এলাহাবাদ উচ্চ ন্যায়ালয়ে বাৰেলীৰ বাসিন্দা হাছিন খান নামৰ এজন ব্যক্তিক তেওঁৰ ব্যক্তিগত ঘৰত নামাজ পঢ়িবলৈ বাধা প্ৰদান কৰা ঘটনাক লৈ গুৰুত্বপূৰ্ণ নিৰ্দেশ দিছে। বুধবাৰে ন্যায়াধীশ অতুল শ্ৰীধৰণ আৰু ন্যায়াধীশ সিদ্ধাৰ্থ নন্দনক লৈ গঠিত বিচাৰপীঠে ৰাজ্য চৰকাৰক হাছিন খানক দুজন সশস্ত্ৰ নিৰাপত্তাৰক্ষী প্ৰদান কৰিবলৈ নিৰ্দেশ দিয়ে। আদালতৰ নিৰ্দেশ অনুসৰি এই নিৰাপত্তাৰক্ষীসকলে হাছিন খান য’তেই নাযাওক কিয়, তেওঁৰ লগত থাকিব লাগিব। আদালতে স্পষ্ট কৰি দিছে যে যদি হাছিন খান বা তেওঁৰ সম্পত্তিৰ ওপৰত কোনো ধৰণৰ হিংসাত্মক কাৰ্য সংঘটিত হয়, তেন্তে তাৰ বাবে ৰাজ্য চৰকাৰেই জবাবদিহি হ’ব লাগিব।
হাছিন খানে অভিযোগ কৰিছিল যে তেওঁ নিজৰ ঘৰৰ ভিতৰতে পৰিয়ালৰ সৈতে নামাজ পঢ়ি থকা অৱস্থাত আৰক্ষীয়ে তেওঁক আটক কৰিছিল আৰু জৰিমনা বিহিছিল। তেওঁ লগতে অভিযোগ কৰে যে গাঁৱৰ প্ৰধান আৰু একাংশ লোকে তেওঁক বুলডজাৰ ব্যৱহাৰ কৰি ঘৰ ভাঙি পেলোৱাৰ ভাবুকি দিছিল আৰু নিৰক্ষৰ হোৱাৰ সুযোগ লৈ খালী কাগজত তেওঁৰ বুঢ়া আঙুলিৰ ছাপ লৈছিল। ইয়াৰ পূৰ্বে ৰাজ্য চৰকাৰে আদালতত স্বীকাৰ কৰিছিল যে সংবিধানৰ ২৫ নং অনুচ্ছেদৰ অধীনত কোনো ব্যক্তিয়ে নিজৰ ঘৰৰ ভিতৰত নামাজ পঢ়িবলৈ বিশেষ অনুমতিৰ প্ৰয়োজন নহয়, তথাপিও আৰক্ষীয়ে তেওঁক হাৰাশাস্তি কৰা বুলি অভিযোগ উত্থাপন হৈছে।
এই সমগ্ৰ বিষয়টোত আদালত অত্যন্ত ক্ষুব্ধ হৈ পৰিছে। হাছিন খানে নিজৰ আৰু পৰিয়ালৰ সুৰক্ষা বিচাৰি আদালতৰ কাষ চপাৰ পিছতে এই নিৰ্দেশনা জাৰি কৰা হয়। ইয়াৰ উপৰিও আদালতে এই গোচৰৰ সৈতে জড়িত জিলা দণ্ডাধীশ অবিনাশ সিং আৰু জ্যেষ্ঠ আৰক্ষী অধীক্ষক অনুৰাগ আৰিয়াক অহা ২৩ মাৰ্চত আদালতত হাজিৰ হ’বলৈ চমন জাৰি কৰিছে। এই ঘটনাই ৰাজ্যখনত ব্যাপক চৰ্চা লাভ কৰিছে আৰু ন্যায়ালয়ৰ এই কঠোৰ পদক্ষেপে গুৰুত্বপূৰ্ণ প্ৰতিক্ৰিয়াৰ সৃষ্টি কৰিছে।
