আমেৰিকাৰ কেলিফৰ্ণিয়াৰ ছান ডিয়েগোৰ ইছলামিক চেণ্টাৰত অজ্ঞাত বন্দুকধাৰীয়ে তিনিজন লোকক গুলীয়াই হত্যা কৰিছে। এই ঘটনাত লগতে নিহত হয় দুজন আক্ৰমণকাৰী। আৰক্ষীৰ মতে ১৭ আৰু ১৯ বছৰীয়া আক্ৰমণকাৰীয়ে আত্মহত্যা কৰাৰ পূৰ্বে তিনিওজনক হত্যা কৰিছিল বুলি প্ৰাথমিক তদন্তত প্ৰকাশ পাইছে।
ভাৰতীয় সময় অনুসৰি সোমবাৰে নিশা সংঘটিত হোৱা এই ঘটনাই সমগ্ৰ অঞ্চলটোত আতংক বিয়পি পৰিছে। ইছলামিক চেণ্টাৰৰ ভিতৰত আছে মছজিদ আৰু শিশুৰ বাবে আৱাসিক বিদ্যালয়।
কৰ্তৃপক্ষই জনোৱা মতে, শিশুসকলৰ কোনো ক্ষতি হোৱা নাই। এই আক্ৰমণৰ বলি হোৱা লোকসকলক চিনাক্ত কৰাৰ প্ৰচেষ্টা অব্যাহত আছে। তদন্তকাৰীয়ে এতিয়াও নিশ্চিত কৰা নাই আক্ৰমণকাৰীৰ পৰিচয়।
ঘটনা সন্দৰ্ভত এফ বি আইয়ে তদন্ত আৰম্ভ কৰিছে। ছচিয়েল মিডিয়াত এক বিবৃতিযোগে জনসাধাৰণক তদন্তত সহায় কৰিবলৈ আহ্বান জনাইছে। সংস্থাটোৰ এজন বিষয়া মাৰ্ক ৰেমিলিয়ে জনোৱা মতে, এই ঘটনাত আৰক্ষীয়ে গুলীচালনা কৰা নাছিল।
ছান ডিয়েগোৰ আৰক্ষী অধীক্ষক স্কট ৱাহেলে কয় যে, “এয়া যিকোনো ব্যক্তিৰ বাবে এক ভয়ংকৰ দুঃস্বপ্ন।” কৰ্তৃপক্ষই কয় যে ‘এয়া ঘৃণাজনিত অপৰাধ। সেই কথা মনত ৰাখিয়েই এই কাণ্ডৰ তদন্ত চলি আছে।’
ছান ডিয়েগোৰ মেয়ৰে এই কাণ্ডক লৈ গভীৰ উদ্বেগ আৰু শোক প্ৰকাশ কৰিছে। গুলীচালনাৰ ঘটনাক গৰিহণা দি কাউন্সিল অন আমেৰিকান-ইছলামিক ৰিলেচনৰ (চিএআইআৰ) ছান ডিয়েগোৰ কাৰ্যবাহী সঞ্চালক তাহজিন নিজামে এক বিবৃতিত কয় যে, “আমি নিশ্চিত কৰিব লাগিব যে প্ৰাৰ্থনা আৰু শিশুৰ শিক্ষাৰ সময়ত যাতে এনে মাৰাত্মক আক্ৰমণ সংঘটিত নহয়। কাকো শংকাত থাকিবলৈ এৰি দিয়া উচিত নহয়।”
