ৱেষ্ট ইণ্ডিজৰ তাণ্ডৱত যেন মুক দৰ্শক হৈ পৰিছিল জিম্বাবুৱে। এদিনীয়া বিশ্বকাপৰ দুবাৰৰ চেম্পিয়ন হৈছে ৱেষ্ট ইণ্ডিজ। টি-২০ বিশ্বকাপতো দুবাৰকৈ জয়লাভ কৰিছে। চলিত টি-২০ বিশ্বকাপতো কেৰিবিয়ানৰ চকু কপালত তুলিব পৰা প্ৰদৰ্শন। এই ৱেষ্ট ইণ্ডিজৰ দলটোৱে ক্ৰিকেট অনুৰাগীসকলক ভিভ ৰিচাৰ্ডছ, গৰ্ডন গ্ৰীনিজ, মেলকম মাৰ্শ্বেলৰ কথা মনত পেলাই দিয়ে।
সোমবাৰে সন্ধিয়া টি-২০ বিশ্বকাপৰ ছুপাৰ এইট পৰ্যায়ত মুম্বাইৰ ৱানখেড়ে ষ্টেডিয়ামত ৱেষ্ট ইণ্ডিজ আৰু জিম্বাবুৱেৰ মাজত মুখামুখি হয়। কেৰিবিয়ানৰ আগত অসহায়ভাৱে ধৰা দিলে চিকন্দৰ ৰাজা বাহিনী। ব্ৰেড ইভান্সৰ যুঁজ ব্যৰ্থ হ’ল। কেৰিবিয়ান দলে ১০৭ ৰানত জয়লাভ কৰে।
অৱশ্যে ছেমিফাইনেলৰ পথত টিম ইণ্ডিয়াৰ বাবে ৱেষ্ট ইণ্ডিজৰ এই বিশাল জয়ে বৃহৎ বিপৰ্যয়ৰ সৃষ্টি কৰিছে। ৱেষ্ট ইণ্ডিজ আৰু জিম্বাবুৱেৰ মাজত অনুষ্ঠিত হোৱা খেলখনত ছয়ৰ অভিলেখ গঢ়িল। ২০১৪ চনৰ টি-২০ বিশ্বকাপত এখন খেলত সৰ্বাধিক ৩০টা ছয়ৰ অভিলেখ আছিল। এই মেচখনত ৩১টা ছয়ৰ অভিলেখ গঢ়ে।
জিম্বাবুৱেৰ অধিনায়ক চিকন্দৰ ৰাজাই টছত জয়লাভ কৰি প্ৰথমে বলিং কৰাৰ সিদ্ধান্ত লয়। প্ৰথমে বেটিং কৰি কেৰিবিয়ানে ২২ গজত ধুমুহাৰ সৃষ্টি কৰে। ড্ৰেছিং ৰুমলৈ উভতি অহাৰ পূৰ্বে অ’পেনাৰ দুগৰাকী ব্ৰেণ্ডন কিঙে ৯(১২) ৰান আৰু শ্বাই হোপে ১৪(১২) ৰান সংগ্ৰহ কৰে। কেৰিবিয়ানৰ অ’পেনাৰ দুগৰাকীয়ে বিশেষ প্ৰদৰ্শন দিব নোৱাৰিলে যদিও মিডল অৰ্ডাৰে জিম্বাবুৱেৰ বলিং লাইন আপৰ ককাঁল ভাঙি পেলালে।
তিনি নম্বৰ স্থানত বেটিং কৰিবলৈ অহা শ্বিমৰন হেটমায়াৰে দুৰ্দান্ত ইনিংছ খেলে। তেওঁৰ বেটিং তাণ্ডৱ চাই এনে লাগিল যেন তেওঁ জিম্বাবুৱেৰ বলাৰক প্ৰশিক্ষণহে দিছে। শ্বিমৰন হেটমায়াৰে ৩৪টা বলত ৮৫ ৰানৰ আক্ৰমণাত্মক ইনিংছ খেলে। তেওঁৰ ইনিংছত আছিল ৭টা চাৰি আৰু ৭টা ছয়।
শ্বিমৰন হেটমায়াৰক ৰভমেন পাৱেলে ভালদৰে সমৰ্থন কৰিছিল। তেওঁ ৩৫টা বলত ৫৯ ৰান সংগ্ৰহ কৰে। তাৰ পাছত শ্বাৰফেন ৰাদাৰফোৰ্ডে ১৩টা বলত ৩১ ৰানৰ অপৰাজিত ইনিংছ খেলে। ৰোমাৰিয়া শ্বেফাৰ্ডে ২১(১০) ৰান আৰু জেছন হোল্ডাৰে ১৩(৪) ৰান সংগ্ৰহ কৰে।
জিম্বাবুৱেৰ হৈ ৰিচাৰ্ড নাগাৰভাই ২টা, ব্লেছিং মুজাৰাবানীয়ে ২টা, ব্ৰেড ইভান্সে ১টা, গ্ৰেম ক্ৰেমাৰে ১টাকৈ উইকেট দখল কৰে। ৱেষ্ট ইণ্ডিজে নিৰ্ধাৰিত ২০ অভাৰত ৬টা উইকেট হেৰুৱাই ২৫৪ ৰান সংগ্ৰহ কৰে। ইয়াৰ প্ৰত্যুত্তৰত জিম্বাবুৱেই বেটিং কৰিবলৈ নামি দুৰ্যোগৰ সন্মুখীন হ’বলগীয়া হয়। দুয়োগৰাকী অ’পেনাৰ টাদিৱানাশ্বে মাৰুমানীয়ে ১৪(৮) ৰান আৰু ব্রায়ান বেনেটে ৫(৫) ৰান সংগ্ৰহ কৰি আউট হয়। ডিঅ’ন মায়াৰ্ছে ২৮(১৫) ৰান সংগ্ৰহ কৰি ড্ৰেছিং ৰুমলৈ উভতি আহে।
ৰিয়ান বাৰ্লে স্ক’ৰ বুক খুলিবই নোৱাৰিলে। অধিনায়ক চিকন্দৰ ৰাজাই ২৭ (২০) ৰান কৰে। জিম্বাবুৱেৰ স্ক’ৰব’ৰ্ডত ১৬টা বলত ১৪ ৰান সংযোজন কৰে টনি মুনয়ংগাই। ব্ৰেড ইভান্সে এটা সন্মানজনক যুঁজ দিয়ে। তেওঁ ২১টা বলত ৪৩ ৰানৰ উল্লেখযোগ্য ইনিংছ খেলিছিল। কিন্তু সেয়া কোনো কামত নাহিল।
টপ অৰ্ডাৰ হওক, মিডল অৰ্ডাৰ হওক বা লৱাৰ অৰ্ডাৰেই হওক – জিম্বাবুৱে সকলো ক্ষেত্ৰতে বিফল। ৱেষ্ট ইণ্ডিজৰ হৈ আকেল হোছেইনে ৩টা, মেথিউ ফৰ্ডে ২টা, গুদাকেশ মটিয়ে ৪টা আৰু জেছন হোল্ডাৰে ১টাকৈ উইকেট দখল কৰে। জিম্বাবুৱেৰ ইনিংছ ১৪৭ ৰানতে সমাপ্ত হয়। ৱেষ্ট ইণ্ডিজে বিশাল ১০৭ ৰানৰ ব্যৱধানত জয়লাভ কৰে।
