নিজে পতা ফান্দত নিজেই বন্দী হ’ল এজন ব্যক্তি। পত্নীৰ সৈতে বিবাদ কৰি আঁতৰি থকা স্বামী অজানিতে পুনৰ পত্নীৰ প্ৰেমতে পৰিল। কিন্তু এই প্ৰেম হৈছিল ছচিয়েল মিডিয়াৰ জৰিয়তে। অচিনাকী যুৱতী বুলি ভাবি পত্নীৰ সৈতে কথা পাতিবলৈ গৈ অৱশেষত আৰক্ষীৰ জালত পৰিবলগা হ’ল প্ৰভুদত্ত ত্ৰিপাঠী নামৰ এজন যুৱক। সমগ্ৰ ঘটনাটো এটা নাটকীয় মোৰ লৈ বৰ্তমান চৰ্চাৰ কেন্দ্ৰবিন্দু হৈ পৰিছে।
প্ৰাপ্ত খবৰ অনুসৰি চনী ত্ৰিপাঠী নামৰ যুৱতীগৰাকীৰ নিজৰ স্বামীৰ সৈতে বিবাদ চলি আছিল। স্বামীয়ে ঘৰৰ পৰা উলিয়াই দিয়াৰ পিছত যোৱা চাৰি বছৰ ধৰি তেওঁ নৱাজগঞ্জ থানাৰ অন্তৰ্গত জগপুৰা গাঁৱত থকা নিজৰ পিতৃৰ ঘৰত আছিল। খঙতে স্বামীৰ ওপৰত চকু ৰাখিবলৈ চনীয়ে ইন্সটাগ্ৰামত এটা ভুৱা একাউণ্ট খুলিছিল। স্বামী প্ৰভুদত্তই সেই একাউণ্টৰ পৰা অহা ফ’ল’ ৰিকুৱেষ্ট গ্ৰহণ কৰাৰ পিছতেই দুয়োৰে মাজত বন্ধুত্ব আৰম্ভ হয়। লাহে লাহে এই বন্ধুত্ব গভীৰ হয় আৰু প্ৰভুদত্তই সেই অচিনাকী যুৱতীগৰাকীক বিয়া কৰাৰ প্ৰস্তাৱ দিয়ে।
পৰিকল্পনা অনুসৰি যোৱা ২ মে’ৰ বিয়লি নাগবাসাকী মন্দিৰৰ ওচৰত দুয়োৱে লগ কৰাৰ স্থান ঠিক কৰে। প্ৰভুদত্তই নিজৰ এজন বন্ধুক লৈ মন্দিৰ চৌহদত উপস্থিত হয়। আনহাতে চনীয়ে আগৰে পৰাই তাত ৰৈ আছিল। তেওঁ ওৰণিৰে মুখ ঢাকি আৰু চকুত ক’লা চশমা পিন্ধি নিজৰ পৰিচয় লুকুৱাই ৰাখিছিল। কিছু দূৰত চনীৰ পৰিয়ালৰ আন সদস্যসকলো উপস্থিত আছিল। কথা পাতি থকাৰ মাজতে চনীয়ে যেতিয়া নিজৰ ওৰণিখন খুলি আচল পৰিচয় দিয়ে, তেতিয়াহে প্ৰভুদত্তৰ চকু কপালত উঠে। তেওঁ গম পায় যে ইমান দিনে প্ৰেম কৰি থকা যুৱতীগৰাকী আন কোনো নহয়, তেওঁৰ নিজৰ পত্নীহে।
নিজৰ পত্নীক চিনাক্ত কৰাৰ পিছত প্ৰভুদত্তই তেওঁক চৰম হাৰাশাস্তি কৰিবলৈ ধৰে। কেৱল সেয়াই নহয়, তেওঁ চনীক হত্যাৰ ভাবুকিও প্ৰদান কৰে। পৰিস্থিতি অধিক বেয়া হোৱা দেখি চনীৰ পৰিয়ালৰ লোকসকলে বাধা দিয়ে আৰু লগে লগে আৰক্ষীক খবৰ দিয়ে। আৰক্ষীয়ে ঘটনাস্থলীত উপস্থিত হৈ প্ৰভুদত্তক আটক কৰে। তেওঁৰ বিৰুদ্ধে ভাৰতীয় ন্যায় সংহিতাৰ ধাৰা ১১৫ (২), ৩৫১ (২) আৰু ৩৫২ ৰ অধীনত গোচৰ ৰুজু কৰা হৈছে। বৰ্তমান আৰক্ষীয়ে এই সমগ্ৰ ঘটনাৰ তদন্ত অব্যাহত ৰাখিছে আৰু প্ৰত্যক্ষদৰ্শীৰ ভাষ্য গ্ৰহণ কৰিছে।
