বৌদ্ধ সন্ন্যাসীসকলে বিশ্বাস কৰিছিল যে ঘৰ সাৰি ধূলি-মাকতি বাহিৰ কৰাটো আচলতে জাগতিক মোহ ত্যাগ কৰি জীৱনত আগবাঢ়ি যোৱাৰ দৰেই। ঘৰৰ পৰা মলি পৰিষ্কাৰ কৰিলে মনৰ পৰাও বেয়া ভাৱবোৰ আঁতৰি যায় বুলি তেওঁলোকে ভাবিছিল। আজিকালি মনোবিজ্ঞানীসকলেও কয় যে ঘৰখন পৰিপাটিকৈ ৰাখিলে জীৱনটোও সুন্দৰকৈ সজাই তোলাত সুবিধা হয়। প্ৰায়ে দেখা যায় যে যিসকল লোকে নিজৰ ঘৰখন অগোছাল কৰি ৰাখে, তেওঁলোকে ব্যক্তিগত জীৱনতো সঠিক সিদ্ধান্ত ল’ব নোৱাৰে। তেওঁলোকে খং, মানসিক চাপ আৰু বিৰক্তি বেছিকৈ প্ৰকাশ কৰে। কিন্তু এই সকলোবোৰ সমস্যাৰ সমাধান আপোনাৰ হাততেই আছে। সেয়া হৈছে হাতত ঝাড়ু লৈ ঘৰখন ধুনীয়াকৈ চাফা কৰি ৰখা। ঘৰ চাফা কৰিলে কেনেকৈ মানসিক শান্তি পোৱা যায়, সেয়া জানি লোৱাটো অতি প্ৰয়োজনীয়।
ধৰি লওক আপোনাৰ টেবুলৰ ওপৰত বস্তুৰ দ’ম হৈ আছে বা কাপোৰবোৰ ইটোৰ ওপৰত সিটোকৈ জাপি থোৱা আছে। প্ৰথম অৱস্থাত এইবোৰ দেখি আপোনাৰ চাফা কৰিবলৈ মন নাযাব পাৰে। কিন্তু যেতিয়া আপুনি ধৈৰ্য ধৰি লাহে লাহে বস্তুবোৰ জাপি থ’বলৈ আৰম্ভ কৰিব, তেতিয়া আপুনি নিজেই অনুভৱ কৰিব পাৰিব যে আপোনাৰ মনৰ দুশ্চিন্তা কমি আহিছে আৰু মনটো শান্ত হৈ পৰিছে। অগোছাল বস্তুবোৰ নতুনকৈ ধুনীয়াকৈ সজাই ৰখাটোৱেই হৈছে আচল কাম। বস্তুবোৰ চকুৰ আগত পৰিপাটিকৈ সজাই ৰাখিলে মনৰ একাগ্ৰতা বৃদ্ধি পায়। আজিকালি মানুহে ম’বাইলত বহুত সময় কটোৱাৰ বাবে যিকোনো কামতে মনোযোগ দিবলৈ টান পায়। সময় উলিয়াই ঘৰখন সজাই-পৰাই ৰাখিলে পিছলৈ আন যিকোনো কামতো মনোযোগ দিয়াত বহুত সুবিধা হয়।
যেতিয়াই আপোনাৰ ঘৰৰ লেতেৰা হৈ থকা চুক এটা পৰিষ্কাৰ হৈ পৰে, তেতিয়া মনটো এক অনাবিল আনন্দৰে ভৰি পৰে। ঘৰখন পৰিষ্কাৰ কৰাৰ লগে লগে নিজৰ জীৱনটোৰ ওপৰতো যেন নিয়ন্ত্ৰণ আহিছে, তেনে এক অনুভৱ হয়। ইয়াৰ ফলত যিকোনো সিদ্ধান্ত লোৱাটো সহজ হৈ পৰে, মানসিক ভাগৰ দূৰ হয় আৰু টোপনিও ভাল হয়। লগতে ই মানুহৰ আত্মবিশ্বাসো বৃদ্ধি কৰে। আনহাতে, সদায় একেবোৰ কামৰ মাজত মানুহে আজিকালি ব্যায়াম কৰিবলৈ সময় নাপায়। কিন্তু নিয়মীয়াকৈ ঘৰ চাফা কৰিলে শৰীৰটোও সক্ৰিয় হৈ থাকে আৰু ই এক প্ৰকাৰৰ ব্যায়ামৰ কাম কৰে। নিজৰ হাতেৰে ঘৰখন সজাই ৰাখিলে প্ৰয়োজনৰ সময়ত যিকোনো বস্তু বিচাৰি পাবলৈ সুবিধা হয়, যিয়ে মানুহৰ মাজত দায়িত্ববোধ গঢ়ি তোলে। ইয়াৰ উপৰিও বাহিৰৰ পৰা অহা আলহীয়ে যেতিয়া আপোনাৰ পৰিপাটি ঘৰখন দেখি প্ৰশংসা কৰে, তেতিয়া নিজৰ প্ৰতি থকা বিশ্বাস আৰু বেছি দৃঢ় হৈ পৰে।
ঘৰৰ সকলোবোৰ বস্তু যে একেদিনাই চাফা কৰি শেষ কৰিব লাগিব, তেনে কোনো কথা নাই। বৰঞ্চ আপুনি ঘৰৰ একোটা অংশ একোখনকৈ বাছি লৈ লাহে লাহে চাফা কৰিব পাৰে। সকলো কাম যে একেবাৰে নিখুঁত হ‘ব লাগিব, তাৰো কোনো প্ৰয়োজন নাই। লাহে লাহে ঘৰখন গুচাবলৈ আৰম্ভ কৰিলে এদিন দেখিব যে এই কঠিন কামটো আপোনাৰ বাবে একেবাৰে সহজ হৈ পৰিছে আৰু আপোনাৰ মানসিক অশান্তিও বহু পৰিমাণে দূৰ হৈছে।
