অসমীয়া জীয়ৰীয়ে কবিতা লিখিলে জেলত দিয়ে, আপত্তিজনক কথা কোৱা আজমলৰ বিৰুদ্ধে ব্যৱস্থা গ্ৰহণ নকৰে বিজেপি চৰকাৰেঃ গৌৰৱ গগৈ এআইইউডিএফ প্ৰধান বদৰুদ্দিন আজমলৰ শেহতীয়া বিতৰ্কিত মন্তব্যক লৈ ৰাজ্যৰ ৰাজনীতি বৰ্তমান উত্তাল হৈ পৰিছে। এই সন্দৰ্ভত শুকুৰবাৰে ৰাজ্য চৰকাৰ আৰু বিশেষকৈ মুখ্যমন্ত্ৰী ড° হিমন্ত বিশ্ব শৰ্মাক তীব্ৰ সমালোচনা কৰে অসম প্ৰদেশ কংগ্ৰেছ কমিটীৰ সভাপতি গৌৰৱ গগৈয়ে। উজনি অসমৰ মাহমৰা সমষ্টিত বিৰোধী ঐক্যৰ প্ৰাৰ্থী জ্ঞানদ্বীপ মহনৰ হৈ নিৰ্বাচনী প্ৰচাৰ চলাই গগৈয়ে অভিযোগ উত্থাপন কৰে যে সাধাৰণ অসমীয়া জীয়ৰীয়ে ফেচবুকত কবিতা লিখিলে বা সাংবাদিকে দুৰ্নীতিৰ বিৰুদ্ধে মাত মাতিলে জেললৈ নিক্ষেপ কৰা বিজেপি চৰকাৰে আজমলৰ দৰে নেতাৰ আপত্তিজনক মন্তব্যৰ সন্মুখত ৰহস্যজনকভাৱে নিমাত ভূমিকা পালন কৰিছে।
উল্লেখ্য যে, এদিন পূৰ্বে বদৰুদ্দিন আজমলে অসমত ‘মিঞাৰ দাদাগিৰি’ চলিব বুলি কোৱাৰ লগতে মুখ্যমন্ত্ৰীৰ বিৰুদ্ধে তীব্ৰ আপত্তিজনক মন্তব্য প্ৰকাশ কৰিছিল। এই প্ৰসংগ টানি আনি গৌৰৱ গগৈয়ে প্ৰশ্ন কৰে যে এগৰাকী নিৰ্বাচিত মুখ্যমন্ত্ৰীৰ কামিহাড় ভাঙিম বুলি হুংকাৰ দিয়াৰ পাছতো কেন্দ্ৰীয় গৃহমন্ত্ৰী আৰু ৰাজ্য চৰকাৰে কিয় কোনো ব্যৱস্থা গ্ৰহণ কৰা নাই। গগৈয়ে কটাক্ষ কৰি কয় যে চৰকাৰে আজমলৰ বিৰুদ্ধে কঠোৰ পদক্ষেপ নোলোৱাৰ মূল কাৰণ হৈছে আজমল মুখ্যমন্ত্ৰীৰ ‘লাইফলাইন ১০৮’। তেওঁৰ মতে, আগন্তুক নিৰ্বাচনত বিজেপি চৰকাৰৰ পতন নিশ্চিত হোৱা দেখি মুখ্যমন্ত্ৰীয়ে বিপদত পৰি আজমল আৰু আছাদুদ্দিন ওৱেছিক উদ্ধাৰৰ বাবে অসমলৈ মাতি আনিছে।বিজেপি চৰকাৰৰ স্থিতিৰ কঠোৰ সমালোচনা কৰি কংগ্ৰেছৰ ৰাজ্যিক সভাপতিগৰাকীয়ে দাবী কৰে যে হিমন্ত বিশ্ব শৰ্মাই প্ৰকৃততে মিঞা ৰাজনীতিহে কৰি আছে। যদি মুখ্যমন্ত্ৰীয়ে সঁচাকৈয়ে মিঞা ৰাজনীতিক বিৰোধ কৰে, তেন্তে ৰাজ্যসভাৰ নিৰ্বাচনত তেওঁক এআইইউডিএফৰ ভোটৰ কিয় প্ৰয়োজন হৈছিল বুলিও গগৈয়ে প্ৰশ্ন উত্থাপন কৰে। লগতে তেওঁ অভিযোগ কৰে যে বৰ্তমান অসম গণ পৰিষদৰ নিজৰ কোনো মানুহ নাই, বৰঞ্চ এআইইউডিএফৰ একাংশ নেতাইহে মিত্ৰজোঁটৰ অংশীদাৰ দলটোত প্ৰৱেশ কৰিছে। মুখ্যমন্ত্ৰীয়ে দুই নাঁৱত দুই ভৰি দি ৰাজনীতি কৰা বুলিও তেওঁ মন্তব্য কৰে।ৰাজ্যৰ আৰক্ষী প্ৰশাসনৰ ভূমিকাক লৈও সৰৱ হৈ পৰে গৌৰৱ গগৈ। তেওঁ আক্ষেপ প্ৰকাশ কৰে যে কংগ্ৰেছৰ কোনো সভা বা প্ৰতিবাদী কাৰ্যসূচী হ’লেই আৰক্ষীয়ে তৎপৰতা দেখুৱায়, কিন্তু আজমলৰ দৰে নেতাই মুকলিকৈ আপত্তিজনক মন্তব্য কৰাৰ পাছতো ৰাজ্যৰ গৃহ বিভাগ তথা আৰক্ষী নীৰৱ দৰ্শক হৈ ৰৈছে। এই সমগ্ৰ পৰিস্থিতি আৰু বিজেপিৰ দুমুখীয়া চৰিত্ৰক ৰাজ্যবাসীয়ে স্পষ্টকৈ বুজি পোৱা বুলি দাবী কৰি গগৈয়ে আগন্তুক নিৰ্বাচনত বিৰোধী ঐক্যৰ প্ৰাৰ্থীগৰাকীক বিপুল ভোটত জয়যুক্ত কৰি এখন নতুন বৰ অসম নিৰ্মাণৰ যাত্ৰাত অংশীদাৰ হ’বলৈ ৰাইজৰ প্ৰতি আহ্বান জনায়।
