কেৰালাৰ ন্যায়িক ইতিহাসত এক অভূতপূৰ্ব ঘটনা ঘটিবলৈ গৈ আছে। ৰাজ্যখনৰ ইতিহাসত প্ৰথমবাৰৰ বাবে এগৰাকী দৃষ্টিহীন মহিলাই ন্যায়াধীশ হিচাপে কাৰ্যভাৰ গ্ৰহণ কৰিবলৈ সাজু হৈছে। অধিবক্তা থানিয়া নাথান চিয়ে অতি সোনকালেই কেৰালাৰ ন্যায়িক সেৱাত অসামৰিক ন্যায়াধীশ (জুনিয়ৰ ডিভিজন) হিচাপে যোগদান কৰি এক নতুন অভিলেখ গঢ়িব। শেহতীয়াকৈ অনুষ্ঠিত হোৱা ন্যায়িক সেৱাৰ পৰীক্ষাত বিশেষভাৱে সক্ষম প্ৰাৰ্থীৰ তালিকাত থানিয়া নাথানে প্ৰথম স্থান লাভ কৰি সকলোকে আচৰিত কৰি তুলিছে। তেওঁৰ লগতে চেৰিব্ৰেল পালচি ৰোগত আক্ৰান্ত জয়ছন সাজন নামৰ আন এজন যুৱকেও এই তালিকাত দ্বিতীয় স্থান লাভ কৰি সফলতাৰ পৰিচয় দিছে।
থানিয়া নাথানৰ এই সফলতাৰ আঁৰত উচ্চতম ন্যায়ালয়ৰ এক ঐতিহাসিক ৰায়দানৰ বিশেষ ভূমিকা আছে। ২০২৫ চনত ন্যায়াধীশ জে বি পাৰদিৱালা আৰু আৰ মহাদেৱানৰ বিচাৰপীঠে স্পষ্ট কৰি দিছিল যে দৃষ্টিহীনতা এজন ব্যক্তিৰ ন্যায়িক সেৱাত যোগদান কৰাৰ ক্ষেত্ৰত বাধা হ’ব নোৱাৰে। উচ্চতম ন্যায়ালয়ে ৰায় দিছিল যে বিশেষভাৱে সক্ষম লোকসকলক তেওঁলোকৰ অক্ষমতাৰ বাবে কোনো সুযোগৰ পৰা বঞ্চিত কৰিব নোৱাৰি আৰু চৰকাৰে তেওঁলোকৰ বাবে এক অন্তৰ্ভুক্ত পৰিৱেশ সৃষ্টি কৰিব লাগে। এই ৰায়দানেই থানিয়া নাথানৰ বাবে ন্যায়াধীশৰ আসনখন লাভ কৰাৰ পথ প্ৰশস্ত কৰিলে।
ন্যায়িক সূত্ৰৰ মতে কেৰালাত ইয়াৰ পূৰ্বে কোনো দৃষ্টিহীন ব্যক্তি ন্যায়াধীশ হোৱাৰ উদাহৰণ নাই। কেৰালা উচ্চ ন্যায়ালয়ে ইতিমধ্যে নিৰ্বাচিত প্ৰাৰ্থীৰ তালিকা চৰকাৰলৈ প্ৰেৰণ কৰিছে আৰু অতি সোনকালেই আনুষ্ঠানিক নিযুক্তি পত্ৰ জাৰি কৰা হ’ব। মাত্ৰ ২৪ বছৰ বয়সতে এনে এক বিৰল সাফল্য অৰ্জন কৰা থানিয়া নাথান জন্মৰে পৰাই সম্পূৰ্ণ দৃষ্টিহীন যদিও তেওঁৰ মেধা আছিল অতুলনীয়। তেওঁ কান্নুৰ বিশ্ববিদ্যালয়ৰ পৰা এল এল বি পৰীক্ষাত শীৰ্ষ স্থান লাভ কৰিছিল আৰু কান্নুৰৰ তালিপাৰম্বাত অধিবক্তা হিচাপে নিজৰ কেৰিয়াৰ আৰম্ভ কৰিছিল।
নিজৰ সংগ্ৰামৰ বিষয়ে উল্লেখ কৰি থানিয়াই জনাইছে যে তেওঁ ব্ৰেইল লিপিৰ সহায়ত আইনৰ শিক্ষা গ্ৰহণ কৰিছিল। বৰ্তমানৰ উন্নত প্ৰযুক্তি আৰু স্ক্ৰীণ-ৰিডিং চফট্ ৱেৰৰ সহায়ত তেওঁ নথিপত্ৰসমূহ পঢ়িবলৈ সক্ষম হয়। এজন অধিবক্তা হিচাপে তেওঁ ব্ৰেইল লিপিৰ জৰিয়তে নিজৰ যুক্তিৰ টোকাসমূহ প্ৰস্তুত কৰিছিল। অৱশ্যে পুৰণি হস্তলিখিত নথি-পত্ৰ পঢ়া আৰু আদালতৰ পৰিৱেশৰ সৈতে খাপ খুৱাই লোৱাটো তেওঁৰ বাবে এক প্ৰত্যাহ্বান হ’ব পাৰে বুলি তেওঁ স্বীকাৰ কৰিছে। তথাপিও সকলো বাধা অতিক্ৰম কৰি নিষ্ঠাৰে কাম কৰি যোৱাৰ বাবে তেওঁ সম্পূৰ্ণ আত্মবিশ্বাসী।
