তেওঁ চিৰদিনৰ বাবে এভাৰেষ্টৰ কোলাত শুই পৰিল বুলি সকলোৱে ধৰি লৈছিল। পৰ্বতাৰোহণ কৰিবলৈ গৈ পাঁচ দিন ধৰি সন্ধানহীন হৈ থকাৰ পাছত পৰিয়ালৰ লোকে তেওঁৰ অন্ত্যেষ্টিক্ৰিয়াৰ আয়োজনো আৰম্ভ কৰি দিছিল। কিন্তু সমগ্ৰ বিশ্ববাসীক আচৰিত কৰি বৃহস্পতিবাৰে এভাৰেষ্টৰ ‘ডেথ জ’ন’ অৰ্থাৎ মৃত্যু উপত্যকাৰ পৰা ৫২ বছৰীয়া হিলাৰী দাৱা শ্বেৰ্পাক জীৱিত অৱস্থাত উদ্ধাৰ কৰা হয়। এভাৰেষ্ট প্ৰদূষণ নিয়ন্ত্ৰণ সমিতিৰ এক কৰ্মীৰ দলে তেওঁক উদ্ধাৰ কৰি নেপালৰ কাঠমাণ্ডুলৈ লৈ আহে। যোৱা ৩০ মে’ৰ পৰা তেওঁ সন্ধানহীন হৈ আছিল। অভিজ্ঞ শ্বেৰ্পাজনৰ উদ্ধাৰৰ খবৰে এতিয়া বিশ্বৰ পৰ্বতাৰোহীসকলৰ মাজত ব্যাপক চাঞ্চল্যৰ সৃষ্টি কৰিছে। জানিব পৰা মতে, হিলাৰী দাৱা শ্বেৰ্পা বৰ্তমান ‘ফ্ৰষ্টবাইট’ত আক্ৰান্ত হৈ কাঠমাণ্ডুৰ এইচ এ এম এছ চিকিৎসালয়ত চিকিৎসাধীন হৈ আছে।
এই ঘটনাই এতিয়া সকলোকে আচৰিত কৰি তুলিছে। খাদ্য আৰু অতিৰিক্ত অক্সিজেনৰ অবিহনে প্ৰচণ্ড তুষাৰপাতৰ মাজত অকলশৰে হিলাৰী দাৱা শ্বেৰ্পাই কেনেকৈ নিজৰ প্ৰাণ ৰক্ষা কৰিলে, সেয়া এতিয়া চৰ্চাৰ বিষয় হৈ পৰিছে। ৮ হাজাৰ মিটাৰ উচ্চতাত অৱস্থিত যিটো ডেথ জ’নত কেইবাশ পৰ্বতাৰোহী চিৰনিদ্ৰাত শুই আছে, তাৰ পৰা তেওঁ চুঁচৰি চুঁচৰি বেছ কেম্পলৈ নামি অহাৰ এক প্ৰাণপন যুঁজ দিছিল। এভাৰেষ্ট প্ৰদূষণ নিয়ন্ত্ৰণ সমিতিৰ এজন সদস্যই এভাৰেষ্ট বেছ কেম্পৰ ওচৰৰ ক্ৰাম্পন পইণ্টত সন্ধানহীন শ্বেৰ্পাজনক বিচাৰি পায়। তাৰ পাছত সমিতিৰ কৰ্মীসকলে তেওঁক ক্ৰাম্পন পইণ্টৰ পৰা গোৰকশ্বেপলৈ লৈ যায় আৰু তাৰ পৰা হেলিকপ্টাৰেৰে কাঠমাণ্ডুলৈ প্ৰেৰণ কৰে।
নেপালৰ সংবাদ মাধ্যমৰ সূত্ৰে জানিব পৰা মতে, ২৯ হাজাৰ ৩২ ফুট ওখ এভাৰেষ্টৰ চূড়ান্ত শৃংগত উপনীত হোৱাত ব্যৰ্থ হৈ পোলেণ্ডৰ এজন পৰ্বতাৰোহীৰ সৈতে উভতি অহাৰ সময়তে কেম্প-৩ আৰু কেম্প-৪ ৰ মাজত দাৱা শ্বেৰ্পা সন্ধানহীন হয়। যোৱা ২৯ মে’ত প্ৰায় চাৰে সাত হাজাৰ মিটাৰ উচ্চতাত তেওঁক শেষবাৰৰ বাবে দেখা গৈছিল। পৰ্বতাৰোহীজন বেছ কেম্পলৈ ঘূৰি আহিছিল যদিও দাৱা ঘূৰি অহা নাছিল। দুয়ো কেনেকৈ ইজনে সিজনৰ পৰা বিচ্ছিন্ন হ’ল সেয়া এতিয়াও স্পষ্ট হোৱা নাই। ইফালে, পাঁচ দিন ধৰি সন্ধানহীন হৈ থকাৰ পাছত হিলাৰী দাৱা শ্বেৰ্পাৰ পৰিয়ালে কাঠমাণ্ডুত তেওঁৰ অন্ত্যেষ্টিক্ৰিয়াৰ কাম আৰম্ভ কৰি দিছিল, কিয়নো তেওঁ জীৱন্তে ঘূৰি অহাৰ আশা একেবাৰে ক্ষীণ আছিল।
হিলাৰী দাৱা শ্বেৰ্পাৰ কন্যা মেণ্ডো লামু শ্বেৰ্পাই সংবাদ মাধ্যমৰ আগত প্ৰকাশ কৰা অনুসৰি বৃহস্পতিবাৰে অন্ত্যেষ্টিক্ৰিয়াৰ দ্বিতীয় দিন চলি আছিল। যেতিয়া উদ্ধাৰৰ খবৰ আহে, তেতিয়া তেওঁলোকে সেইজন সঁচাকৈয়ে তেওঁৰ পিতৃ হয় নে নহয় সেয়া বিশ্বাস কৰিব পৰা নাছিল। সেয়েহে নিশ্চিত হ’বলৈ তেওঁলোকে উদ্ধাৰকাৰী দলটোক এখন ফটো পঠিয়াবলৈ অনুৰোধ কৰে আৰু ফটোখন পোৱাৰ পাছতহে তেওঁলোক নিশ্চিত হয়। জানিব পৰা মতে, মে’ মাহত এহাজাৰতকৈও অধিক পৰ্বতাৰোহী আৰু গাইডে এভাৰেষ্ট অভিযান কৰিছে আৰু এই ছিজনত পাঁচজন লোকৰ মৃত্যু হৈছে। মাত্ৰ দুসপ্তাহ পূৰ্বে হায়দৰাবাদৰ অৰুণকুমাৰ তিৱাৰী নামৰ এজন পৰ্বতাৰোহীৰো এভাৰেষ্ট জয় কৰি উভতি অহাৰ পথত মৃত্যু হৈছিল।
