ইণ্ডিয়ান প্ৰিমিয়াৰ লীগ চমুকৈ আইপিএল ২০২৬ ত অতি শোচনীয় প্ৰদৰ্শনৰ পিছত ঋষভ পণ্টে লক্ষ্ণৌ ছুপাৰ জায়েণ্টছ দলৰ অধিনায়কৰ পদৰ পৰা তত্কালীনভাৱে পদত্যাগ কৰাৰ সিদ্ধান্ত গ্ৰহণ কৰিছে। লক্ষ্ণৌ ফ্ৰেঞ্চাইজিয়ে শুকুৰবাৰে এই কথা নিশ্চিত কৰি কয় যে তেওঁলোকে পন্তৰ এই অনুৰোধ মানি লৈছে আৰু তেওঁক অধিনায়কৰ দায়িত্বৰ পৰা অব্যাহতি দিছে। উল্লেখ্য যে ২০২৫ চনৰ আইপিএল নিলামত লক্ষ্ণৌৱে ২৭ কোটি টকাৰ বৃহৎ মূল্য দি ঋষভ পন্তক দলত অন্তৰ্ভুক্ত কৰিছিল আৰু তেওঁ দলটোৰ বাবে এক সপোনৰ খেলুৱৈ হিচাপে বিবেচিত হৈছিল।
কিন্তু অধিনায়ক হিচাপে এই দুয়োটা ছিজনতে পণ্টে দলটোক প্লে-অফলৈ লৈ যোৱাত ব্যৰ্থ হয়। আনকি ২০২৬ চনৰ ছিজনত লক্ষ্ণৌ দল পইণ্ট তালিকাৰ একেবাৰে তলৰ স্থানত আছিল। চলিত বৰ্ষত লক্ষ্ণৌৱে ১৪ খন মেচৰ ভিতৰত মাত্ৰ ৪ খন মেচতহে জয়লাভ কৰিবলৈ সক্ষম হয়। ইয়াৰ পূৰ্বে ২০২৫ চনৰ ছিজনো দলটোৰ বাবে অতি হতাশাজনক আছিল, য’ত তেওঁলোকে ১৪ খন মেচৰ ভিতৰত মাত্ৰ ৬ খন মেচতহে জয়ী হৈছিল। ইয়াৰ অৰ্থ হৈছে অধিনায়ক হিচাপে খেলা মুঠ ২৮ খন মেচৰ ভিতৰত পন্তৰ নেতৃত্বত লক্ষ্ণৌৱে মাত্ৰ ১০ খন মেচতহে জয়ৰ সোৱাদ পাইছিল।
লক্ষ্ণৌ ছুপাৰ জায়েণ্টছ কৰ্তৃপক্ষই এক চৰকাৰী বিবৃতিত জানিবলৈ দিয়ে যে ঋষভ পণ্টে দলৰ অধিনায়কত্বৰ দায়িত্বৰ পৰা ফ্ৰেঞ্চাইজিক অব্যাহতি দিবলৈ অনুৰোধ জনাইছিল আৰু ফ্ৰেঞ্চাইজিয়ে তেওঁৰ এই অনুৰোধক সন্মান জনাই তত্কালীনভাৱে গ্ৰহণ কৰিছে। এই সমগ্ৰ সময়ছোৱাত কেৱল অধিনায়কত্বতে নহয়, পন্তৰ বেটিঙৰ ক্ষেত্ৰতো যথেষ্ট অৱনতি ঘটা দেখিবলৈ পোৱা গৈছে। ২০২৫ চনত পণ্টে ১৪ খন মেচত মাত্ৰ ২৬৯ ৰান সংগ্ৰহ কৰিছিল আৰু চলিত বৰ্ষত তেওঁ মাত্ৰ ৩১২ ৰানহে কৰিবলৈ সমৰ্থ হয়।
দলৰ মেনেজমেণ্টৰ সৈতে জড়িত টম মুডীয়ে লক্ষ্ণৌৰ এই হতাশাজনক প্ৰদৰ্শনৰ পিছত দলৰ নেতৃত্বত পৰিৱৰ্তন হ’ব পাৰে বুলি ইংগিত দিছিল। পন্তৰ এই সিদ্ধান্তৰ পিছত তেওঁ কয় যে ঋষভ নিজেই ফ্ৰেঞ্চাইজিৰ ওচৰলৈ আহি এই অনুৰোধ জনাইছিল আৰু তেওঁলোকে ইয়াক গ্ৰহণ কৰিছে। মুডীয়ে স্বীকাৰ কৰে যে এনেধৰণৰ সিদ্ধান্তবোৰ লোৱাটো কেতিয়াও সহজ নহয়। তেওঁ অধিনায়ক হিচাপে ড্ৰেছিং ৰুমলৈ ঋষভে অনা অৱদানৰ বাবে ধন্যবাদ জ্ঞাপন কৰে আৰু কয় যে এতিয়া তেওঁলোকৰ মূল লক্ষ্য হ’ব দলটোক নতুনকৈ গঢ়ি তোলা।
দিল্লী কেপিটেলছৰ হৈ ২০২৪ চনৰ আইপিএলত ১৩ খন মেচত ৪৪৬ ৰান কৰি এক সুন্দৰ ফৰ্মত থকা পণ্টে লক্ষ্ণৌত যোগদান কৰিছিল। কিন্তু লক্ষ্ণৌৰ হৈ খেলা ২৮ খন মেচত তেওঁ ২৬.৪ গড়ে আৰু ১৩৫.৭৪ ষ্ট্ৰাইক ৰেটেৰে মাত্ৰ ৫৮১ ৰানহে কৰিব পাৰিলে। এই সময়ছোৱাত তেওঁ মাত্ৰ এটা শতক আৰু দুটা অৰ্ধশতক অৰ্জন কৰে। বৰ্তমান লক্ষ্ণৌ দলে এতিয়া এজন নতুন অধিনায়কৰ সন্ধানত নামিবলগীয়া হৈছে। অৱশ্যে দলটোত ইতিমধ্যে মিচেল মাৰ্শ, এইডেন মাৰ্ক্ৰাম আৰু নিকোলাছ পুৰাণৰ দৰে অভিজ্ঞ খেলুৱৈ আছে যিসকলে নিজৰ নিজৰ দেশৰ ৰাষ্ট্ৰীয় দলক নেতৃত্ব দিয়াৰ সুন্দৰ অভিজ্ঞতা লাভ কৰিছে।
