ভাৰতীয় ক্ৰিকেট নিয়ন্ত্ৰণ বৰ্ডে আগন্তুক দুবছৰৰ বাবে নতুন টি-২০ দল ঘোষণা কৰিছে। কিন্তু এই দলটোৱে ৰজত পাটীদাৰৰ দৰে এজন সুদক্ষ খেলুৱৈৰ বাবে ৰাষ্ট্ৰীয় দলৰ দুৱাৰ একেবাৰেই বন্ধ কৰি দিলে বুলি ক‘ব পাৰি। ক্ৰমাগতভাৱে দুবাৰকৈ আই পি এলৰ খিতাপ জয় কৰাৰ পাছতো তেওঁ ভাৰতৰ হৈ টি-২০ আন্তঃৰাষ্ট্ৰীয় মেচ খেলাৰ সুযোগ নাপালে। এই খবৰটো তেওঁৰ অনুৰাগীসকলৰ বাবে সঁচাকৈয়ে অতি নিৰাশাজনক।
বৰ্তমান ৰজত পাটীদাৰৰ বয়স ৩৩ বছৰ। সাধাৰণতে যিকোনো প্ৰতিষ্ঠান বা কৰ্পোৰেট খণ্ডই বয়সস্থ ব্যক্তিতকৈ কম বয়সীয়া আৰু নতুন প্ৰতিভাক বেছি গুৰুত্ব দিয়ে। ক্ৰিকেটৰ ক্ষেত্ৰতো একেই কথা প্ৰযোজ্য হৈছে। বিচিচিআইয়ে আগন্তুক সময়ৰ বাবে কম বয়সীয়া খেলুৱৈৰ ওপৰত বেছি গুৰুত্ব দিছে। উদাহৰণস্বৰূপে ১৫ বছৰীয়া বৈভৱ সূৰ্যবংশীৰ দৰে উদীয়মান খেলুৱৈয়ে দলত স্থান পাইছে। যাৰ ফলত ৰজতৰ দৰে অভিজ্ঞ আৰু পৰিপক্ব খেলুৱৈসকলে নিজৰ প্ৰাপ্য স্থানৰ পৰা বঞ্চিত হ‘বলগীয়া হৈছে। ভাৰতত ক্ৰিকেটৰ প্ৰতিভা ইমানেই বেছি যে ইয়াত ৰাষ্ট্ৰীয় দলত স্থান পোৱাটো অতি কঠিন হৈ পৰিছে। বিশ্বমানৰ প্ৰতিভা থকাৰ পাছতো কেৱল মাত্ৰ বয়সৰ বাবেই বহু খেলুৱৈয়ে সুযোগ নাপায়।
এই আটাইবোৰ নিৰাশাৰ পাছতো ৰজত পাটীদাৰৰ প্ৰতিক্ৰিয়া আছিল অতি শান্ত। আৰ চি বিৰ এটা ভিডিঅ‘ত তেওঁ স্পষ্টকৈ কৈছিল যে তেওঁ ৰাষ্ট্ৰীয় দলত নিৰ্বাচিত হোৱাক লৈ কোনো ধৰণৰ চিন্তা নকৰে। তেওঁ কেৱল নিজৰ খেলত মনোযোগ দিয়ে। যদি নিৰ্বাচকসকলে তেওঁক বিচাৰে তেন্তে তেওঁ খেলিব, নহ’লে নাই। এই কথাবোৰে প্ৰমাণ কৰে যে তেওঁ কিমান আত্মবিশ্বাসী আৰু মানসিকভাবে শক্তিশালী। তেওঁ জানে যে নিৰ্বাচন প্ৰক্ৰিয়াটো তেওঁৰ হাতত নাই, সেয়েহে তেওঁ এইবোৰক লৈ হতাশ নহয় আৰু কেৱল নিজৰ প্ৰদৰ্শনৰ ওপৰত গুৰুত্ব দিয়ে।
বিগত দুটা ছিজনত ৰজত পাটীদাৰে নিজৰ দুৰ্দান্ত প্ৰদৰ্শন দাঙি ধৰিছে। ২০২৬ চনৰ আই পি এলত তেওঁ ১৪ টা ইনিংছত ১৯২.৬৯ ষ্ট্ৰাইক ৰেটেৰে ৫০১ ৰান সংগ্ৰহ কৰিছিল। পেচ আৰু স্পিন দুয়োটা বলিঙৰ বিৰুদ্ধেই তেওঁ সমানে আক্ৰমণাত্মক আছিল। আনকি ফৰ্মত নথকাৰ বাবে টি-২০ বিশ্বকাপ জয়ী অধিনায়ক সূৰ্যকুমাৰ যাদৱকো দলৰ পৰা বাদ দিয়া হৈছে আৰু তেওঁৰ ঠাইত শ্ৰেয়াস আয়াৰক নতুন অধিনায়কৰ দায়িত্ব দিয়া হৈছে। শ্ৰেয়াছৰ দল পঞ্জাৱ কিংছৰ প্ৰদৰ্শন সিমান ভাল নাছিল, আনহাতে ৰজতে আৰ চি বিৰ দৰে দলক নেতৃত্ব দি একেৰাহে দুবাৰকৈ চেম্পিয়ন কৰিছিল, তথাপিও তেওঁক আওকাণ কৰা হ’ল।
প্ৰাক্তন ক্ৰিকেটাৰ সুনীল গাভাস্কাৰে এই সন্দৰ্ভত কয় যে অধিনায়কত্বৰ বাবে শ্ৰেয়াছ আৰু ৰজতৰ মাজত তীব্ৰ প্ৰতিদ্বন্দ্বিতা আছিল। কিন্তু বিভিন্ন ফ্ৰেঞ্চাইজিত নেতৃত্ব দিয়াৰ অভিজ্ঞতা থকাৰ বাবেই হয়তো শ্ৰেয়াসক বাছনি কৰা হ‘ল। মুখ্য নিৰ্বাচক অজিত আগৰকাৰেও কয় যে এটা দলত মাত্ৰ ১৫ জন খেলুৱৈহে থাকিব পাৰে, সেয়েহে বহুত ভাল খেলুৱৈয়ো বাদ পৰিবলগীয়া হয়। ৰজত পাটীদাৰে হয়তো কেতিয়াও ভাৰতৰ হৈ টি-২০ নেখেলিব পাৰে, কিন্তু তেওঁ যি অৰ্জন কৰিছে সেয়া সঁচাকৈয়ে বিৰল। আৰ চি বিৰ দৰে দলক একেৰাহে দুবাৰকৈ আই পি এলৰ খিতাপ জিকাই তেওঁ লাখ লাখ অনুৰাগীৰ হৃদয় জয় কৰিছে আৰু তেওঁক এতিয়া কোনো আন্তঃৰাষ্ট্ৰীয় স্বীকৃতিৰ প্ৰয়োজন নাই।
