অসম বিধানসভাৰ বাজেট অধিৱেশনৰ দ্বিতীয় দিনা মঙলবাৰে মুখ্যমন্ত্রী হিমন্ত বিশ্ব শৰ্মাৰ অধ্যক্ষতাত ৰাজ্যিক কেবিনেটৰ এখন গুৰুত্বপূৰ্ণ বৈঠক অনুষ্ঠিত হয়। এই বৈঠকত চাহ জনগোষ্ঠীৰ বাবে চৰকাৰী চাকৰিত সংৰক্ষণ ব্যৱস্থা প্ৰৱৰ্তন, মহিলা উদ্যমিতা অভিযানৰ পৰিসৰ সম্প্ৰসাৰণ আৰু ভূমিহীন খিলঞ্জীয়া পৰিয়ালক ভূমি পট্টা প্ৰদানৰ দৰে কেইবাটাও গুৰুত্বপূৰ্ণ সিদ্ধান্ত গ্ৰহণ কৰিছে। মহিলা উদ্যমিতা অভিযানৰ সম্প্ৰসাৰণ ৰাজ্যৰ গ্ৰাম্য অৰ্থনীতি সবল কৰাৰ লক্ষ্যৰে আৰম্ভ কৰা ‘মুখ্যমন্ত্ৰীৰ মহিলা উদ্যমিতা অভিযান’ ৰ পৰিসৰ চৰকাৰে অধিক সম্প্ৰসাৰিত কৰিছে। ইতিমধ্যে ৩২ লাখ মহিলাক ১০ হাজাৰ টকাকৈ প্ৰথম কিস্তিৰ ধন প্ৰদান কৰিছে। কেবিনেটে এই তালিকাত নতুনকৈ ১ লাখ ৩ হাজাৰ ৫০০ গৰাকী হিতাধিকাৰীক অন্তৰ্ভুক্ত কৰাৰ বাবে অনুমোদন জনাইছে।
চাহ আৰু আদিবাসী জনগোষ্ঠীৰ বাবে ঐতিহাসিক পদক্ষেপ অসমৰ চাহ বাগিচা আৰু আদিবাসী সম্প্ৰদায়ৰ মেধাৱী যুৱক-যুৱতীসকলৰ বাবে কেবিনেটে এক ঐতিহাসিক সিদ্ধান্ত গ্ৰহণ কৰে। এতিয়াৰে পৰা ৰাজ্য চৰকাৰৰ গ্ৰেড-১ আৰু গ্ৰেড-২ পদৰ চাকৰিত চাহ জনগোষ্ঠী আৰু আদিবাসীসকলৰ বাবে ৩ শতাংশ সংৰক্ষণ সুনিশ্চিত কৰা হ’ব।
মুখ্যমন্ত্ৰীয়ে জনোৱা মতে, আগন্তুক এ চি এছ পৰীক্ষাৰ পৰাই এই নিয়ম কাৰ্যকৰী হ’ব। ইয়াৰ উপৰি আজিৰ পৰা যিবোৰ চৰকাৰী বিজ্ঞাপন প্ৰকাশ পাব, সেই সকলোবোৰতে এই ৩ শতাংশ সংৰক্ষণ ব্যৱস্থা প্ৰযোজ্য হ’ব। এই পদক্ষেপে চাহ জনগোষ্ঠীৰ মাজত উচ্চ শিক্ষাৰ প্ৰতি ধাউতি বঢ়োৱাৰ লগতে তেওঁলোকক প্ৰশাসনৰ উচ্চ পৰ্যায়ত অংশগ্ৰহণৰ সুযোগ দিব।
শিক্ষা আৰু ক্ৰীড়া আন্তঃগাঁথনিৰ উন্নয়ন শিক্ষাখণ্ড আৰু ক্ৰীড়াৰ উত্তৰণৰ বাবে কেবিনেটে কেইবাটাও বিশেষ বিত্তীয় অনুমোদন জনাইছে। কাৰ্বি আংলং জিলাৰ লাংৱকুত নিৰ্মাণ হ’বলগীয়া ৰাজ্যৰ দ্বিতীয়খন সৈনিক স্কুলৰ বাবে পূৰ্বৰ ১০০ কোটি টকাৰ আবণ্টন বৃদ্ধি কৰি ৩৩৫.৮৭ কোটি টকালৈ সংশোধিত বাজেটত অনুমোদন জনাইছে। চৰকাৰী বিদ্যালয়ৰ শিক্ষকসকলৰ কল্যাণৰ বাবে তেওঁলোকৰ বাৰ্ষিক ছুটী ১০ দিনৰ পৰা ১৫ দিনলৈ বৃদ্ধি কৰা হৈছে। ধেমাজিত অসম ক্ৰিকেট সন্থাৰ দ্বাৰা এখন আন্তঃৰাষ্ট্ৰীয় মানৰ ষ্টেডিয়াম নিৰ্মাণৰ বাবে ৩১ বিঘা চৰকাৰী মাটিত কেবিনেটে অনুমোদন জনায়। লগতে যোৰহাটৰ ঐতিহাসিক ‘বৰভেটি চৌহদ’ৰ সংহত উন্নয়ন আৰু নিৰ্মাণ কাৰ্যৰ বাবে ১৯.৫৯ কোটি টকাৰ পুঁজি অনুমোদন কৰা হয়। ভূমি পট্টা আৰু কৃষি বিভাগৰ সংস্কাৰ আজিৰ কেবিনেটে ১০খন জিলাৰ ৩১৯টা খিলঞ্জীয়া ভূমিহীন পৰিয়ালক গৃহ নিৰ্মাণৰ বাবে চৰকাৰী খাচ আৰু চিলিং উদ্বৃত্ত মাটি বন্দৱস্ত কৰাতো অনুমোদন জনাইছে। ইয়াৰ উপৰি কেইবাখনো জিলাত ভূমি পট্টা প্ৰদানৰ প্ৰক্ৰিয়াত কেবিনেটে সন্মতি জনাইছে।
একেদৰে, কৃষি বিভাগৰ কাম-কাজ অধিক গতিশীল কৰিবলৈ আৰু কৰ্মচাৰীসকলৰ পদোন্নতিৰ পথ সুচল কৰিবলৈ বিভাগৰ সেৱাবিধি সংশোধনৰ প্ৰস্তাৱতো কেবিনেটে অনুমোদন জনাইছে।
