আগন্তুক নিৰ্বাচনক কেন্দ্ৰ কৰি ৰাজ্যত পুনৰ মেৰুকৰণৰ ৰাজনীতি আৰম্ভ হোৱা বুলি গভীৰ উদ্বেগ প্ৰকাশ কৰিছে অসমৰ একাংশ বুদ্ধিজীৱী আৰু সমাজকৰ্মীয়ে। গুৱাহাটী প্ৰেছ ক্লাবত ‘অসম চিভিল ছ’চাইটী’ৰ উদ্যোগত আয়োজিত এখন সংবাদ মেলত মুখ্যমন্ত্ৰী ড° হিমন্ত বিশ্ব শৰ্মা, এ আই ইউ ডি এফ প্ৰধান বদৰুদ্দিন আজমল আৰু এ আই এম আই এমৰ নেতা আছাউদ্দিন ওৱেইছিক তীব্ৰ সমালোচনা কৰা হয়। সমাজকৰ্মীসকলে অভিযোগ কৰে যে নিৰ্বাচনী বৈতৰণী পাৰ হোৱাৰ স্বাৰ্থত ৰাজ্যখনত ধৰ্মীয় বিভাজনৰ এক সুপৰিকল্পিত প্ৰচেষ্টা অব্যাহত আছে।
সংগঠনটোৱে অভিযোগ উত্থাপন কৰে যে মুখ্যমন্ত্ৰী হিমন্ত বিশ্ব শৰ্মাই ধৰ্মৰ নামত মেৰুকৰণৰ যি আওপুৰণি খেল খেলিছে, তাত পৰোক্ষভাৱে সহায় কৰিবলৈ আগবাঢ়ি আহিছে সাংসদ বদৰুদ্দিন আজমল। অসমৰ ঐতিহ্য আৰু সংস্কৃতিৰ বিষয়ে সামান্যতমো জ্ঞান নথকা নেতা আছাউদ্দিন ওৱেইছিক অসমলৈ আমদানি কৰি আজমলে শাসকীয় দলৰ সাম্প্ৰদায়িক ৰাজনীতিত সাৰপানী যোগোৱা বুলি বুদ্ধিজীৱীসকলে দাবী কৰে। তেওঁলোকে লগতে অভিযোগ কৰে যে মুখ্যমন্ত্ৰী শৰ্মা আৰু ওৱেইছিৰ বক্তব্যৰ সুৰ একেডাল সূতাৰে গঁঠা। দুয়োগৰাকী নেতাই মুছলমান মুখ্যমন্ত্ৰীৰ প্ৰসংগ উত্থাপন কৰি ৰাজ্যবাসীক শংকিত কৰাৰ প্ৰয়াস কৰিছে বুলি তেওঁলোকে ক্ষোভ প্ৰকাশ কৰে। নিৰ্বাচনৰ দৰে স্পৰ্শকাতৰ সময়ত এনে নেতাক অসমলৈ অনাৰ বাবে চিভিল ছ’চাইটীয়ে আজমলক কঠোৰ গৰিহণা জনোৱাৰ লগতে ওৱেইছিক অসমত সাম্প্ৰদায়িক প্ৰচাৰ চলাই চৰকাৰৰ এজেণ্ডা বাস্তৱায়িত নকৰিবলৈ সকীয়াই দিয়ে।
অসমৰ ধৰ্মীয় সংখ্যালঘুসকলৰ সুৰক্ষা সন্দৰ্ভত স্থিতি স্পষ্ট কৰি সমাজকৰ্মীসকলে কয় যে যিকোনো সংকটৰ সময়ত ৰাজ্যখনৰ ধৰ্মনিৰপেক্ষ আৰু গণতান্ত্ৰিক জনসাধাৰণেই নিৰ্ভীকভাৱে থিয় দি আহিছে, আৰু সেই সময়ত আজমল বা ওৱেইছিক কাষত পোৱা নগৈছিল। সংখ্যালঘুসকলক সংখ্যাগুৰুৰ পৰা পৃথক কৰাৰ যিকোনো অসৎ প্ৰচেষ্টাক অসমৰ উদাৰ সমাজখনে দৃঢ়তাৰে প্ৰতিহত কৰিব বুলি তেওঁলোকে প্ৰকাশ কৰে। আনহাতে, সংবাদ মেলত শেহতীয়াকৈ মধ্য গুৱাহাটী সমষ্টিৰ অসম জাতীয় পৰিষদৰ প্ৰাৰ্থী কুংকি চৌধুৰী আৰু তেওঁৰ পৰিয়ালৰ বিৰুদ্ধে মুখ্যমন্ত্ৰীয়ে কৰা মন্তব্যকো তীব্ৰ ভাষাৰে গৰিহণা দিয়ে। হতাশাৰ বশৱৰ্তী হৈ মুখ্যমন্ত্ৰীগৰাকীয়ে এনে নিম্ন ৰুচিকৰ অপপ্ৰচাৰ চলোৱা বুলি দাবী কৰি অসমৰ ঐতিহ্যময় ৰাজনৈতিক সংস্কৃতিক কলুষিত নকৰিবলৈ তেওঁলৈ আহ্বান জনায়। তদুপৰি, সকলো ধৰণৰ ভয়-ভাবুকি, প্ৰৰোচনা আৰু প্ৰলোভন নেওচি অহা ৯ এপ্ৰিলত নিজৰ ভোটাধিকাৰ সাব্যস্ত কৰিবলৈ অসম চিভিল ছ’চাইটীয়ে ৰাইজক আহ্বান জনাইছে।
