহ জনগোষ্ঠীৰ লোকসকলক মাটিৰ পট্টা প্ৰদান কৰা।
প্ৰতিবাদী কাৰ্যসূচীত অংশগ্ৰহণকাৰীসকলে চৰকাৰৰ বিৰুদ্ধে বিভিন্ন শ্লোগান দি ডিব্ৰুগড় চহৰ কঁপাই তোলে। তেওঁলোকে চৰকাৰক “প্ৰতিশ্ৰুতি ভঙ্গকাৰী” আখ্যা দি অভিযোগ কৰে যে নিৰ্বাচনৰ পূৰ্বে দিয়া প্ৰতিশ্ৰুতিসমূহ পূৰণ কৰাত চৰকাৰ ব্যৰ্থ হৈছে।
আটাছাৰ কেন্দ্ৰীয় সমিতিৰ উপ-সভাপতি লাজাৰ নন্দই সংবাদ মাধ্যমৰ আগত ক্ষোভ প্ৰকাশ কৰি কয় যে চাহ জনগোষ্ঠীৰ ৰাইজে বিজেপি চৰকাৰৰ ওপৰত যথেষ্ট আস্থা ৰাখিছিল। কিন্তু চৰকাৰে মজুৰি বৃদ্ধি, জনজাতিকৰণ আৰু মাটিৰ পট্টা প্ৰদানৰ দৰে গুৰুত্বপূৰ্ণ সমস্যাসমূহ সমাধান কৰাৰ পৰিৱৰ্তে এই জনগোষ্ঠীটোৰ ৰাজনৈতিক ক্ষমতা নোহোৱা কৰিবলৈহে চেষ্টা চলাইছে। তেওঁ স্পষ্টকৈ সকীয়াই দিয়ে যে যদি ২০২৬ চনৰ বিধানসভা নিৰ্বাচনৰ পূৰ্বে এই দাবীসমূহ পূৰণ কৰা নহয়, তেন্তে নিৰ্বাচনত চাহ জনগোষ্ঠীৰ ৰাইজে শাসকীয় দলক উচিত প্ৰত্যুত্তৰ দিব।
