শুকুৰবাৰে উচ্চতম ন্যায়ালয়ে পাকিস্তানক দেশৰ গোপন তথ্য যোগান ধৰাৰ অভিযোগত গ্ৰেপ্তাৰ হোৱা হাৰিয়ানাৰ ভ্ৰমণ ব্লগাৰ জ্যোতি মলহোত্ৰাৰ জামিন আবেদন নাকচ কৰে। ন্যায়াধীশ দীপংকৰ দত্ত আৰু ন্যায়াধীশ এছ. চি. শৰ্মাৰ বিচাৰপীঠে এই অভিযোগসমূহ অতি গুৰুতৰ বুলি উল্লেখ কৰিছে। ৰাষ্ট্ৰীয় নিৰাপত্তাৰ প্ৰতি লক্ষ্য ৰাখি উচ্চতম ন্যায়ালয়ে যোৱা ৭ মাৰ্চত পঞ্জাৱ আৰু হাৰিয়ানা উচ্চ ন্যায়ালয়ে দিয়া জামিন নাকচৰ নিৰ্দেশ বাহাল ৰাখে।
জ্যোতি মলহোত্ৰাৰ অধিবক্তাই আদালতত যুক্তি দৰ্শাইছিল যে যোৱা বছৰৰ ১৬ মে’ৰ পৰা তেওঁ জিম্মাত আছে আৰু তেওঁৰ কোনো পূৰ্বৰ অপৰাধমূলক ৰেকৰ্ড নাই। কিন্তু বিচাৰপীঠে কয় যে এই কথাবোৰ কেৱল আত্মপক্ষ সমৰ্থনৰ বাবেহে আৰু বিচাৰ প্ৰক্ৰিয়াৰ সময়ত এইবোৰ পৰীক্ষা কৰা হ’ব। তেওঁ পাকিস্তানলৈ গৈ তাত চৰকাৰী বিষয়াসকলক লগ কৰাৰ অভিযোগৰ প্ৰতি লক্ষ্য ৰাখি বিচাৰপীঠে তেওঁক জামিন প্ৰদানৰ কোনো কাৰণ নাই বুলি স্পষ্ট কৰি দিয়ে।
হাৰিয়ানাৰ হিচাৰৰ বাসিন্দা জ্যোতি মলহোত্ৰাই ট্ৰেভেল-উইথ-জো নামৰ এটা ইউটিউব চেনেল চলাইছিল। তেওঁৰ বিৰুদ্ধে পাকিস্তানৰ চোৰাংচোৱাক ভাৰতৰ গোপন আৰু স্পৰ্শকাতৰ তথ্য দিয়াৰ গুৰুতৰ অভিযোগ আছে। হাৰিয়ানা আৰক্ষীয়ে তেওঁৰ বিৰুদ্ধে চৰকাৰী গোপনীয়তা আইন আৰু ভাৰতীয় ন্যায় সংহিতাৰ ১৫২ ধাৰাৰ অধীনত গোচৰ ৰুজু কৰিছে। এই ধাৰাটোৱে দেশৰ সাৰ্বভৌমত্ব আৰু অখণ্ডতাৰ প্ৰতি ভাবুকি কঢ়িয়াই অনা কাৰ্য্যৰ বিচাৰ কৰে।
হাৰিয়ানা আৰক্ষীৰ মতে, পাকিস্তানৰ চোৰাংচোৱা সংস্থাই এই ব্লগাৰগৰাকীক নিজৰ স্বাৰ্থত ব্যৱহাৰ কৰিবলৈ চেষ্টা কৰিছিল। ২০২৩ চনৰ নৱেম্বৰ মাহৰ পৰাই তেওঁ পাকিস্তান উচ্চায়ুক্তৰ কৰ্মচাৰী এহছান-উৰ-ৰহিম ওৰফে ডানিছৰ সৈতে নিয়মীয়াকৈ যোগাযোগ ৰাখিছিল। উল্লেখযোগ্য যে যোৱা ২০২৫ চনৰ ১৪ মে’ত বৈদেশিক পৰিক্ৰমা মন্ত্ৰালয়ে ডানিছক ভাৰতৰ পৰা বহিষ্কাৰ কৰিছিল। আৰক্ষীয়ে লগতে অভিযোগ কৰিছে যে জ্যোতিয়ে পাকিস্তানৰ চোৰাংচোৱাৰ সৈতে যোগাযোগ কৰিবলৈ বিভিন্ন ছচিয়েল মিডিয়া ব্যৱহাৰ কৰিছিল আৰু পাছত সেই বাৰ্তালাপসমূহ ডিলিট কৰি দিছিল। তদুপৰি তেওঁ দেশৰ কেইবাটাও গুৰুত্বপূৰ্ণ নিৰাপত্তা প্ৰতিষ্ঠানৰ ভিডিঅ’ পাকিস্তানলৈ প্ৰেৰণ কৰিছিল।
ইয়াৰ পূৰ্বে পঞ্জাৱ আৰু হাৰিয়ানা উচ্চ ন্যায়ালয়েও তেওঁৰ জামিন নাকচ কৰিছিল। উচ্চ ন্যায়ালয়ে প্ৰকাশ কৰিছিল যে প্ৰাথমিক অনুসন্ধানত জ্যোতিৰ বিৰুদ্ধে যথেষ্ট প্ৰমাণ পোৱা গৈছে। অভিযোগৰ গুৰুত্ব আৰু তেওঁৰ এনে দেশবিৰোধী কাৰ্যকলাপৰ প্ৰতি লক্ষ্য ৰাখি আদালতে তেওঁক কোনো কাৰণতে জামিনত মুকলি কৰি দিব নোৱাৰি বুলি ৰায় দিছিল।
