বিয়াৰ পাছত এখন সুখৰ সংসাৰৰ সপোন দেখিছিল এগৰাকী যুৱতীয়ে, কিন্তু সেই সপোন অচিৰেই এক ভয়ংকৰ দুঃস্বপ্নলৈ পৰিণত হ’ল। উত্তৰাখণ্ডৰ ডেৰাডুনত সংঘটিত হৈছে এক শিহৰণকাৰী ঘটনা, য’ত এগৰাকী বোৱাৰীক প্ৰায় ১০ মাহ ধৰি এটা আৱদ্ধ কোঠা আৰু শৌচালয়ত বন্দী কৰি ৰাখি অকথ্য নিৰ্যাতন চলোৱাৰ গুৰুতৰ অভিযোগ উত্থাপন হৈছে স্বামী আৰু শহুৰেকৰ পৰিয়ালৰ বিৰুদ্ধে।
অভিযোগ অনুসৰি, দিনৰ পাছত দিন ধৰি তেওঁক কেৱল কেঁচা চাউল, পিঁয়াজ আৰু জলকীয়া খাবলৈ দিয়াৰ লগতে তেওঁৰ গুপ্তাংগতো পাশৱিক অত্যাচাৰ চলোৱা হৈছিল। এই জঘন্য ঘটনা পোহৰলৈ অহাৰ পাছতে স্বামী ৰাহুল খাণ্ডুৰী আৰু তেওঁৰ পিতৃ-মাতৃৰ বিৰুদ্ধে আৰক্ষীৰ কাষ চাপিছে ভুক্তভোগীৰ পৰিয়াল।
নিৰ্যাতিতা যুৱতীগৰাকীৰ পিতৃয়ে জানিবলৈ দিয়া মতে, প্ৰায় দুবছৰ পূৰ্বে ৰাহুল খাণ্ডুৰীৰ সৈতে তেওঁৰ কন্যাৰ বিবাহ সম্পন্ন হৈছিল। যোৱা ফেব্ৰুৱাৰী মাহত যুৱতীগৰাকীয়ে যমজ সন্তান জন্ম দিছিল যদিও, গৰ্ভৱতী অৱস্থাৰ পৰাই তেওঁৰ ওপৰত অমানুষিক নিৰ্যাতন আৰম্ভ হৈছিল। বিগত বৰ্ষৰ জুলাই মাহৰ পৰাই যুৱতীগৰাকীক এটা আৱদ্ধ কোঠা আৰু শৌচালয়ৰ ভিতৰত বন্দী কৰি ৰখা হৈছিল। কৰ্মসূত্ৰে দিল্লীত থকা স্বামীয়ে বন্ধৰ দিনত ঘৰলৈ আহিলে পত্নীৰ ওপৰত অবৰ্ণনীয় শাৰীৰিক নিৰ্যাতন চলাইছিল। ইয়াৰ উপৰিও, শহুৰ আৰু শাহুৱেও নিয়মীয়াকৈ তেওঁক মাৰপিট কৰিছিল বুলি অভিযোগ উত্থাপন হৈছে।
পিতৃৰ অভিযোগ অনুসৰি, জীয়াই থকাৰ স্বাৰ্থত নিৰ্যাতিতাক কেৱল কেঁচা চাউল, পিঁয়াজ আৰু কেঁচা জলকীয়া খাবলৈ বাধ্য কৰোৱা হৈছিল। এই দীৰ্ঘদিনীয়া অত্যাচাৰে তেওঁৰ মানসিক আৰু শাৰীৰিক অৱস্থাৰ ওপৰত গুৰুতৰ প্ৰভাৱ পেলাইছে। বৃদ্ধ পিতৃয়ে অতি দুখেৰে প্ৰকাশ কৰা মতে, নলাৰ পাইপ, লোহাৰ ৰড, চকী আৰু ঘৰ মচা সামগ্ৰীৰে কন্যাক নিৰ্দয়ভাৱে প্ৰহাৰ কৰা হৈছিল। আনকি বটল আৰু লাঠীৰে গুপ্তাংগত আঘাত সানি পাশৱিকতাৰ চৰম সীমা অতিক্ৰম কৰিছিল স্বামীগৃহৰ লোকে। নিৰ্যাতনৰ মাত্ৰা ইমানেই ভয়ংকৰ আছিল যে যুৱতীগৰাকীৰ মূৰৰ চুলি জোৰকৈ উভালি পেলোৱাৰ ফলত মূৰৰ একাংশ প্ৰায় তপা হৈ পৰিছে। শাৰীৰিক নিৰ্যাতনৰ সমান্তৰালভাৱে তেওঁক প্ৰতিদিনে হত্যাৰ ভাবুকিও প্ৰদান কৰা হৈছিল।
ইমান দিনে এই ভয়ংকৰ নিৰ্যাতনৰ খবৰ পৰিয়ালে কিয় লাভ কৰা নাছিল, সেই সন্দৰ্ভত পিতৃয়ে স্পষ্ট কৰি কয় যে যোৱা ১০ মাহ ধৰি যুৱতীগৰাকীক নিজৰ পিতৃ-মাতৃৰ সৈতে কোনো ধৰণৰ যোগাযোগ কৰিবলৈ দিয়া হোৱা নাছিল। টেলিফোনিক বাৰ্তালাপতো দূৰৰ কথা, মাক-দেউতাকক তেওঁৰ সৈতে সাক্ষাৎ কৰিবলৈকো দিয়া হোৱা নাছিল। আনকি নৱজাতক যমজ নাতি-নাতিনীহঁতকো চাবলৈ দিয়া হোৱা নাছিল। খবৰ ল‘বলৈ গ‘লে শহুৰেকৰ পৰিয়ালৰ লোকে ‘তাই শুই আছে‘ বা ‘গা ধুই আছে‘ বুলি অজুহাত দেখুৱাই তেওঁলোকক ঘূৰাই পঠিয়াইছিল।
প্ৰাপ্ত তথ্য অনুসৰি, প্ৰতিদিনে পুৱা ৯-১০ বজাৰ পৰাই তেওঁক এটা কোঠা বা শৌচালয়ৰ ভিতৰত তলাবন্ধ কৰি ৰখা হৈছিল। এগৰাকী মানুহৰ প্ৰাপ্য ন্যূনতম মানৱিক অধিকাৰ আৰু মৰ্যাদাকণৰ পৰাও তেওঁক বঞ্চিত কৰা হৈছিল। পিতৃৰ এই গুৰুতৰ অভিযোগৰ ভিত্তিত চেলাকুই আৰক্ষী থানাত এখন এজাহাৰ দাখিল কৰা হৈছে। বৰ্তমান আৰক্ষীয়ে সমগ্ৰ ঘটনাৰ এক ক্ষিপ্ৰ আৰু সুক্ষ্ম তদন্ত অব্যাহত ৰাখিছে।
