পূৰ্বৰ উত্তৰ কাছাৰ পাৰ্বত্য জিলা তথা বৰ্তমানৰ ডিমা হাছাও জিলাক দুভাগ কৰি দুখন পৃথক জিলা গঠনৰ দাবীৰ তীব্ৰ বিৰোধিতা কৰিছে সদৌ ডিমাছা ছাত্ৰ সন্থাই। বুধবাৰে বিয়লি সংগঠনটোৰ কাৰ্যালয়ত আয়োজিত এক সংবাদমেলত ছাত্ৰ সন্থাৰ সভাপতি আৰুজিত কেম্প্ৰাইয়ে স্পষ্ট কৰি দিয়ে যে সাম্প্ৰদায়িক ভিত্তিত ডিমা হাছাও জিলাৰ বিভাজন কোনো কাৰণতে মানি লোৱা নহ‘ব।
সভাপতিগৰাকীয়ে অভিযোগ কৰে যে ইণ্ডিজিনাছ পিপ‘লছ ফ’ৰামে সাম্প্ৰদায়িক ভিত্তিত জিলাখন বিভাজনৰ দাবী জনাই আহিছে। তেওঁ উল্লেখ কৰে যে, “যোৱা ১৩ ফেব্ৰুৱাৰীত দিছপুৰৰ জনতা ভৱনত ৰাজ্যৰ মন্ত্ৰী পীযুষ হাজৰীকাৰ সৈতে ইণ্ডিজিনাছ পিপ’লছ ফ’ৰাম, ইণ্ডিজিনাছ ষ্টুডেণ্টছ ফ’ৰাম আৰু ইণ্ডিজিনিয়াছ উইমেন ফ’ৰামৰ প্ৰতিনিধিৰ পৃথক জিলা গঠন সন্দৰ্ভত এক আলোচনা অনুষ্ঠিত হৈছিল। ইয়াৰ উপৰি, বুধবাৰে ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাৰ সৈতেও এই তিনিটা সংগঠনৰ প্ৰতিনিধিৰ এখন বৈঠক অনুষ্ঠিত হয়। সদৌ ডিমাছা ছাত্ৰ সন্থাই দাবী জনাইছে যে এই দুয়োখন বৈঠকত হোৱা আলোচনাৰ সবিশেষ অহা ৭২ ঘণ্টাৰ ভিতৰত ৰাজহুৱা কৰিব লাগে।”
কেম্প্ৰাইয়ে সংবাদমেলত ক্ষোভ প্ৰকাশ কৰি কয় যে চৰকাৰৰ সৈতে অনুষ্ঠিত এই গুৰুত্বপূৰ্ণ বৈঠকত ডিমাছা জনগোষ্ঠীৰ কোনো প্ৰতিনিধিক আমন্ত্ৰণ জনোৱা হোৱা নাছিল। ভৱিষ্যতে পৃথক জিলা গঠনৰ বিষয়ত ইণ্ডিজিনাছ পিপ‘লছ ফ’ৰামৰ সৈতে চৰকাৰৰ কোনো বৈঠক অনুষ্ঠিত হ’লে তাত ডিমাছা জনগোষ্ঠীৰ ছাত্ৰ আৰু সামাজিক সংগঠনৰ প্ৰতিনিধিকো অন্তৰ্ভুক্ত কৰিবলৈ তেওঁ দাবী জনায়।
ছাত্ৰ সংগঠনটোৱে চৰকাৰক সকীয়াই দি কয় যে যদি অহা শনিবাৰৰ ভিতৰত চৰকাৰে বৈঠকৰ সিদ্ধান্তসমূহ ৰাজহুৱা নকৰে, তেন্তে দেওবাৰে তেওঁলোকে পৰৱৰ্তী কাৰ্যপন্থা ঘোষণা কৰিব।
লগতে, ডিমাৰাজি ৰাজ্য গঠনৰ দীৰ্ঘদিনীয়া দাবী সন্দৰ্ভত চৰকাৰে গুৰুত্ব নিদিয়া বুলিও তেওঁলোকে অভিযোগ কৰে। তেওঁলোকে কয় যে ডি এইছ ডি (DHD) ৰ দুয়োটা গোটৰ সৈতে চৰকাৰৰ স্বাক্ষৰিত বুজাবুজি চুক্তিৰ (MoS) বহুতো দফা আজিলৈকে কাৰ্যকৰী হোৱা নাই। এনে অৱস্থাত সাম্প্ৰদায়িক ভিত্তিত জিলা বিভাজনৰ যিকোনো চৰকাৰী চিন্তা-চৰ্চাক তীব্ৰ বিৰোধিতা কৰা হ’ব বুলি সংগঠনটোৱে স্পষ্ট কৰি দিয়ে।
উল্লেখ্য যে, ২০১০ চনৰ ৩০ মাৰ্চত তদানীন্তন কংগ্ৰেছ চৰকাৰে উত্তৰ কাছাৰ পাৰ্বত্য জিলাৰ নাম সলনি কৰি ডিমা হাছাও কৰাৰ পিছৰে পৰাই ইণ্ডিজিনাছ পিপ’লছ ফ’ৰামে জিলাখনক দুভাগ কৰাৰ দাবীত আন্দোলন চলাই আহিছে। অতীতত এই দাবীৰ পৰিপ্ৰেক্ষিতত জিলাখনত ব্যাপক আইন-শৃংখলাজনিত পৰিস্থিতিৰো সৃষ্টি হৈছিল।
