বিগত কেইটামান সপ্তাহ ধৰি গুৱাহাটী মহানগৰীৰ বায়ু প্ৰদূষণে এক ভয়ংকৰ ৰূপ ধাৰণ কৰিছে। আনকি মহানগৰখনৰ বায়ুৰ গুণাগুণ সূচাংকই দেশৰ ৰাজধানী দিল্লীকো অতিক্ৰম কৰা পৰিলক্ষিত হৈছে। ইমান এটা গুৰুতৰ সমস্যাই জনসাধাৰণৰ মাজত যিমান চৰ্চা লাভ কৰিব লাগিছিল, সেই অনুপাতে সচেতনতা গঢ়ি উঠা দেখা যোৱা নাই। চৰকাৰী পক্ষৰ পৰাও এই ক্ষেত্ৰত এক প্ৰকাৰৰ উদাসীনতাহে প্ৰকাশ পাইছে। এনে এক জটিল সময়ত গুৱাহাটীৰ সচেতন নাগৰিকসকলৰ তৎপৰতাত নতুনকৈ গঠন হোৱা ধৰিত্ৰী সুৰক্ষা মঞ্চ, অসম নামৰ অনুষ্ঠানটোৱে এক বিশেষ পদক্ষেপ গ্ৰহণ কৰিছে।
পৰিবেশৰ সুৰক্ষা আৰু জনস্বাস্থ্যৰ প্ৰতি লক্ষ্য ৰাখি ধৰিত্ৰী সুৰক্ষা মঞ্চৰ উদ্যোগত অহা কাইলৈ অৰ্থাৎ ৮ মাৰ্চ, দেওবাৰে গুৱাহাটীৰ প্ৰদূষণক লৈ এখন বিশেষ আলোচনা তথা বক্তৃতানুষ্ঠানৰ আয়োজন কৰা হৈছে। এই অনুষ্ঠানটো কটন বিশ্ববিদ্যালয়ৰ এলামনাই হলত বিয়লি ৪ বজাত অনুষ্ঠিত হ’ব। মহানগৰীৰ প্ৰদূষণ আৰু ইয়াৰ ভয়াবহতাৰ বিষয়ে ৰাইজক অৱগত কৰাই এই অনুষ্ঠানৰ মূল উদ্দেশ্য।
এই বক্তৃতানুষ্ঠানত কটন বিশ্ববিদ্যালয়ৰ সহযোগী অধ্যাপক ড০ ৰাহুল মহন্তই উত্তৰ-পূৰ্বাঞ্চলত জলবায়ু পৰিবৰ্তন আৰু প্ৰদূষণৰ মাজত থকা সম্পৰ্ক তথা ইয়াৰ মোকাবিলা কৰাৰ উপায় সন্দৰ্ভত বক্তব্য আগবঢ়াব। একেদৰে বি বৰুৱা মহাবিদ্যালয়ৰ সহযোগী অধ্যাপক ড০ বিজয় শংকৰ গোস্বামীয়ে গুৱাহাটীৰ বায়ু প্ৰদূষণৰ প্ৰকৃত কাৰণ আৰু ইয়াৰ নিয়ন্ত্ৰণৰ উপায়সমূহ আলোচনা কৰিব। ইয়াৰ উপৰি গুৱাহাটী চিকিৎসা মহাবিদ্যালয়ৰ সহকাৰী অধ্যাপক ডাঃ নিৰ্বাণ বৈশ্যই বায়ু প্ৰদূষণে মানৱ স্বাস্থ্যৰ ওপৰত কেনেধৰণৰ বিৰূপ প্ৰভাৱ পেলাব পাৰে, সেই বিষয়ে সবিস্তাৰে বৰ্ণনা কৰিব।
ধৰিত্ৰী সুৰক্ষা মঞ্চ, অসমৰ মুখ্য আহ্বায়ক মহেশ ডেকাৰ লগতে আহ্বায়ক উৎপলা দাস আৰু আকাশ দাসে এই গুৰুত্বপূৰ্ণ অনুষ্ঠানটোত মহানগৰীৰ প্ৰতিগৰাকী সচেতন নাগৰিকক উপস্থিত থাকিবলৈ তথা সক্ৰিয় অংশগ্ৰহণ কৰিবলৈ বিনম্ৰ অনুৰোধ জনাইছে। গুৱাহাটীৰ ভৱিষ্যত সুৰক্ষিত কৰাৰ স্বাৰ্থত এনে বৌদ্ধিক আলোচনাৰ প্ৰয়োজনীয়তা অতিকে বেছি বুলি উদ্যোক্তাসকলে মত পোষণ কৰিছে।
