ভাৰতীয় সশস্ত্ৰ বাহিনীত নেতৃত্বৰ এক বৃহৎ পৰিৱৰ্তন আৰম্ভ হৈছে। জেনেৰেল এন এছ ৰাজা সুব্ৰমণিয়ে দেশৰ পৰৱৰ্তী প্ৰতিৰক্ষা মুৰব্বী (চিডিএছ) হিচাপে দায়িত্ব গ্ৰহণ কৰিছে। অপাৰেচন আৰু কমাণ্ডৰ দশক দশক ধৰি অভিজ্ঞতা থকা জেনেৰেল এন. ৰাজা সুব্ৰমণিয়ে জেনেৰেল অনিল চৌহানৰ স্থলাভিষিক্ত হ’ব।
দেশৰ চিডিএছ গৰাকীয়ে চৰকাৰৰ প্ৰধান সামৰিক উপদেষ্টা হিচাপে কাম কৰে আৰু সেনা, নৌসেনা আৰু বায়ুসেনাৰ মাজত সমন্বয় আৰু সংহতি বৃদ্ধিত মূল ভূমিকা পালন কৰে।
নতুন প্ৰতিৰক্ষা মুৰব্বী হিচাপে দায়িত্ব লোৱাৰ পিছত জেনেৰেল এন. ৰাজা সুব্ৰমণিয়ে সশস্ত্ৰ বাহিনীৰ ওপৰত দেশে যি আস্থা ৰাখিছে তাৰ বাবে কৃতজ্ঞতা জ্ঞাপন কৰে। তেওঁ কয়, ‘’মই প্ৰতিৰক্ষা মুৰব্বী হিচাপে দায়িত্ব গ্ৰহণ কৰি অত্যন্ত সন্মানিত হৈছো। সশস্ত্ৰ বাহিনীৰ প্ৰতি দেশে যি আস্থা ৰাখিছে তাৰ বাবে আমি কৃতজ্ঞ। ভাৰতৰ সুৰক্ষা শক্তিশালী কৰাৰ সমগ্ৰ ৰাষ্ট্ৰীয় দৃষ্টিভংগীৰ অংশ হিচাপে আমি—ভাৰতীয় সেনা, নৌসেনা, বায়ুসেনা, প্ৰতিৰক্ষা মন্ত্ৰালয়, কৌশলগত প্ৰতিষ্ঠান আৰু সকলো অংশীদাৰ একেলগে থিয় দিছো।”
তেওঁ লগতে কয়, ‘’আমি আমাৰ প্ৰধানমন্ত্ৰীৰ দৃষ্টিভংগী ‘JAI’ (জয়)-অৰ্থাৎ Jointness (সমন্বয়), Atma Nirbharta (আত্মনিৰ্ভৰশীলতা) আৰু Innovation (উদ্ভাৱন) কাৰ্যকৰী কৰাৰ বাবে প্ৰতিশ্ৰুতিবদ্ধ। আমাৰ মূল উদ্দেশ্য হ’ব সশস্ত্ৰ বাহিনীক ৰূপান্তৰিত কৰা আৰু সমন্বয়, পাৰস্পৰিক সহযোগিতা আৰু সংহতি বৃদ্ধিৰ বাবে সাংগঠনিক সংস্কাৰ অনা। আমাৰ ৰাষ্ট্ৰীয় নিৰাপত্তাৰ এক কেন্দ্ৰীয় স্তম্ভ আমি আমাৰ সশস্ত্ৰ বাহিনীত থলুৱা অস্ত্ৰৰ বিকাশ, অন্তৰ্ভুক্ত আৰু একত্ৰীকৰণৰ প্ৰক্ৰিয়া আৰু অধিক ত্বৰান্বিত কৰিম।”
কাৰ্গিল পৰ্যালোচনা সমিতিৰ পৰামৰ্শ মতে ২০১৯ চনত সৃষ্টি হোৱা চিডিএছৰ পদটো প্ৰথমে জেনেৰেল বিপিন ৰাৱটে গ্ৰহণ কৰিছিল। তিনিওটা সেৱাৰ মাজত সমন্বয় শক্তিশালী কৰাৰ লগতে সংহত পৰিকল্পনা আৰু অভিযানৰ জৰিয়তে দেশৰ সামৰিক প্ৰস্তুতি বৃদ্ধিৰ বাবে এই পদটো প্ৰৱৰ্তন কৰা হৈছে।
জেনেৰেল এন.এছ. ৰাজা সুব্ৰমণিয়ে ২০২৫ চনৰ ১ ছেপ্টেম্বৰৰ পৰা ৰাষ্ট্ৰীয় নিৰাপত্তা পৰিষদৰ সচিবালয়ত সামৰিক উপদেষ্টা হিচাপে কাৰ্যনিৰ্বাহ কৰি আহিছিল। ইয়াৰ পূৰ্বে ২০২৪ চনৰ ১ জুলাইৰ পৰা ২০২৫ চনৰ ৩১ জুলাইলৈকে সেনাবাহিনীৰ ভাইচ চিফ আৰু ২০২৩ চনৰ মাৰ্চৰ পৰা ২০২৪ চনৰ জুনলৈকে কেন্দ্ৰীয় কমাণ্ডৰ জেনেৰেল অফিচাৰ কমাণ্ডিং ইন চিফ হিচাপে কাৰ্যনিৰ্বাহ কৰিছিল।
সুব্ৰমনি ৰাষ্ট্ৰীয় প্ৰতিৰক্ষা একাডেমী আৰু ভাৰতীয় সামৰিক একাডেমীৰ প্ৰাক্তন ছাত্ৰ। ১৯৮৫ চনৰ ১৪ ডিচেম্বৰত গড়ৱাল ৰাইফলছৰ ৮ম বেটেলিয়নত নিযুক্তি লাভ কৰা তেওঁ ব্ৰিটেইনৰ জইণ্ট চাৰ্ভিচেছ কমাণ্ড এণ্ড ষ্টাফ কলেজ আৰু নতুন দিল্লীৰ নেচনেল ডিফেন্স কলেজৰো প্ৰাক্তন ছাত্ৰ। লণ্ডনৰ কিংছ কলেজৰ পৰা স্নাতকোত্তৰ ডিগ্ৰী আৰু মাদ্ৰাজ বিশ্ববিদ্যালয়ৰ পৰা প্ৰতিৰক্ষা গৱেষণাত এম.ফিল. ডিগ্ৰী লাভ কৰে।
চাৰি দশকৰো অধিক সময়ৰ কেৰিয়াৰত লেফটেনেণ্ট জেনেৰেল এন. ৰাজা সুব্ৰমণিয়ে বিভিন্ন কনফ্লিক্ট জোন আৰু বিভিন্ন ভূখণ্ডত সেৱা আগবঢ়াই কমাণ্ড, ষ্টাফ আৰু প্ৰশিক্ষণৰ বহু গুৰুত্বপূৰ্ণ পদবীত অধিষ্ঠিত হৈ আহিছে।
অসমত ‘অপাৰেচন ৰাইনো’ৰ অধীনত সন্ত্ৰাসবাদ বিৰোধী অভিযানৰ সময়ত তেওঁ ১৬ নং গড়োৱাল ৰাইফলৰ নেতৃত্ব দিছিল। তেওঁ অতি প্ৰত্যাহ্বানমূলক আৰু জটিল পৰিস্থিতিত জম্মু আৰু কাশ্মীৰত ১৬৮ ইনফেণ্ট্ৰি ব্ৰিগেড আৰু কেন্দ্ৰীয় খণ্ডত ১৭ মাউণ্টেন ডিভিজনৰ নেতৃত্ব দিছিল। সেইদৰে তেওঁ পশ্চিম অঞ্চলত ভাৰতীয় সেনাবাহিনীৰ মূল আক্ৰমণাত্মক বাহিনী বা ‘ষ্ট্ৰাইক কৰ্পছ’ ২ কৰ্পছৰ নেতৃত্বও দিছিল।
