গুজৰাটৰ চুৰাটত এক অতি শোকাৱহ দুৰ্ঘটনা সংঘটিত হৈছে। এখন কাৰখানাৰ চেপটিক টেংক চাফা কৰিবলৈ নামি বিষাক্ত গেছৰ কবলত পৰি চাৰিজন শ্ৰমিকৰ মৃত্যু হৈছে। এই মৰ্মান্তিক ঘটনাৰ খবৰ বিয়পি পৰাৰ লগে লগে সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে। খবৰ পোৱাৰ পিছতেই আৰক্ষী ঘটনাস্থলীত উপস্থিত হয় আৰু মৃতদেহকেইটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। আৰক্ষীয়ে ইতিমধ্যে সমগ্ৰ ঘটনাটোৰ তদন্ত আৰম্ভ কৰিছে।
চুৰাট আৰক্ষীৰ উপ-আয়ুক্ত অলোক কুমাৰে জানিবলৈ দিয়া মতে, এই ঘটনাটো চুৰাটৰ অশ্বিনী কুমাৰ এলেকাত থকা এখন কাৰখানাত সংঘটিত হৈছে। সেই চেপটিক টেংকটোত গহনা পৰিষ্কাৰ কৰাৰ পিছত ওলোৱা আৱৰ্জনা জমা কৰি ৰখা হৈছিল আৰু প্ৰতি দুমাহৰ মূৰে মূৰে টেংকটো চাফা কৰা হৈছিল। দেওবাৰে টেংকটো পৰিষ্কাৰ কৰিবলৈ চাৰিজন শ্ৰমিক ভিতৰলৈ সোমাইছিল। আৰক্ষীয়ে অনুমান কৰিছে যে ভিতৰত থকা বিষাক্ত গেছৰ প্ৰভাৱত উশাহ ল’ব নোৱাৰি তেওঁলোকৰ মৃত্যু হয়। মৰণোত্তৰ পৰীক্ষাৰ প্ৰতিবেদন অহাৰ পিছতহে মৃত্যুৰ প্ৰকৃত কাৰণ স্পষ্ট হ’ব। প্ৰাথমিক তদন্তৰ পৰা আৰক্ষীয়ে ধাৰণা কৰিছে যে কাৰখানা কৰ্তৃপক্ষই শ্ৰমিকসকলৰ সুৰক্ষাৰ বাবে কোনো ধৰণৰ উচিত নিৰাপত্তাবিধি পালন কৰা নাছিল।
আৰক্ষী বিষয়াগৰাকীয়ে লগতে জনায় যে দুৰ্ঘটনাটোৰ পিছত কাৰখানাটোৰ ছুপাৰভাইজাৰজনে অগ্নিনিৰ্বাপক বাহিনীক খবৰ দিয়ে। যিসকল শ্ৰমিকক টেংকৰ ভিতৰলৈ নমোৱা হৈছিল, তেওঁলোকৰ লগত কোনো ধৰণৰ সুৰক্ষাৰ সঁজুলি নাছিল। খবৰ পোৱাৰ লগে লগে অগ্নিনিৰ্বাপক বাহিনীৰ লোকসকল ঘটনাস্থলীত উপস্থিত হয়। তেওঁলোকে চাৰিওজন শ্ৰমিকক উদ্ধাৰ কৰি ততাতৈয়াকৈ চিকিৎসালয়লৈ লৈ যায় যদিও চিকিৎসকে তেওঁলোকক মৃত বুলি ঘোষণা কৰে।
আৰক্ষীৰ তৰফৰ পৰা জনোৱা হৈছে যে এই ঘটনাত এটা অপঘাতজনিত মৃত্যুৰ গোচৰ ৰুজু কৰি তদন্ত প্ৰক্ৰিয়া আগবঢ়াই নিয়া হৈছে। টেংকত সোমোৱাৰ আগতে শ্ৰমিকসকলে কি কি নিৰাপত্তাৰ নিয়ম মানি চলিছিল আৰু কৰ্তৃপক্ষৰ ক‘ত অৱহেলা আছিল, সেই কথা জানিবলৈ কাৰখানাটোৰ চিচিটিভি কেমেৰাৰ ফুটেজসমূহ পৰীক্ষা কৰি থকা হৈছে। আৰক্ষীয়ে লগতে স্পষ্ট কৰি দিছে যে এই ঘটনাত দোষী সাব্যস্ত হোৱা লোকসকলৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।
