মধ্যপ্ৰদেশৰ পাণ্ডুৰ্ণা জিলাত এক ভয়ংকৰ ঘটনা পোহৰলৈ আহিছে। অংগনৱাড়ী কেন্দ্ৰৰ পৰা যোগান ধৰা খাদ্যৰ পেকেটত উদ্ধাৰ হৈছে এডাল মৰা সাপ। আটাইতকৈ ভয়ংকৰ কথাটো হ‘ল যে এই বিষাক্ত পেকেটটো এগৰাকী গৰ্ভৱতী মহিলাক খাবলৈ দিয়া হৈছিল। অৱশ্যে সৌভাগ্যক্ৰমে মহিলাগৰাকীয়ে এই খাদ্য নোখোৱাৰ ফলত এক ডাঙৰ বিপদৰ পৰা ৰক্ষা পৰে। কিন্তু এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।
জানিব পৰা মতে, কাৰঘাট কামথি গাঁৱৰ নিবাসী এই মহিলাগৰাকীক অংগনৱাড়ীৰ তৰফৰ পৰা পুষ্টিকৰ লাডু থকা এটা পেকেট দিয়া হৈছিল। মহিলাগৰাকীয়ে পেকেটটো ঘৰলৈ আনি যেতিয়া খুলি চায়, তেতিয়া তেওঁৰ চকু কপালত উঠে। পেকেটটোৰ ভিতৰত লাডুৰ লগতে আছিল এডাল মৰা সাপৰ পোৱালি। এই কথা গাঁৱত বিয়পি পৰাৰ লগে লগে হুলস্থুলীয়া পৰিৱেশৰ সৃষ্টি হয়। গৰ্ভৱতী মহিলা আৰু শিশুসকলক যোগান ধৰা খাদ্যৰ মানদণ্ড আৰু নিৰাপত্তাক লৈ স্থানীয় ৰাইজে প্ৰশ্ন উত্থাপন কৰে। লগে লগে অংগনৱাড়ী কৰ্মী আৰু স্থানীয় প্ৰশাসনক খবৰ দিয়া হয় আৰু বিষয়াসকল ততাতৈয়াকৈ ঘটনাস্থলীত উপস্থিত হয়।
বৰ্তমান প্ৰশাসনে সাপ ওলোৱা খাদ্যৰ পেকেটটো জব্দ কৰি পৰীক্ষাৰ বাবে পৰীক্ষাগাৰলৈ প্ৰেৰণ কৰিছে। লগতে অন্য খাদ্যৰ নমুনাও সংগ্ৰহ কৰা হৈছে। অংগনৱাড়ীৰ দৰে স্পৰ্শকাতৰ স্থানৰ পৰা যোগান ধৰা খাদ্যত কেনেকৈ সাপ সোমাল, তাক লৈ ৰাইজৰ মাজত প্ৰশ্ন উঠিছে। সমগ্ৰ ঘটনাটোৰ উচিত তদন্তৰ বাবে ইতিমধ্যে পাঁচজনীয়া সদস্যৰ এখন সমিতি গঠন কৰি দিয়া হৈছে। বিষয়াসকলে জানিবলৈ দিয়া মতে, পৰীক্ষাগাৰৰ ৰিপৰ্ট আৰু তদন্ত সমিতিৰ প্ৰতিবেদন অহাৰ পাছতেই এই সন্দৰ্ভত পৰৱৰ্তী কঠোৰ পদক্ষেপ গ্ৰহণ কৰা হ’ব।
