বিশ্ববিখ্যাত আত্মজীৱনীমূলক গ্ৰাফিক নভেল পাৰ্চিপলিচৰ স্ৰষ্টা, প্ৰখ্যাত ফৰাচী-ইৰাণী লেখিকা তথা চিত্ৰশিল্পী মাৰ্জান চাট্ৰাপীৰ দেহাৱসান ঘটিছে। ফ্ৰান্সৰ পেৰিচত ৫৬ বছৰ বয়সত তেওঁ শেষ নিশ্বাস ত্যাগ কৰে। চাট্ৰাপীৰ পৰিয়াল আৰু ঘনিষ্ঠ বন্ধুসকলে তেওঁৰ মৃত্যুৰ খবৰ নিশ্চিত কৰিছে।
তেওঁৰ আত্মীয়সকলে জনোৱা মতে, প্ৰিয় স্বামী মেটিয়াচ ৰিপাৰ মৃত্যুৰ মাত্ৰ এবছৰৰ পাছতে সেই গভীৰ শোক সহ্য কৰিব নোৱাৰি মাৰ্জান চাট্ৰাপীয়ে ইহলীলা সম্বৰণ কৰিলে।
উল্লেখ্য যে প্ৰযোজক, অভিনেতা তথা চিত্ৰনাট্যকাৰ মেটিয়াচ ৰিপাৰ ২০২৫ চনৰ ৮ এপ্ৰিলত মৃত্যু হৈছিল।
তেওঁৰ কালজয়ী সৃষ্টি পাৰ্চিপলিচ পৰৱৰ্তী সময়ত এনিমেটেড চলচ্চিত্ৰ হিচাপেও সমগ্ৰ বিশ্বতে বহুলভাৱে সমাদৃত হয়। ২০০৭ চনত কান চলচ্চিত্ৰ উৎসৱত এই ছবিখনৰ প্ৰদৰ্শন হোৱাৰ উপৰি ই অস্কাৰৰ বাবেও মনোনীত হৈছিল। ১৯৬৯ চনৰ ২২ নৱেম্বৰত ইৰাণৰ ৰশদ চহৰত জন্মগ্ৰহণ কৰা চাট্ৰাপী আছিল নিজ দেশৰ ৰক্ষণশীল শাসন ব্যৱস্থাৰ এগৰাকী তীব্ৰ সমালোচক। পাৰ্চিপলিচ গ্ৰাফিক নভেলখনৰ জৰিয়তে তেওঁ বিশ্বজুৰি ব্যাপক খ্যাতি লাভ কৰিছিল। এই কিতাপখনত ১৯৭৯ চনৰ ইছলামী বিপ্লৱৰ পৰৱৰ্তী সময়ত তেহৰানত তেওঁৰ শৈশৱৰ সংগ্ৰাম আৰু তৎকালীন কঠোৰ বাধা-নিষেধৰ মাজত ডাঙৰ-দীঘল হোৱাৰ ছবিখন ফুটি উঠিছে। জীৱনৰ এটা সময়ত তেওঁৰ পিতৃ-মাতৃয়ে তেওঁক নিৰ্বাসিত জীৱন যাপন কৰিবলৈ ইউৰোপলৈ পঠিয়াই দিছিল।
পৰৱৰ্তী সময়ত ভিনচেণ্ট পাৰোনদৰ সৈতে যুটীয়াভাৱে চাট্ৰাপীয়ে তেওঁৰ এই গ্ৰাফিক নভেলখনক এনিমেটেড চলচ্চিত্ৰৰ ৰূপ দিয়ে। ২০০৭ চনৰ কান চলচ্চিত্ৰ উৎসৱত চাইলেন্ট লাইট চিনেমাখনৰ সৈতে যুটীয়াভাৱে ই জুৰী বঁটা লাভ কৰে। ইয়াৰ পিছত ৮০ সংখ্যক একাডেমী এৱাৰ্ডছ চমুকৈ অস্কাৰত শ্ৰেষ্ঠ আন্তঃৰাষ্ট্ৰীয় কাহিনীচিত্ৰ আৰু শ্ৰেষ্ঠ এনিমেটেড ফিচাৰ ফিল্ম শিতানত ছবিখনে মনোনয়ন লাভ কৰে। ইয়াৰ জৰিয়তে অস্কাৰৰ শ্ৰেষ্ঠ এনিমেটেড ফিচাৰ ফিল্ম শিতানত মনোনীত হোৱা প্ৰথমগৰাকী মহিলা হিচাপে গৌৰৱ অৰ্জন কৰে মাৰ্জান চাট্ৰাপীয়ে।
চাট্ৰাপীৰ অন্যান্য উল্লেখযোগ্য কামৰ ভিতৰত আছে তেওঁৰ গ্ৰাফিক নভেল চিকেন উইথ প্লামচ, যাৰ চলচ্চিত্ৰ সংস্কৰণও তেওঁ পাৰোনদৰ সৈতে পৰিচালনা কৰিছিল। ইয়াৰ উপৰি ৰায়ান ৰেনল্ডচ অভিনীত কমেডী-হৰৰ ছবি দ্য ভয়েচেচ আৰু দুবাৰকৈ নোবেল বঁটা বিজয়ী মেৰী কুৰীৰ জীৱনৰ আধাৰত ২০১৯ চনত নিৰ্মিত বায়োপিক ৰেডিঅ’এক্টিভ তেওঁৰ সৃজনশীলতাৰ অন্যতম সুন্দৰ নিদৰ্শন আছিল।
২০২৪ চনত প্ৰকাশ পোৱা ওমেন, লাইফ, ফ্ৰীডম আছিল তেওঁৰ সৰ্বশেষ কাম। ইয়াৰ দুবছৰ পূৰ্বে ইৰাণৰ মাহচা আমিনীৰ মৃত্যুক কেন্দ্ৰ কৰি গঢ়ি cutoff উঠা প্ৰতিবাদৰ তেওঁ এগৰাকী ডাঙৰ সমৰ্থক আছিল। সেই সময়ত তেওঁ মন্তব্য কৰিছিল যে ওমেন, লাইফ, ফ্ৰীডম আন্দোলনটো আচলতে এটা সাংস্কৃতিক বিপ্লৱ আছিল। ১৯৯৪ চনত চাট্ৰাপী ফ্ৰান্সলৈ গুচি যায় আৰু ২০০৬ চনত দেশখনৰ নাগৰিকত্ব লাভ কৰে।
