অসমীয়াৰ বাপতিসাহোন উৎসৱ বিহু আৰু পৰম্পৰাগত হুঁচৰিক লৈ কেন্দ্ৰীয় সাংস্কৃতিক মন্ত্ৰালয়ৰ এক চৰম অজ্ঞতা পোহৰলৈ আহিছে। মন্ত্ৰালয়ৰ ফেচবুক পেজত প্ৰকাশিত এটা প’ষ্টত ‘বিহু’ আৰু ‘হুঁচৰি’ক ক্ৰমে ‘বিহুনা’ আৰু ‘হুচাৰি’ হিচাপে বিকৃত ৰূপত উপস্থাপন কৰাৰ পাছতে সমগ্ৰ অসমজুৰি তীব্ৰ ক্ষোভৰ উদ্গীৰণ ঘটিছে। ৰাজ্যখনৰ জনসাধাৰণৰ মতে, এয়া কেৱল এক সাধাৰণ বানানৰ ভুল নহয়, বৰঞ্চ অসমৰ নিভাঁজ কৃষ্টি-সংস্কৃতি আৰু স্বাভিমানৰ প্ৰতি থকা কেন্দ্ৰীয় চৰকাৰৰ চৰম অৱহেলা আৰু অমনোযোগিতাৰ এক স্পষ্ট নিদৰ্শন।
সাংস্কৃতিক মন্ত্ৰালয়ৰ ফেচবুক একাউণ্টত শ্বেয়াৰ কৰা প‘ষ্টটোত এটা ইংগিত দিয়া হৈছিল: “বিশ্বৰ অন্যতম শ্ৰেষ্ঠ চাহ উৎপাদনৰ বাবে এই ৰাজ্যখন পৰিচিত।” ইয়াৰ লগতে পৰম্পৰাগত সাজ-পাৰ পৰিহিতা এগৰাকী অসমীয়া যুৱতীৰ ছবি সন্নিৱিষ্ট কৰি প্ৰশ্ন কৰা হৈছিল যে “হুচাৰি (Husari) আৰু বিহুনা (Bihuna) কোনখন ৰাজ্যৰ পৰম্পৰাগত লোকনৃত্য?
অসমীয়া মানুহৰ বাবে উত্তৰটো স্পষ্ট আছিল ‘অসম’। কিন্তু বানান দুটাক লৈহে সৰ্বত্ৰে প্ৰশ্ন উত্থাপন হৈছে। এয়া কেৱল এক টাইপিং ভুল নে উত্তৰ-পূৰ্বাঞ্চলৰ এই ৰাজ্যখনৰ সাংস্কৃতিক ঐতিহ্যৰ প্ৰতি থকা অজ্ঞতাৰ প্ৰকাশ, তাক লৈ নেটিজেনসকলে ক্ষোভ উজাৰিছে। এজন ব্যৱহাৰকাৰীয়ে লিখে, “এয়া আমাৰ বিহু সংস্কৃতিৰ প্ৰতি চূড়ান্ত অৱমাননা। বিহুনা আকৌ কি! শুদ্ধ শব্দটো ‘বিহু নাচ’ বা ‘বিহু নাম’ হ’ব লাগে।” আন এজনে প্ৰতিক্ৰিয়া প্ৰকাশ কৰি কয় যে তেওঁলোকে নাজানে ‘বিহুনা’ কি বস্তু আৰু এয়া নিশ্চয়কৈ এক ডাঙৰ ভুল।
ৰাষ্ট্ৰীয় বঁটাপ্ৰাপ্ত চলচ্চিত্ৰ নিৰ্মাতা তথা বিশিষ্ট চলচ্চিত্ৰ সমালোচক উৎপল বৰপূজাৰীয়ে এই সন্দৰ্ভত প্ৰতিক্ৰিয়া প্ৰকাশ কৰি কয়, “কেন্দ্ৰীয় চৰকাৰৰ মন্ত্ৰালয়ৰ সামাজিক মাধ্যম পৰিচালনা কৰাসকলে ৰাজহুৱাভাৱে কিবা এটা প‘ষ্ট কৰাৰ আগতে সমলবোৰ বাৰে বাৰে পৰীক্ষা কৰাটো বাঞ্ছনীয়। এনে হাস্যকৰ ভুলে অযথা বিতৰ্কৰ সৃষ্টি কৰাৰ লগতে ভুল তথ্য বিয়পায়।” তেওঁ লগতে আক্ষেপ প্ৰকাশ কৰে যে বহু লোকে কমেণ্টত আঙুলিয়াই দিয়াৰ পিছতো মন্ত্ৰালয়ে এতিয়ালৈকে এই ভুল সংশোধন কৰা নাই।
লক্ষণীয়ভাৱে, সাংস্কৃতিক মন্ত্ৰালয়ে এতিয়ালৈকে এই সমালোচনাৰ কোনো আনুষ্ঠানিক সঁহাৰি দিয়া নাই থলুৱা আৰু আঞ্চলিক পৰম্পৰাৰ উপস্থাপনৰ ক্ষেত্ৰত সাংস্কৃতিক সংবেদনশীলতাৰ প্ৰয়োজনীয়তাৰ বিষয়টো কিন্তু এই ঘটনাই পুনৰবাৰ চৰ্চালৈ আনিছে। অসমীয়া ৰাইজৰ বাবে এয়া কেৱল বানানৰ ভুল নহয়, বৰং ভাৰতৰ বৈচিত্ৰ্যময় সংস্কৃতিক শুদ্ধ আৰু সন্মানেৰে স্বীকৃতি দিয়াৰ এক গুৰুত্বপূৰ্ণ বিষয়।
