মহাৰাষ্ট্ৰ চৰকাৰে শেহতীয়াকৈ কৰ্তব্যত গাফিলতি আৰু অবাধ্যতাৰ অভিযোগত এজন জ্যেষ্ঠ আই এ এছ বিষয়াৰ লগতে আন এজন উচ্চপদস্থ বিষয়াক নিলম্বন কৰিছে। ৰাজ্যিক পৰিৱেশ মন্ত্ৰীৰ এক গুৰুত্বপূৰ্ণ বৈঠকত উপস্থিত নথকাৰ বাবেই চৰকাৰে এই কঠোৰ পদক্ষেপ গ্ৰহণ কৰিছে। নিলম্বিত হোৱা বিষয়াসকলৰ ভিতৰত আছে ২০১১ চনৰ বেচৰ আই এ এছ বিষয়া তথা মহাৰাষ্ট্ৰ প্ৰদূষণ নিয়ন্ত্ৰণ ব’ৰ্ডৰ সদস্য সম্পাদক এম দেৱেন্দ্ৰ সিং আৰু একেটা ব’ৰ্ডৰ যুটীয়া সঞ্চালক সতীশ পাৰভল। এজন মন্ত্ৰীক ৰাজহুৱা দায়বদ্ধতা পালনত বাধা দিয়াৰ বাবে এই পদক্ষেপ লোৱা বুলি চৰকাৰে জানিবলৈ দিছে।
ঘটনাটোৰ সূত্ৰপাত হৈছিল ২৬ ফেব্ৰুৱাৰীত চলি থকা বিধানসভা অধিৱেশনৰ সময়ত। চন্দ্ৰপুৰ জিলাৰ প্ৰদূষণ সম্পৰ্কীয় এটা গুৰুত্বপূৰ্ণ বিষয়ৰ উত্তৰ দিবলৈ পৰিৱেশ মন্ত্ৰী পংকজা মুণ্ডেক কোৱা হৈছিল। সেই সন্দৰ্ভত তথ্য আহৰণ কৰিবলৈ মন্ত্ৰীগৰাকীয়ে সংশ্লিষ্ট বিষয়াসকলক এখন বৈঠকলৈ মাতিছিল। কিন্তু আচৰিত ধৰণে উক্ত বৈঠকত আই এ এছ বিষয়া সিং আৰু যুটীয়া সঞ্চালক পাৰভল উপস্থিত নাথাকিল। কেৱল এয়াই নহয়, বিষয়াগৰাকীয়ে নিজে উপস্থিত নাথাকিব বুলি ওলোটাই বাৰ্তা প্ৰেৰণ কৰিছিল। ইয়াৰ ফলত মন্ত্ৰীগৰাকীয়ে সদনত প্ৰদূষণ সম্পৰ্কীয় সঠিক তথ্য দাঙি ধৰিবলৈ নোৱাৰিলে।
পংকজা মুণ্ডেই এই সমগ্ৰ বিষয়টো বিধানসভাৰ মজিয়াত অৱগত কৰে। তেওঁ অভিযোগ কৰে যে আমোলাসকলৰ এনে আচৰণ আৰু অবাধ্যতাই এজন মন্ত্ৰীক জনসাধাৰণৰ ওচৰত জবাবদিহি হোৱাৰ ক্ষেত্ৰত সমস্যাৰ সৃষ্টি কৰে। এই অভিযোগক অতি গুৰুত্বসহকাৰে লৈ প্ৰ-টেম অধ্যক্ষ দিলীপ লেণ্ডেই বিষয়াসকলৰ অনুপস্থিতিক গুৰুতৰ গাফিলতি আৰু বিধায়িনী দলৰ প্ৰতি অপমান বুলি অভিহিত কৰে। অধ্যক্ষগৰাকীয়ে চৰকাৰক ২৪ ঘণ্টাৰ ভিতৰত ব্যৱস্থা ল’বলৈ নিৰ্দেশ দিয়ে আৰু তাৰ পাছতেই চৰকাৰে দুয়োগৰাকী বিষয়াক চাকৰিৰ পৰা নিলম্বন কৰে।
অৱশ্যে এই ঘটনাই বৰ্তমান ৰাজ্যখনত প্ৰশাসন আৰু বিধায়িনী দলৰ মাজৰ ক্ষমতাৰ যুঁজক লৈ নতুন বিতৰ্কৰ সৃষ্টি কৰিছে। বিধানসভাৰ নিৰ্দেশৰ পাছত চৰকাৰে কোনো আমোলাৰ বিৰুদ্ধে এনেদৰে তৎক্ষণাত ব্যৱস্থা ল’ব পাৰেনে নোৱাৰে তাক লৈও বিভিন্ন মহলত প্ৰশ্ন উঠিছে। মন্ত্ৰীৰ নিৰ্দেশ অমান্য কৰাৰ পৰিণতি যে ভয়ংকৰ হ’ব পাৰে, এই ঘটনাই তাক পুনৰ প্ৰমাণ কৰিছে।
