বিশ্বকাপ আৰম্ভ হ’বলৈ মাত্ৰ কেইটামান দিন বাকী আছে। ইয়াৰ মাজতে আৰ্জেণ্টিনা শিবিৰত চিন্তা বাঢ়িল। ইণ্টাৰ মিয়ামীৰ খেলৰ সময়ত হঠাতে খেলপথাৰ এৰিলে লিয়নেল মেছিয়ে। আৰ্জেণ্টিনাৰ অধিনায়কগৰাকীয়ে বাওঁ ভৰিৰ পিছফালে হাত থৈ প্ৰশিক্ষকক বদলি কৰিবলৈ ইংগিত দিয়ে। তাৰ পিছত পোনে পোনে টানেললৈ! আৰু তাৰ পিছতে আৰম্ভ হৈছে জল্পনা-কল্পনা।
ফিলাডেলফিয়া ইউনিয়নৰ বিৰুদ্ধে মেজৰ লীগ ছকাৰ খেলত এই ঘটনা সংঘটিত হয়। ইণ্টাৰ মিয়ামীয়ে বৰষুণৰ ভিজা খেলপথাৰত খেলি আছিল। মেছিয়ে ৭৩ মিনিটত খেলপথাৰ এৰিলে। অৱশেষত দলটোৱে ৬-৪ গ’লত জয়লাভ কৰে। যদিও ফলাফল নহয়, এতিয়া আটাইতকৈ ডাঙৰ প্ৰশ্ন মাথোঁ এটাই – বিশ্বকাপৰ পূৰ্বে মেছিৰ আঘাত কিমান গুৰুতৰ?
খেলৰ সময়ত মেছিয়ে বাওঁ ভৰিৰ পিছফালে অস্বস্তি অনুভৱ কৰিছিল। তাৰ পিছত তেওঁ নিজেই বদলি কৰাৰ ইংগিত দিয়ে। খেলপথাৰৰ পৰা ওলাই আহোঁতে তেওঁক স্বাভাৱিকভাৱে খোজ কঢ়া দেখা গৈছিল। আঘাতৰ কোনো ছবি দেখা যোৱা নাই, যাৰ পৰা অনুমান কৰিব পাৰি যে কোনো গুৰুতৰ আঘাত পোৱা নাই।
মেচৰ অন্তত ইণ্টাৰ মিয়ামীৰ প্ৰশিক্ষক গুইলাৰমো হোয়ছে কয়, “এতিয়ালৈকে কোনো চিকিৎসা প্ৰতিবেদন পোৱা নাই। অতি সোনকালে উপলব্ধ হ’ব!” তেওঁ লগতে কয়, “মেছি ভাগৰি পৰিছিল। তাৰ ওপৰত বৰষুণৰ বাবে খেলপথাৰখন অতি গধুৰ হৈ পৰিছিল। এনে পৰিস্থিতিত ৰিস্ক লোৱাৰ কোনো প্ৰশ্নই উত্থাপন নহয়।”
প্ৰশিক্ষকগৰাকীয়ে দাবী কৰে যে প্ৰাৰম্ভিক পৰ্যবেক্ষণৰ পৰা দেখা গৈছে যে আঘাতৰ কাৰণ হৈছে ‘ফেটিগ’ বা ক্লান্তিজনিত। কিন্তু চূড়ান্ত প্ৰতিবেদন নহালৈকে নিশ্চিত হোৱাৰ কোনো উপায় নাই।
যোৱা কেইবছৰমানৰ পৰা কেইবাবাৰো মেছিয়ে হামষ্ট্ৰিং সমস্যাত ভুগিছে। ইণ্টাৰ মিয়ামীত যোগদান কৰাৰ পিছৰে পৰা তেওঁৰ মেচৰ সময় নিয়ন্ত্ৰণ কৰা হৈছে। ব্যস্ততাৰ মাজতে কেইবাখনো খেলতো তেওঁক জিৰণি দিয়া হৈছে।
চলিত বৰ্ষৰ আৰম্ভণিতে তেওঁ একেধৰণৰ সমস্যাৰ বাবে প্ৰি-ছিজনৰ কিছু অংশ খেলিব নোৱাৰিলে। গতিকে বিশ্বকাপৰ ঠিক আগৰ এই ঘটনাটো আৰ্জেণ্টিনাৰ বাবে অস্বস্তিকৰ। কাৰণ ৩৮ বছৰীয়া মেছি এতিয়াও দলটোৰ আটাইতকৈ ডাঙৰ আশা। আঠবাৰৰ বেলন ডি অৰ বিজয়ীগৰাকীৰ অবিহনে বিশ্বকাপ অভিযানৰ কথা কল্পনা কৰাটো কঠিন!
এই প্ৰতিযোগিতাখন ১১ জুনত মেক্সিকো চিটিত আৰম্ভ হ’ব।আৰ্জেণ্টিনাৰ প্ৰথমখন খেল ১৬ জুনত, কানছাছ চিটিত আলজেৰিয়াৰ বিৰুদ্ধে। ইয়াৰ পূৰ্বে মেছিয়ে ৬ জুনত টেক্সাছত হণ্ডুৰাছ আৰু ৯ জুনত আইচলেণ্ডৰ বিৰুদ্ধে ৱাৰ্ম আপ মেচ খেলিব। অহা সপ্তাহত বিশ্বকাপৰ দল ঘোষণা হোৱাৰ সম্ভাৱনা আছে। মেছিয়ে এতিয়াও আনুষ্ঠানিকভাৱে এই প্ৰতিযোগিতাত অংশগ্ৰহণ কৰাৰ কথা ঘোষণা কৰা নাই। অৱশ্যে অনুমান কৰা হৈছে যে তেওঁৰ ষষ্ঠ বিশ্বকাপ প্ৰায় নিশ্চিত হ’ব।
দেওবাৰৰ খেলখন আছিল বিশ্বকাপৰ পূৰ্বে ইণ্টাৰ মিয়ামীৰ অন্তিমখন খেল। এতিয়া মেডিকেল ৰিপৰ্টত ঠিক কি ওলায় তাৰ ওপৰত গুৰুত্ব দিয়া হৈছে। আৰ্জেণ্টিনাৰ অনুৰাগীসকলে ভালদৰেই জানে যে ‘মেছি ফিট’ৰ খবৰে বিশ্বকাপৰ পূৰ্বে জৰুৰী অক্সিজেন যোগান ধৰিব পাৰে।
