গুৱাহাটীৰ ভঙাগড়ৰ জি এছ ৰোডৰ ৰুদ্ৰাক্ষ মলত অৱস্থিত ডি টিপ্সি গাওঁ (এক্স’ৰ’) নামৰ বাৰ-কাম-ৰেষ্টুৰেণ্টৰ অনুজ্ঞাপত্ৰ নিলম্বন কৰা হৈছে। মহানগৰীত সংঘটিত ভয়ংক পথ দুৰ্ঘটনাৰ তিনিগৰাকী যুৱতীৰ মৃত্যুৰ ঘটনাৰ সৈতে নাম সাঙোৰ খাই পৰিছিল উক্ত বাৰখনৰ।
চৰকাৰী তথ্য অনুসৰি অনুজ্ঞাপত্ৰৰ চৰ্ত অনুসৰি নিশা ১২:৩০ বজালৈকেহে প্ৰতিষ্ঠানটোক সুৰা পৰিবেশন কৰিবলৈ অনুমতি প্ৰদান কৰিছিল। কিন্তু গুৱাহাটীৰ উপ-আৰক্ষী আয়ুক্ত (যান-বাহন)য়ে দাখিল কৰা প্ৰতিবেদনত ২৬ এপ্ৰিলত গেট হাস্পতালৰ সমীপৰ মঠঘৰীয়াত সংঘটিত দুৰ্ঘটনাত চিনাক্ত হোৱা চাৰিজন ব্যক্তিয়ে ৰেষ্টুৰেণ্টখনলৈ আহিছিল আৰু পুৱতি নিশা প্ৰায় ৩ বজাত চৌহদৰ পৰা ওলোৱাৰ পূৰ্বে সুৰা সেৱন কৰিছিল বুলি সদৰী কৰিছে।
এই প্রতিবেদনৰ ভিত্তিত আবকাৰী বিভাগে কামৰূপ (মেট্ৰ’)ৰ আবকাৰী অধীক্ষকৰ পৰা স্পষ্টীকৰণ বিচাৰিছিল৷ পৰৱৰ্তী সময়ত কৰা এক তদন্তত নিশ্চিত কৰা হৈছে যে, নিৰ্ধাৰিত অনুজ্ঞাপত্ৰৰ চৰ্তসমূহৰ লগতে অসম আবকাৰী নিয়ম, ২০১৬ৰ নিয়ম ১২৭(১) উলংঘা কৰি চৌহদটো অনুমোদিত সময়ৰ পাছতো খোলা ৰখা হৈছিল।
চৰকাৰী নিৰ্দশত কোৱা হৈছে,“উপৰোক্ত কথাখিনিৰ প্ৰতি লক্ষ্য ৰাখি আৰু বিষয়টোৰ গুৰুত্ব বিবেচনা কৰি, অসম আবকাৰী আইন, ২০০০ৰ ধাৰা ৩০ৰ অধীনত প্ৰদান কৰা ক্ষমতাৰ প্ৰয়োগেৰে নিম্ন স্বাক্ষৰকাৰীয়ে ইয়াৰ দ্বাৰা ডি টিপ্সি গাওঁ (এক্স’ৰ’)ৰ আইএমএফএল ‘অন’ অনুজ্ঞাপত্ৰ পৰৱৰ্তী নিৰ্দেশ নিদিয়ালৈকে তাৎক্ষণিকভাৱে কাৰ্যকৰী হোৱাকৈ নিলম্বন কৰিছে।”
কৰ্তৃপক্ষই এই সন্দৰ্ভত বিতং তদন্তও আৰম্ভ কৰিছে। কামৰূপ (মেট্ৰ’)ৰ আবকাৰী অধীক্ষকক ১৫ দিনৰ ভিতৰত এক বিস্তৃত তদন্ত আৰু প্ৰতিবেদন দাখিল কৰাৰ দায়িত্ব দিয়া হৈছে।
