মহিলা সংৰক্ষণ আৰু সমষ্টি পুনৰ্নিৰ্ধাৰণ বিধেয়কৰ প্ৰস্তাৱিত সাংবিধানিক সংশোধনীক লৈ তীব্ৰ উদ্বেগ প্ৰকাশ কৰিছে বাওঁপন্থী দলসমূহে। মঙলবাৰে বাওঁপন্থী নেতাসকলে সতৰ্ক কৰি দিয়ে যে এই বিধেয়কসমূহে ভাৰতৰ যুক্তৰাষ্ট্ৰীয় গাঁথনি আৰু ৰাজনৈতিক ভাৰসাম্যৰ প্ৰতি তীব্ৰ ভাবুকি কঢ়িয়াই আনিব পাৰে। ১৬ৰ পৰা ১৮ এপ্ৰিললৈ অনুষ্ঠিত হ’বলগীয়া সংসদৰ বিশেষ অধিৱেশনত এই বিধেয়কসমূহ উত্থাপন হোৱাৰ পূৰ্বেই বিৰোধীয়ে ইয়াক দেশৰ যুক্তৰাষ্ট্ৰীয় ব্যৱস্থাৰ বাবে ‘ডেথ ৱাৰেণ্ট’ বা মৃত্যু পৰোৱানা বুলি অভিহিত কৰিছে।
ভাৰতীয় কমিউনিষ্ট পাৰ্টি (মাৰ্ক্সবাদী)ৰ ৰাজ্যসভাৰ নেতা জন ব্ৰিটাছে সামাজিক মাধ্যম ‘এক্স’ যোগে এই সন্দৰ্ভত প্ৰতিক্ৰিয়া ব্যক্ত কৰি কয় যে, “মহিলা সংৰক্ষণ ৰূপায়ণৰ নামত উত্থাপন কৰা এই বিধেয়কসমূহ যুক্তৰাষ্ট্ৰীয় ভাৰতৰ বাবে এক মৃত্যু পৰোৱানা।” তেওঁ বিশেষকৈ সমষ্টি পুনৰ্নিৰ্ধাৰণ প্ৰক্ৰিয়াক লৈ গভীৰ আশংকা প্ৰকাশ কৰে। ব্ৰিটাছৰ মতে, এই প্ৰক্ৰিয়াই জনসংখ্যা নিয়ন্ত্ৰণৰ ক্ষেত্ৰত সফল হোৱা দক্ষিণ ভাৰতৰ ৰাজ্যসমূহৰ ৰাজনৈতিক প্ৰতিনিধিত্ব বহু পৰিমাণে হ্ৰাস কৰিব। চৰকাৰে এই গুৰুত্বপূৰ্ণ সাংবিধানিক সংশোধনীসমূহৰ পূৰ্বে বিৰোধীৰ লগত বিতং আলোচনা কৰাৰ দাবী পোনছাটেই নাকচ কৰা বুলিও তেওঁ অভিযোগ উত্থাপন কৰে।
ব্ৰিটাছে দাবী কৰে যে যদিহে ১৯৭১ চনৰ লোকপিয়লৰ পৰিৱৰ্তে ২০১১ চনৰ লোকপিয়লৰ ভিত্তিত সমষ্টি পুনৰ্নিৰ্ধাৰণ কৰা হয়, তেন্তে উত্তৰ ভাৰতৰ ৰাজ্যসমূহত আসনৰ সংখ্যা অস্বাভাৱিকভাৱে বৃদ্ধি পাব। ইয়াৰ ফলত দক্ষিণ ভাৰতৰ প্ৰতিনিধিত্ব সংকুচিত হ’ব, যাক তেওঁ “দক্ষিণ ভাৰতক উত্তৰৰ এক ৰাজনৈতিক উপনিবেশলৈ ৰূপান্তৰিত কৰাৰ এক চতুৰ কৌশল” বুলি কঠোৰ সমালোচনা কৰে। আনকি চৰকাৰে সকলো ৰাজ্যতে সমানুপাতিকভাৱে আসন বৃদ্ধি কৰাৰ প্ৰতিশ্ৰুতি দিলেও ই যুক্তৰাষ্ট্ৰীয় ভাৰসাম্য বিনষ্ট কৰিব বুলি তেওঁ মত প্ৰকাশ কৰে।
আনহাতে, ভাৰতীয় কমিউনিষ্ট পাৰ্টি (মাৰ্ক্সবাদী-লেনিনবাদী) লিবাৰেচনৰ সাধাৰণ সম্পাদক দীপংকৰ ভট্টাচাৰ্যই প্ৰস্তাৱিত বিধেয়কখনৰ কিছুমান দিশৰ প্ৰতি আঙুলিয়াই দিয়ে। তেওঁ উল্লেখ কৰে যে ১৩১ সংখ্যক সংশোধনী বিধেয়কত কেন্দ্ৰীয় শাসিত অঞ্চলৰ পৰা ৩৫ গৰাকী সাংসদৰ ব্যৱস্থা কৰা হৈছে, যিটো বৰ্তমানৰ ১৯ গৰাকী সাংসদৰ তুলনাত প্ৰায় দুগুণ। এই বৃদ্ধিয়ে বিহাৰ আৰু পশ্চিমবংগ বিভাজন কৰি নতুন কেন্দ্ৰীয় শাসিত অঞ্চল গঠন কৰাৰ ইংগিত বহন কৰিছে নেকি বুলি তেওঁ প্ৰশ্ন উত্থাপন কৰে।
উল্লেখ্য যে, ২০২৯ চনৰ নিৰ্বাচনৰ পূৰ্বে ‘নাৰী শক্তি বন্দন অধিনিয়ম’ চমুকৈ মহিলা সংৰক্ষণ আইন কাৰ্যকৰী কৰাৰ উদ্দেশ্যৰে চৰকাৰে সংসদৰ বাজেট অধিৱেশন সম্প্ৰসাৰণ কৰি এখন বিশেষ অধিৱেশন আহ্বান কৰিছে। বৃহস্পতিবাৰে চৰকাৰে লোকসভাত সাংবিধানিক সংশোধনী বিধেয়ক, সমষ্টি পুনৰ্নিৰ্ধাৰণ বিধেয়ক আৰু দিল্লী, জম্মু-কাশ্মীৰ তথা পুডুচেৰীৰ দৰে বিধানসভা থকা কেন্দ্ৰীয় শাসিত অঞ্চলসমূহৰ বাবে আন এখন বিধেয়ক উত্থাপন কৰাৰ পৰিকল্পনা কৰিছে।
