ভোপালত পোহৰলৈ আহিছে এক অতি ভয়ংকৰ আৰু ঘৃণনীয় কাণ্ড। চাকৰিৰ প্ৰলোভন দি যুৱতীসকলক ড্ৰাগছ খুৱাই ধৰ্ষণ কৰা আৰু বলপূৰ্বক ধৰ্মান্তৰ কৰোৱা এটা বৃহৎ চক্ৰক আৰক্ষীয়ে উৎখাত কৰিবলৈ সক্ষম হৈছে। এই সমগ্ৰ ঘটনাৰ মূল মাষ্টাৰমাইণ্ড আছিল আফ্ৰিন আৰু আমৰিণ নামৰ দুই ভগ্নী। বৰ্তমান আৰক্ষীয়ে এই দুই ভগ্নীক গ্ৰেপ্তাৰ কৰিছে যদিও তেওঁলোকৰ দলটোৰ আন তিনিজন সদস্য এতিয়াও পলাতক হৈ আছে।
এই সমগ্ৰ ঘটনাটো তেতিয়া পোহৰলৈ আহে যেতিয়া ছত্তীশগড়ৰ এগৰাকী ২১ বছৰীয়া বিউটিচিয়ান আৰু আন এগৰাকী মহিলাই পৃথককৈ আৰক্ষীৰ ওচৰত অভিযোগ দাখিল কৰে। ভুক্তভোগী যুৱতীগৰাকীয়ে জনোৱা মতে, আমৰিন নামৰ মহিলাগৰাকীয়ে তেওঁক ভাল চাকৰি দিয়াৰ প্ৰতিশ্ৰুতি দি বিশ্বাস জিকি লৈছিল। ইয়াৰ পিছতে তেওঁক ভোপালৰ এটা ফ্লেটলৈ লৈ যোৱা হয় আৰু তাত চাহৰ লগত নিচাযুক্ত দ্ৰব্য মিহলাই অচেতন কৰি ধৰ্ষণ কৰা হয়। কেৱল এয়াই নহয়, পাছত তেওঁক আহমেদাবাদলৈ লৈ গৈ আন কেইবাজনো লোকৰ দ্বাৰা যৌন নিৰ্যাতন চলোৱা হয়।
আৰক্ষীৰ ওচৰত দিয়া ভাষ্য অনুসৰি, এই চক্ৰটোৱে আৰ্থিকভাৱে দুৰ্বল ছোৱালীবোৰক লক্ষ্য কৰি লৈছিল। যুৱতীসকলক আপত্তিজনক অৱস্থাত ফটো আৰু ভিডিঅ’ তুলি ব্লেকমেইল কৰা হৈছিল যাতে তেওঁলোকে মুখ খুলিব নোৱাৰে। তেওঁলোকক চুটি কাপোৰ পিন্ধিবলৈ আৰু ধনী গ্ৰাহকৰ ওচৰলৈ যাবলৈ বাধ্য কৰোৱা হৈছিল। আটাইতকৈ ভয়ংকৰ কথাটো হ’ল, যুৱতীসকলক ড্ৰাগছৰ আসক্ত কৰি তোলা হৈছিল আৰু বলপূৰ্বক ধৰ্ম সলনি কৰি বোৰ্খা পিন্ধিবলৈ হেঁচা দিয়া হৈছিল।
ইফালে একেটা ফ্লেটতে কাম কৰা আন এগৰাকী মহিলাইও একেধৰণৰ অভিযোগ উত্থাপন কৰিছে। তেওঁ আৰক্ষীক ইয়াৰ ভিডিঅ’ প্ৰমাণো যোগান ধৰিছে। জানিব পৰা মতে, অভিযুক্ত ভগ্নীদ্বয়ে ভোপালৰ এটা আড়ম্বৰপূৰ্ণ কলনীত বাস কৰিছিল। চুবুৰীয়াসকলে জনোৱা মতে, সেই ফ্লেটটোলৈ নিশা হ’লেই অচিনাকি পুৰুষৰ আহ-যাহ চলিছিল, যিয়ে আগৰে পৰা সন্দেহৰ সৃষ্টি কৰিছিল। এই ঘটনাৰ পিছতে স্থানীয় ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে আৰু আৰক্ষীয়ে সমগ্ৰ বিষয়টোৰ ওপৰত অধিক তদন্ত চলাই আছে।
