অসমত দুৰ্ঘটনাগ্ৰস্ত হৈছে বায়ুসেনাৰ যুদ্ধ বিমান ছুখই ৩০! বৃহস্পতিবাৰে সন্ধিয়া ৭:৪২ বজাৰ পিছত বিমানখনৰ সৈতে কোনো ধৰণৰ যোগাযোগ কৰিব পৰা নগ’ল। বায়ুসেনাই জনাইছে যে বিমানখন বিচাৰি উলিয়াবলৈ অনুসন্ধান অব্যাহত আছে।
অৱশ্যে বিমানখন দুৰ্ঘটনাগ্ৰস্ত হোৱা বুলি দাবী কৰিছে স্থানীয় এজন বাসিন্দাই। কিন্তু এতিয়ালৈকে এই সন্দৰ্ভত কোনো ঘোষণা কৰা হোৱা নাই।
জানিব পৰা মতে, যুদ্ধ বিমানখনে যোৰহাটৰ পৰা উৰা মাৰিছিল। কিন্তু সন্ধিয়া ৭:৪২ বজাৰ পিছত ইয়াৰ সৈতে কোনো যোগাযোগ কৰিব পৰা নগ’ল। ৰাডাৰতো কোনো সন্ধান পোৱা নাই। অসমৰ কাৰ্বি আংলং জিলাত বিমানখন দুৰ্ঘটনাগ্ৰস্ত হোৱা বুলি সূত্ৰসমূহে দাবী কৰিছে।
কাৰ্বি আংলঙৰ চকীহোলাৰ অন্তৰ্গত নিলিপৰ ওচৰত পাহাৰীয়া অঞ্চলত বিমানখন ভাঙি পৰাৰ সন্দেহ কৰা হৈছে। স্থানীয় বাসিন্দাই জানিবলৈ দিয়া মতে সন্ধিয়া প্ৰায় ৭ বজাৰ আশেপাশে প্ৰচণ্ড বিস্ফোৰণৰ দৰে শব্দ শুনা যায় আৰু তাৰপিছতে অঞ্চলটোত আতংকৰ সৃষ্টি হয়।
উল্লেখ্য যে ছুখই ৩০ এখন অতি শক্তিশালী, দ্বৈত ইঞ্জিনযুক্ত যুঁজাৰু বিমান। ইয়াত দুজন বহিব পাৰি। ৰাছিয়াৰ ছুখই এভিয়েশন কৰ্পৰেশ্যনে নিৰ্মাণ কৰা এই বিমানখনে আকাশৰ পৰা আকাশলৈ আৰু আকাশৰ পৰা স্থলভাগলৈ নিখুঁত আক্ৰমণ কৰিবলৈ সক্ষম। শক্তিশালী ৰাডাৰ আৰু ইলেক্ট্ৰনিক যুদ্ধ ব্যৱস্থাৰে সজ্জিত এই যুদ্ধ বিমানখনে শক্তিশালী ব্ৰাহ্মছ ছুপাৰছনিক ক্ৰুজ মিছাইল কঢ়িয়াই নিব পাৰে।
ইয়াৰ উপৰিও এই ৰাছিয়াৰ যুদ্ধ বিমানখনে ৰুদ্ৰাম-৩ আৰু অস্ত্ৰ ক্ষেপণাস্ত্ৰ কঢ়িয়াই নিব পৰাকৈও সক্ষম। শব্দৰ দুগুণ বেগেৰে ই উৰিব পাৰে। সেইবাবেই ছুখই ৩০ক বায়ুসেনাৰ অন্যতম শক্তিশালী বাহন হিচাপে গণ্য কৰা হয়। অৱশ্যে এই বিমানখনৰ বিগত সময়ত বহুকেইটা দুৰ্ঘটনা সংঘটিত হৈছে। অসমতো এনেধৰণৰ দুৰ্ঘটনা সংঘটিত হ’ব পাৰে বুলি আশংকা কৰা হৈছে।
