কেন্দ্ৰৰ নৰেন্দ্ৰ মোডী চৰকাৰৰ ‘জনসম্পৰ্ক অভিযান’ৰ লগত সংগতি ৰাখি দুদিনীয়া বৰাক ভ্রমণসূচী লৈ অহা মুখ্য মন্ত্রী সর্বানন্দ সোনোৱালে দেওবাৰে পুৱা বিজেপিৰ জনসম্পর্ক অভিযানৰ অংশ হিচাপে শিলচৰত পৃথকে পৃথকে ডা: কালী পংকজ চক্রৱর্তী আৰু শিলচৰ ৰামকৃষ্ণ মিছনৰ মহাৰাজ স্বামী গনধিষানন্দজীক সাক্ষাৎ কৰে।
মুখ্য মন্ত্ৰী সোণোৱালে দুয়োৰে স’তে মত বিনিময় কৰি কেন্দ্ৰৰ মোডী চৰকাৰৰ আৰু ৰাজ্য চৰকাৰৰ চৰকাৰী কাম- কাজৰ পুস্তিকা প্রদান কৰে।
উল্লেখযোগ্য যে ডা: কালী পংকজ চক্রৱর্তী ভাৰত কেশৰী ড০ শ্যামাপ্রসাদ মুখার্জীৰ সহকর্মী আছিল। ১৯৫২ চনত সাধাৰণ নির্বাচনত দক্ষিণ কলকাতাৰ পৰা শ্যামাপ্রসাদ মুখার্জী নির্বাচনী প্রতিদ্বন্দ্বিতাৰ সময়ত পোলিং এজেন্ট আছিল।
মুখ্য মন্ত্রী সোণোৱালৰ সৈতে মন্ত্রী পৰিমল শুক্লবৈদ্য, প্রাক্তন কেন্দ্রীয় মন্ত্রী কবীন্দ্র পুৰকায়স্থ , কোশিক ৰায় উপস্থিত আছিল।
স্মৰ্তব্য যে বৰাক উপত্যকাৰ তিনিওখন জিলাৰ বান পৰিস্থিতিৰ চৰজমিন অধ্যয়ন কৰি সাম্প্ৰতিক বান পৰিস্থিতিৰ সৈতে মোকাবিলা কৰিব পৰাকৈ কালি মুখ্য মন্ত্ৰী সৰ্বানন্দ সোণোৱালে ১০০ কোটি টকাৰ বান সাহায্য ঘোষণা কৰিছে। কালিৰ বান পৰ্যালোচনা সভাত মুখ্য মন্ত্ৰীৰ সৈতে জলসম্পদ মন্ত্ৰী কেশৱ মহন্ত, বন মন্ত্ৰী পৰিমল শুক্লবৈদ্যৰ উপৰি শিলচৰ, লক্ষীপুৰ, কাটিগঢ়া, উদাৰবন্দ আৰু বৰখলাৰ বিধায়কসকল উপস্থিত থাকে।
