তামিলনাডু বিধানসভা নিৰ্বাচনত কংগ্ৰেছৰ প্ৰদৰ্শন বৰ বিশেষ শক্তিশালী নাছিল যদিও প্ৰায় ছয় দশকৰ এক দীৰ্ঘ বিৰতিৰ পাছত দলটোৱে ৰাজ্যখনৰ শাসন ক্ষমতাৰ অংশীদাৰ হোৱাৰ সুযোগ লাভ কৰিছে। মুখ্যমন্ত্ৰী বিজয়ৰ নেতৃত্বত গঠন হ’বলগীয়া টিভিকে চৰকাৰত কংগ্ৰেছৰ দুজন বিধায়কে কেবিনেট মন্ত্ৰী হিচাপে শপত গ্ৰহণ কৰিব। দ্ৰাবিড় ৰাজনীতিৰ সম্পূৰ্ণ আধিপত্য থকা তামিলনাডুৰ বুকুত এয়া এক ডাঙৰ আৰু গুৰুত্বপূৰ্ণ ৰাজনৈতিক ঘটনাপ্ৰবাহ হিচাপে বিবেচিত হৈছে, কিয়নো ইমান দীঘলীয়া সময়ৰ পাছত কোনো এটা ৰাষ্ট্ৰীয় ৰাজনৈতিক দল ৰাজ্যখনৰ চৰকাৰৰ অংশীদাৰ হ’বলৈ গৈ আছে।
কংগ্ৰেছৰ সংগঠন সাধাৰণ সম্পাদক কে চি বেণুগোপালে এই সন্দৰ্ভত তথ্য প্ৰকাশ কৰি জনাইছে যে কংগ্ৰেছ সভাপতি মল্লিকাৰ্জুন খৰ্গেয়ে বিধায়ক এডভোকেট ৰাজেশ কুমাৰ আৰু পি বিশ্বনাথনক তামিলনাডু কেবিনেটত অন্তৰ্ভুক্ত কৰাৰ বাবে সম্পূৰ্ণ অনুমোদন জনাইছে। বিগত দুটা দশকত ডি এম কেৰ সৈতে মিত্ৰতা থকাৰ পিছতো কংগ্ৰেছে চৰকাৰত কোনো অংশীদাৰিত্ব পোৱা নাছিল। সেয়েহে ৫৯ বছৰৰ দীঘলীয়া অন্তৰালৰ মূৰত তামিলনাডু কেবিনেটত কংগ্ৰেছৰ এই প্ৰৱেশ দলটোৰ বাবে অতি ঐতিহাসিক ক্ষণ হিচাপে পৰিগণিত হৈছে বুলি তেওঁ উল্লেখ কৰে।
উল্লেখ্য যে এইবাৰৰ বিধানসভা নিৰ্বাচনত ১০৮ খন আসনেৰে বিজয়ৰ দল টিভিকে আটাইতকৈ ডাঙৰ দল হিচাপে উলাই আহিছিল যদিও তেওঁলোক সংখ্যাগৰিষ্ঠতাৰ পৰা পিছপৰি আছিল। এনে সংকটপূৰ্ণ সময়তে ৰাহুল গান্ধীৰ বিশেষ তৎপৰতাত কংগ্ৰেছে নিজৰ পাঁচজন বিধায়কৰ সমৰ্থন ঘোষণা কৰি বিজয়ৰ মুখ্যমন্ত্ৰী হোৱাৰ পথটো সহজ কৰি তোলে। কংগ্ৰেছে পুৰণি মিত্ৰ ডি এম কে ত্যাগ কৰি হঠাতে লোৱা এই সিদ্ধান্তই প্ৰাক্তন মুখ্যমন্ত্ৰী এম কে ষ্টালিনক আচৰিত কৰাৰ লগতে ক্ষুব্ধও কৰি তুলিছিল। অৱশ্যে নিৰ্বাচনৰ ফলাফলে কংগ্ৰেছক তামিলনাডুৰ ৰাজনীতিত এটা নতুন পথৰ সন্ধান দিলে।
