আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ সৈতে চুক্তিত উপনীত হোৱা বুলি দাবী কৰাৰ বিপৰীতে তেওঁৰ সেনাই তেহৰাণত আক্ৰমণ চলাই আছে। শেহতীয়া পৰিস্থিতিত আমেৰিকাই এই সপ্তাহৰ শেষৰ ফালে ইৰাণৰ ড্ৰ’ন কমাণ্ড বেছত আক্ৰমণ কৰা বুলি দাবী কৰিছে।
দেওবাৰে আমেৰিকাই কয় যে এই সপ্তাহৰ শেষৰ ফালে ইৰাণৰ গোৰুক আৰু কেছম দ্বীপত ইৰাণৰ ৰাডাৰ আৰু ড্ৰ’ন নিয়ন্ত্ৰণ স্থানত তেওঁলোকে আত্মৰক্ষামূলক আক্ৰমণ চলাইছে। আমেৰিকাই ইয়াক তেহৰাণৰ আগ্ৰাসী কাৰ্য্যৰ প্ৰতিক্ৰিয়া বুলি অভিহিত কৰে।
আমেৰিকাৰ চেণ্ট্ৰেল কমাণ্ডে এক্সত এটা পোষ্টত কয় যে ইৰাণে আন্তঃৰাষ্ট্ৰীয় জলসীমাৰ ওপৰেৰে উৰি থকা আমেৰিকাৰ এম কিউ-১ ড্ৰ’ন এখন গুলীয়াই ভূপতিত কৰিছে।
চেণ্ট্ৰেল কমাণ্ডে জনোৱা মতে, আমেৰিকাৰ যুদ্ধ বিমানে প্ৰতিশোধ লয়, ইৰাণৰ বায়ু সুৰক্ষা ব্যৱস্থা, এটা স্থল নিয়ন্ত্ৰণ ষ্টেচন আৰু দুখন একমুখী আক্ৰমণৰ ড্ৰোন ধ্বংস কৰে। লগতে উল্লেখ কৰা হৈছে যে কোনো আমেৰিকাৰ সামৰিক জোৱানৰ ক্ষতি হোৱা নাই।
ইফালে ইৰাণৰ ইছলামিক ৰিভল্যুচনেৰী গাৰ্ড কৰ্পছে সোমবাৰে কয় যে তেওঁলোকৰ এৰোস্পেচ ফৰ্চে ছিৰিক দ্বীপৰ টেলিকম টাৱাৰত আমেৰিকাৰ আক্ৰমণত ব্যৱহাৰ কৰা বুলি ধাৰণা কৰা এয়াৰবেছক লক্ষ্য কৰি লৈছে। অৱশ্যে বিমানঘাটিটোৰ স্থান সন্দৰ্ভত কোনো তথ্য প্ৰদান কৰা হোৱা নাই।
যোৱা সপ্তাহত দুয়োখন দেশৰ মাজত প্ৰতিশোধমূলক আক্ৰমণৰো আদান-প্ৰদান হৈছিল। ৱাশ্বিংটনৰ এজন বিষয়াই জনোৱা মতে, হৰমুজ প্ৰণালীৰ সমীপত ইৰাণৰ ড্ৰ’ন অভিযানক লক্ষ্য কৰি আমেৰিকাৰ সেনাই আক্ৰমণ চলাইছিল। ইয়াৰ পিছত ইৰাণে আমেৰিকাৰ বিমান ঘাটি এটাক লক্ষ্য কৰি লয়।
ৱাশ্বিংটন আৰু তেহৰাণৰ মাজত চলি থকা উত্তেজনাৰ মাজতে এই ঘটনা সংঘটিত হৈছে। আমেৰিকাৰ প্ৰতিৰক্ষা সচিব পিট হেগছেথে সকীয়াই দিছে যে যদিহে ভৱিষ্যতে আমেৰিকাৰ কোনো চুক্তিয়ে আমেৰিকাৰ চৰ্ত পূৰণ কৰিব নোৱাৰে তেন্তে সামৰিক ব্যৱস্থা পুনৰ আৰম্ভ হ’ব পাৰে। তেওঁ কয় যে আমেৰিকাৰ বাহিনীসমূহ অধিক পদক্ষেপৰ বাবে সম্পূৰ্ণৰূপে সাজু।
ইফালে ৰাষ্ট্ৰপতি ড’নাল্ড ট্ৰাম্পে ইৰাণৰ সৈতে হোৱা প্ৰস্তাৱিত চুক্তিখন অধিক সংশোধনৰ বাবে ঘূৰাই পঠিয়াইছে বুলি জানিব পৰা গৈছে। এক্সিওছৰ মতে, শুকুৰবাৰে এখন বৈঠকৰ সময়ত ট্ৰাম্পে কেইবাটাও পৰিৱৰ্তনৰ বাবে অনুৰোধ জনাইছিল আৰু তাৰ পিছত তেওঁ অধিক সংশোধনীৰ দাবী জনাইছে। চুক্তিখন চূড়ান্ত কৰিবলৈ তেওঁৰ কোনো খৰখেদা নাই বুলিও তেওঁ উল্লেখ কৰিছে।
