আমেৰিকা যুক্তৰাষ্ট্ৰৰ মহাকাশ গৱেষণা সংস্থা নাছাই চাৰিগৰাকী মহাকাশচাৰীক লৈ ‘আৰ্টেমিছ-২’ নামৰ এক ঐতিহাসিক মহাকাশ অভিযানৰ সফল উৎক্ষেপণ কৰিছে। ১৯৭২ চনৰ ‘এপ’লো ১৭’ অভিযানৰ ৫৪ বছৰৰ পাছত প্ৰথমবাৰৰ বাবে মানৱজাতিয়ে পুনৰ চন্দ্ৰৰ দিশে যাত্ৰা আৰম্ভ কৰিছে। ভৱিষ্যতৰ চন্দ্ৰ অন্বেষণ আৰু তাত মানুহৰ দীৰ্ঘম্যাদী উপস্থিতিৰ পথ প্ৰশস্ত কৰাৰ লগতে প্ৰয়োজনীয় যন্ত্ৰপাতিৰ পৰীক্ষণ কৰাৰ উদ্দেশ্যে এই ১০ দিনীয়া অভিযান আৰম্ভ কৰিছে।
স্পেচ লঞ্চ ছিষ্টেম ৰকেট আৰু অৰিয়ন মহাকাশযানৰ জৰিয়তে উৎক্ষেপণ কৰা এই অভিযানত তিনিগৰাকী পুৰুষ আৰু এগৰাকী মহিলা মহাকাশচাৰী অন্তৰ্ভুক্ত আছে। এই দলটোত আছে নাছাৰ মহাকাশচাৰী ক্ৰমে কমাণ্ডাৰ ৰিড ৱাইজমেন, পাইলট ভিক্টৰ গ্লোভাৰ আৰু মিছন স্পেচিয়েলিষ্ট ক্ৰিষ্টিনা ক’চ। তেওঁলোকৰ সৈতে কানাডাৰ মহাকাশচাৰী জেৰেমি হানচেনেও মিছন স্পেচিয়েলিষ্ট হিচাপে যাত্ৰা কৰিছে। এই অভিযানৰ জৰিয়তে মহাকাশচাৰীসকলে পৃথিৱীৰ নিম্ন কক্ষপথ অতিক্ৰম কৰি চন্দ্ৰৰ কাষেৰে পাৰ হৈ যাব আৰু এক নিৰ্দিষ্ট কক্ষপথ অনুসৰণ কৰি পৃথিৱীলৈ উভতি আহিব। এই যাত্ৰাপথত মহাকাশযানখনে পৃথিৱীৰ পৰা সৰ্বাধিক ২ লাখ ৩০ হাজাৰ মাইল দূৰত্ব অতিক্ৰম কৰিব।
উল্লেখ্য যে ২০২২ চনৰ নৱেম্বৰত সম্পন্ন হোৱা ‘আৰ্টেমিছ-১’ অভিযানৰ সফলতাৰ ভেটিত এই নতুন অভিযানটো পৰিচালনা কৰা হৈছে। এই অভিযানৰ মূল লক্ষ্য হৈছে গভীৰ মহাকাশ অভিযান আৰু চন্দ্ৰপৃষ্ঠত অৱতৰণৰ বাবে প্ৰয়োজনীয় প্ৰযুক্তি তথা যন্ত্ৰাংশৰ পৰীক্ষণ কৰা। ইয়াৰ লগতে মহাকাশে মানৱ শৰীৰত কেনে প্ৰভাৱ পেলায়, তাৰো অধ্যয়ন কৰা হ’ব। বিজ্ঞানীসকলে যাত্ৰাৰ পূৰ্বে আৰু যাত্ৰাৰ অন্তত মহাকাশচাৰীসকলৰ তেজৰ পৰা ‘অৰ্গেনইডছ’ নামৰ কলাৰ নমুনা সংগ্ৰহ কৰি গৱেষণা চলাব।
সম্পূৰ্ণ ১০ দিনীয়া এই অভিযানৰ সময়ছোৱাত চন্দ্ৰৰ মধ্যাকৰ্ষণ শক্তি ব্যৱহাৰ কৰি মহাকাশযানখনে এক বিশেষ কৌশলৰ মাজেৰে পৃথিৱীৰ দিশে উভতি আহিব। পৃথিৱীলৈ উভতি অহাৰ এই যাত্ৰা চাৰি দিনৰ হ‘ব। পৃথিৱীৰ বায়ুমণ্ডলত প্ৰৱেশ কৰাৰ পাছত পেৰাছুটৰ সহায়ত কেলিফৰ্ণিয়াৰ উপকূলত মহাকাশযানখনৰ মূল যাত্ৰীবাহী অংশটোৱে (ক্ৰিউ মডিউল) অৱতৰণ কৰিব। উল্লেখযোগ্য যে নাছাই এইবাৰ মহাকাশচাৰীসকলক স্মাৰ্টফোন নিয়াৰ অনুমতি প্ৰদান কৰিছে, যাৰ ফলত তেওঁলোকে অধিক স্বাধীনভাৱে আলোকচিত্ৰ আৰু ভিডিঅ’ গ্ৰহণ কৰিব পাৰিব। সমগ্ৰ বিশ্বৰ জনসাধাৰণে নাছাৰ ৱেবছাইটত উপলব্ধ এক বিশেষ সঁজুলিৰ জৰিয়তে এই অভিযানৰ পোনপটীয়া নিৰীক্ষণ কৰিব পাৰিব।
