মধ্যপ্ৰদেশৰ ইন্দোৰ চহৰৰ ব্ৰজেশ্বৰী এনেক্স অঞ্চলৰ এটা বাসগৃহত ভয়ংকৰ অগ্নিকাণ্ড সংঘটিত হৈছে। বুধবাৰে পুৱতি নিশা ঘৰৰ অগ্নিকাণ্ডটোত একেটা পৰিয়ালৰ ৭ জন সদস্য জীৱন্তে অগ্নিদগ্ধ হৈ মৃত্যুক সাৱটি লয়। আন তিনিজন গুৰুতৰভাৱে আহত হয়।
এই ঘটনাটোৱে অঞ্চলজুৰি এক বৃহৎ চাঞ্চল্যৰ সৃষ্টি কৰিছে। প্ৰাথমিক অনুমান অনুসৰি ঘৰৰ সন্মুখত ৰখা বৈদ্যুতিক বাহনৰ বেটাৰী চাৰ্জ কৰি থকাৰ সময়তে বিস্ফোৰণ হোৱাত এই দুৰ্ঘটনা সংঘটিত হয়।
বাতৰিৰ সূত্ৰ অনুসৰি ঘৰৰ সন্মুখত এখন বৈদ্যুতিক বাহন ৰখা হৈছিল। ইয়াক চাৰ্জত ৰখা আছিল। শ্বৰ্ট চাৰ্কিট বা বেটাৰী ফাটি যোৱাৰ ফলত গাড়ীখনত জুই লাগিছিল। দ্ৰুতগতিত বিয়পি পৰা জুই ক্ষন্তেকতে ঘৰখনলৈ বিয়পি পৰে।
প্ৰথমে ঘৰৰ সন্মুখত অৰ্থাৎ প্ৰৱেশদ্বাৰত অগ্নিকাণ্ড সংঘটিত হয়। জুই ইমান সোনকালে বিয়পি পৰে যে পৰিয়ালৰ লোকে ওলাই অহাৰ সুযোগ নোপোৱাত ঘৰৰ ভিতৰতে আবদ্ধ হৈ পৰে। তাতে ৭ জন জীৱন্তে অগ্নিদগ্ধ হৈ মৃত্যুমুখত পৰে। আন তিনিজন লোক গুৰুতৰভাৱে আহত হয়। তেওঁলোক সংকটজনক অৱস্থাত চিকিৎসাধীন হৈ আছে।
আৰক্ষীৰ মতে, বাহিৰত যিখন গাড়ীৰ পৰা অগ্নিকাণ্ড সংঘটিত হৈছিল, সেইখন গাড়ী আছিল বৈদ্যুতিক গাড়ী। নিশা গাড়ীখনত চাৰ্জ দিয়া হৈছিল। কেনেবাকৈ শ্বৰ্ট চাৰ্কিটৰ ফলত গাড়ীত জুই লাগে। তাৰ পৰাই গোটেই ঘৰখনলৈ বিয়পি পৰিল।
ঘৰৰ ভিতৰত কমেও ১০টা গেছ চিলিণ্ডাৰ বিস্ফোৰণ হোৱাৰ ফলত জুই আৰু অধিক ধ্বংসাত্মক হৈ পৰে। প্ৰশাসনৰ তথ্য অনুসৰি এই পৰ্যন্ত ঘৰৰ দুটা মহলাৰ পৰা ৭ টা মৃতদেহ উদ্ধাৰ কৰা হৈছে। অগ্নিনিৰ্বাপক বাহিনী আৰু এটা মহলাত উপস্থিত হৈছে।
স্থানীয় লোকে জনোৱা মতে, ঘন অঞ্চলৰ বাবে অগ্নিনিৰ্বাপক বাহিনীয়ে দুৰ্ঘটনাস্থলীত উপস্থিত হ’বলৈ যথেষ্ট কষ্ট কৰিবলগীয়া হৈছিল। অগ্নিনিৰ্বাপক বাহিনী অহাৰ পূৰ্বে স্থানীয় ৰাইজে ৩ জন লোকক উদ্ধাৰ কৰে।
