পৰিকল্পিত ‘এক দেশ, এক নিৰ্বাচন’ ব্যৱস্থা সম্পৰ্কে মতামত আগবঢ়াইছে ‘ৱান নেচন, ৱান ইলেকচন’ সংক্ৰান্তীয় যৌথ সংসদীয় কমিটিয়ে। কমিটিৰ মতে এই ব্যৱস্থা কাৰ্যকৰী হ’লে সমগ্ৰ দেশতে একেলগে লোকসভা, বিধানসভা আৰু স্থানীয় পৌৰসভা তথা পঞ্চায়ত নিৰ্বাচন অনুষ্ঠিত কৰিব পৰা যাব। ইয়াৰ ফলত প্ৰায় ৭ লাখ কোটি টকা সাৰ্বজনীনভাৱে ৰাহি হোৱাৰ সম্ভাৱনা আছে।
ইয়াৰ উপৰি প্ৰশাসনিক কাম-কাজৰ গতি বৃদ্ধি পাব আৰু দেশৰ জিডিপি বৃদ্ধিৰ হাৰো প্ৰায় ১.৬ শতাংশ পৰ্যন্ত বাঢ়িব পাৰে বুলি গান্ধীনগৰত অনুষ্ঠিত এক সংবাদমেলত জেপিচিৰ অধ্যক্ষ তথা লোকসভাৰ সাংসদ পি পি চৌধুৰীয়ে এই সন্দৰ্ভত এক গুৰুত্বপূৰ্ণ তথ্য প্ৰকাশ কৰিছে।
তেওঁ জনায় যে প্ৰধানমন্ত্ৰী নৰেন্দ্ৰ মোদীয়ে প্ৰাক্তন ৰাষ্ট্ৰপতি ৰামনাথ কোবিন্দৰ নেতৃত্বত এটা আঠজনীয়া কমিটি গঠন কৰি দিছিল। এই কমিটিখনে প্ৰায় ১৮৬ দিন ধৰি বিভিন্ন আলোচনা আৰু পৰ্যালোচনা কৰাৰ পিছত এটা প্ৰতিবেদন প্ৰস্তুত কৰে। পাছত এই বিষয়টো যৌথ সংসদীয় কমিটিৰ ওচৰলৈ পঠিওৱা হয়। সেই প্ৰতিবেদন অনুসৰি একেলগে তিনিটা স্তৰৰ নিৰ্বাচন অনুষ্ঠিত কৰিব পাৰিলে দেশ আৰ্থিক আৰু প্ৰশাসনিকভাৱে বহুখিনি লাভান্বিত হ’ব।
কমিটিৰ পৰামৰ্শ অনুযায়ী প্ৰথম পৰ্যায়ত লোকসভা আৰু বিধানসভা নিৰ্বাচন একেলগে আয়োজন কৰা হ’ব। ইয়াৰ পিছত ১০০ দিনৰ ভিতৰত পঞ্চায়ত আৰু পৌৰসভা নিৰ্বাচন সম্পন্ন কৰাৰ প্ৰস্তাৱ দিয়া হৈছে। বৰ্তমান সময়ত সংবিধানৰ সংশোধনী বিল আৰু কেন্দ্ৰীয় শাসিত অঞ্চল আইনৰ সংশোধনী বিলখন জেপিচিয়ে পৰীক্ষা-নিৰীক্ষা কৰি আছে। এই সন্দৰ্ভতে কমিটিৰ সদস্যসকলে তিনিদিনীয়া ভ্ৰমণসূচীৰে গুজৰাটলৈ গৈছে।
বৰ্তমান সময়ত ‘এক দেশ, এক নিৰ্বাচন’ বিলখন যৌথ সংসদীয় কমিটিৰ বিবেচনাধীন হৈ আছে। এই কমিটিখনে দেশৰ প্ৰাক্তন নিৰ্বাচন আয়ুক্ত, প্ৰ প্রাক্তন মুখ্য ন্যায়াধীশ আৰু বিভিন্ন বিশেষজ্ঞসকলৰ মতামত গ্ৰহণ কৰিছে। বিজেপি সাংসদ পি পি চৌধুৰীৰ নেতৃত্বত চলি থকা এই কমিটিখনত মুঠ ৩৯ গৰাকী সদস্য আছে, যাৰ ভিতৰত লোকসভাৰ পৰা ২৭ গৰাকী আৰু ৰাজ্যসভাৰ পৰা ১২ গৰাকী সাংসদ অন্তৰ্ভুক্ত হৈ আছে। অৱশ্যে অধ্যক্ষগৰাকীয়ে পূৰ্বেই স্পষ্ট কৰি দিছে যে ২০৩৪ চনৰ পূৰ্বে এই এক দেশ এক নিৰ্বাচন নীতি কাৰ্যকৰী কৰা সম্ভৱ নহয় আৰু বৰ্তমান কমিটিখনে সেই সময়সীমা আগত ৰাখিয়েই কাম কাজ আগবঢ়াই লৈ গৈছে।
