উত্তৰ প্ৰদেশৰ গ্ৰেটাৰ নয়দাত এটা অতি চাঞ্চল্যকৰ ঘটনা সংঘটিত হৈছে। এজন থাৰ চালকে এজন বাইক আৰোহীক খুন্দা মৰাৰ পিছত বাইকখন নিজৰ গাড়ীৰ তলত আৱদ্ধ অৱস্থাতে প্ৰায় ৭ কিলোমিটাৰ পৰ্যন্ত চোঁচৰাই লৈ যায়। জানিব পৰা মতে পেট্ৰল পাম্পত তেল ভৰাই টকা পৰিশোধ নকৰাকৈ পলাই গৈছিল থাৰখন।
শুকুৰবাৰে সন্ধিয়া ধুম মাণিকপুৰ অঞ্চলৰ এটা পেট্ৰ’ল পাম্পত এই ঘটনাটো ঘটে। অভিযুক্ত চালকজনৰ নাম হৰ্ষ বুলি চিনাক্ত কৰা হৈছে যাৰ বয়স প্ৰায় ২২ বছৰ। তেওঁ নিজৰ ক’লা ৰঙৰ মহিন্দ্ৰা থাৰ গাড়ীত ডিজেল ভৰাইছিল কিন্তু পইচা দিয়াৰ সময়ত অনলাইন পেমেণ্ট কৰিম বুলি কৈ হঠাতে তাৰ পৰা পলাই যায়। ইয়াৰ পিছতে পেট্ৰ’ল পাম্পৰ কৰ্মচাৰী কুলদীপ শৰ্মাই বাইকেৰে তেওঁক খেদি যায়।
খেদি যোৱাৰ সময়তে ৰাষ্ট্ৰীয় ঘাইপথ ৯১ত থাৰখনে কুলদীপৰ বাইকখনত তীব্ৰ জোৰে খুন্দা মাৰে। খুন্দা মৰাৰ ফলত বাইকখন গাড়ীখনৰ সন্মুখৰ ফালে আৱদ্ধ হৈ পৰে। কিন্তু চালকজনে গাড়ীখন নৰখাই তেনেদৰেই প্ৰায় ৫ৰ পৰা ৭ কিলোমিটাৰ লৈকে তীব্ৰ গতিত চলাই যায়। ৰাস্তাত ঘঁহনি খোৱাৰ ফলত বাইকখনত জুই লাগি যায় যদিও চালকজনে গাড়ীখন ৰখোৱা নাছিল।
চিচিটিভি ফুটেজত এই ভয়ংকৰ দৃশ্য ধৰা পৰিছে য’ত দেখা গৈছে যে জুই জ্বলি থকা বাইকখন থাৰে টানি লৈ গৈ আছে। আৰক্ষীয়ে খবৰ পোৱাৰ লগে লগে অনুসন্ধান আৰম্ভ কৰে আৰু লুহাৰলী টোল প্লাজাৰ ওচৰত গাড়ীখন জব্দ কৰি হৰ্ষক আটক কৰে।
ইফালে বাইক আৰোহী কুলদীপ শৰ্মা আঘাতপ্ৰাপ্ত হোৱাত তেওঁক চিকিৎসালয়ত ভৰ্তি কৰা হৈছে। আৰক্ষীয়ে জনোৱা মতে চালকজনৰ বিৰুদ্ধে চুৰি, বেপৰুৱা গাড়ী চলোৱা আৰু আনৰ জীৱন বিপদাপন্ন কৰাৰ দৰে গুৰুতৰ ধাৰাত আইনী প্ৰক্ৰিয়া আৰম্ভ কৰা হৈছে।
