দেশৰ ৰাজধানী দিল্লীৰ নিউ ফ্ৰেণ্ডছ কলনী নামৰ অভিজাত এলেকাৰ পৰা এক অতি দুখলগা খবৰ পোহৰলৈ আহিছে। দেওবাৰে দুপৰীয়া অঞ্চলটোৰ এটা আৱাসিক বাসগৃহত সংঘটিত হোৱা এক ভয়ংকৰ অগ্নিকাণ্ডত দুটাকৈ কুকুৰ পোৱালিৰ মৃত্যু হয়। এই ঘটনাৰ পিছতে সমগ্ৰ এলেকাটোতে হাহাকাৰ ময় পৰিৱেশৰ সৃষ্টি হয়। দুপৰীয়া প্ৰায় ৩:৪০ বজাত অগ্নিনিৰ্বাপক বাহিনীয়ে এই ঘটনাৰ খবৰ লাভ কৰে আৰু লগে লগে উদ্ধাৰকাৰী দল ঘটনাস্থলীত উপস্থিত হয়। অগ্নিনিৰ্বাপক বাহিনীৰ লোকসকলে তৎপৰতাৰে ঘৰটোৰ ভিতৰত আৱদ্ধ হৈ থকা আঠজন লোকক নিৰাপদে বাহিৰলৈ উলিয়াই আনে।
ফায়াৰ ষ্টেচন অফিচাৰ ফুল সিং মীনাই এই ঘটনাৰ বিষয়ে জানিবলৈ দি কয় যে তেওঁলোকে বিয়লি ৩:৩৮ বজাত ঘৰটোত জুই লগাৰ খবৰ পাইছিল। অগ্নিনিৰ্বাপক বাহিনীৰ গাড়ী ঘটনাস্থলীত উপস্থিত হোৱাৰ সময়ত সমগ্ৰ তিনিমহলীয়া ঘৰটো বিষাক্ত আৰু ডাঠ ধোঁৱাৰে ভৰি পৰিছিল। ভিতৰত আৱদ্ধ হৈ থকা লোকসকলে খিৰিকীৰে প্ৰাণ ৰক্ষাৰ বাবে কাতৰ আহ্বান জনাই আছিল। পৰিস্থিতিৰ ভয়াৱহতাৰ প্ৰতি লক্ষ্য ৰাখি অগ্নিনিৰ্বাপক বাহিনীৰ লোকসকলে লগে লগে জখলাৰ সহায়ত এক অতি বিপদজনক উদ্ধাৰ অভিযান আৰম্ভ কৰে।
দলটোৱে অতি বুদ্ধিমতাৰে কাম কৰি চাৰিটি শিশু আৰু চাৰিজন প্ৰাপ্তবয়স্ককে ধৰি মুঠ আঠজন লোকক জখলাৰ সহায়ত নিৰাপদে উদ্ধাৰ কৰে। ধোঁৱাৰ বাবে উদ্ধাৰ হোৱা লোকসকলৰ অৱস্থা শোচনীয় হৈ পৰিছিল যদিও তেওঁলোকৰ প্ৰাণ ৰক্ষা পৰে। কিন্তু অতি দুখৰ বিষয় যে ঘৰটোৰ ভিতৰত থকা দুটা নিৰীহ কুকুৰ পোৱালিৰ ধোঁৱাৰ ফলত উশাহ বন্ধ হৈ থিতাতে মৃত্যু হয়।
ফায়াৰ অফিচাৰ মীনাই জনোৱা মতে, প্ৰাথমিক তদন্তত পোহৰলৈ আহিছে যে জুইৰ সূত্ৰপাত আপাৰ গ্ৰাউণ্ড ফ্ল’ৰত থকা এটা এয়াৰ কণ্ডিচনাৰ বা এচিৰ পৰা হৈছিল। ছৰ্ট চাৰ্কিট বা অত্যাধিক গৰম হোৱাৰ বাবে এচিটোত বিস্ফোৰণ হোৱা বুলি সন্দেহ কৰা হৈছে, যিয়ে কেইমিনিটমানৰ ভিতৰতে ভয়ংকৰ ৰূপ ধাৰণ কৰে আৰু সমগ্ৰ কোঠাটোৰ ঘৰুৱা আচবাবসমূহ জুইৰ লেলিহান শিখাত জাহ যায়।
জুই নুমুৱাবলৈ আৰু মানুহৰ প্ৰাণ বচাবলৈ ফায়াৰ ষ্টেচনৰ পৰা মুঠ চাৰিখন অগ্নিনিৰ্বাপক গাড়ী নিয়োগ কৰা হৈছিল। অগ্নিনিৰ্বাপক বাহিনীৰ কঠোৰ পৰিশ্ৰমৰ অন্তত জুই সম্পূৰ্ণৰূপে নিয়ন্ত্ৰণলৈ আনিবলৈ সক্ষম হয়। বৰ্তমান ঘৰটো ঠাণ্ডা কৰাৰ প্ৰক্ৰিয়া সম্পূৰ্ণ কৰা হৈছে আৰু আৰক্ষী তথা অগ্নিনিৰ্বাপক বাহিনীয়ে এই দুৰ্ঘটনাৰ সঠিক কাৰণ সন্দৰ্ভত বিতং তদন্ত চলাই আছে। এই শোকাবহ ঘটনাৰ পিছত ভুক্তভোগী পৰিয়াল আৰু ওচৰ-চুবুৰীয়া গভীৰ শোক আৰু আতংকত ভুগিছে।
