নিট ইউ জি পৰীক্ষাৰ প্ৰশ্নকাকত ফাদিল হোৱা ঘটনাক লৈ এক ডাঙৰ খবৰ পোহৰলৈ আহিছে। মহাৰাষ্ট্ৰৰ নাছিকত এজন বি এ এম এছ ছাত্ৰক আৰক্ষীয়ে গ্ৰেপ্তাৰ কৰিছে। সূত্ৰই জানিবলৈ দিয়া মতে, এই ছাত্ৰজনে টেলিগ্ৰাম এপৰ জৰিয়তে ১০ লাখ টকাৰ বিনিময়ত নিট পৰীক্ষাৰ ফাদিল হোৱা প্ৰশ্নকাকত কিনিছিল। কেৱল সেয়াই নহয়, তেওঁ এই প্ৰশ্নকাকতখন হাৰিয়ানাৰ আন এজন ব্যক্তিক বিক্ৰীও কৰিছিল।
আৰক্ষীয়ে প্ৰকাশ কৰা অনুসৰি, গ্ৰেপ্তাৰ হোৱা এই অভিযুক্ত ছাত্ৰজনৰ নাম হৈছে শুভম খাইৰনাৰ। নাছিকৰ অপৰাধ শাখাৰ আৰক্ষীয়ে তেওঁক আটক কৰিবলৈ সক্ষম হয়। বৰ্তমান সমগ্ৰ দেশজুৰি চাঞ্চল্যৰ সৃষ্টি কৰা এই প্ৰশ্নকাকত ফাদিল কাণ্ডৰ তদন্ত চি বি আয়ে চলাই আছে। সেয়েহে শুভমক নিজৰ জিম্মালৈ নিবলৈ আৰু অধিক সোধা-পোচা কৰিবলৈ ইতিমধ্যে চি বি আইৰ চাৰিটাকৈ দল নাছিকত উপস্থিত হৈছেহি।
