‘হিন্দু-মুছলমানৰ সংঘাত হলেহে দুখীয়াৰ ভোট পায়। দুখীয়াৰ ভোট লাভৰ বাবে বিভিন্ন ৰাজনৈতিক দলে সুতা কম্বল, আঠুৱা, লেট্ৰিন দিয়াৰ লগতে হিন্দু মুছলমানৰ মাজত সংঘাত লগাই ৭০ বছৰে সৰ্বসাধাৰণ লোকক লুট পাট চলাই আহিছে ৷’ এই মন্তব্য কৃষক নেতা অখিল গগৈৰ।
আজি বৰপেটা চহৰৰ পৌৰসভাৰ খেলপথাৰত দিনৰ ১ বজাৰ পৰা অনুষ্ঠিত বিশাল গণ সমাবেশত অংশ গ্ৰহণ কৰি গগৈয়ে কয় যে কংগ্ৰেছ, বিজেপি, অগপ আৰু এ আই ইউ ডি এফ দলে অসমৰ জাতীয় সমস্যা সমাধানতকৈ ভোট বেংক বৃদ্ধি কৰাতহে গুৰুত্ব প্ৰদান কৰিছে ৷
ভোট বেংক বৃদ্ধি কৰাৰ স্বাৰ্থতে অসমক ধ্বংস কৰিব বিচৰা নাগৰিকত্ব সংশোধনী বিধেয়কখন আইনত ৰূপায়ন কৰাৰ বাবে বিজেপি-আৰ এছ এছে উঠি পৰি লগা বুলি মন্তব্য কৰি অখিল গগৈয়ে কয় যে অসমত এজনো বাংলাদেশীক ৰখাৰ ব্যৱস্থা কৰিলে মুখ্য মন্ত্ৰী সৰ্বানন্দ সোণোৱালক অসমত থাকিবলৈ দিয়া নহ’ব।
কৃষক মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদ আৰু ছাত্ৰ মুক্তি সংগ্ৰাম সমিতিৰ উদ্যোগত আজিৰ এই গণ সমাবেশখন অনুষ্ঠিত কৰা হৈছিল।
ৰাজ্যত ২৮ শতাংশ ভূমিহীন আৰু ৩২ শতাংশ একেবাৰে কম মাটি থকা লোক আছে বুলি উল্লেখ কৰি তেওঁ কয় যে ৰাজ্যৰ ৬০ শতাংশ লোকৰ পৰ্যাপ্ত মাটি নাই যদিও এইসকল খিলঞ্জীয়া ভূমিহীনক ভূমি দিয়াৰ বাবে কেন্দ্ৰ আৰু ৰাজ্য চৰকাৰে কোনো ব্যৱস্থা গ্ৰহণ কৰা নাই ৷
অসমৰ ভূমিহীন লোকক ভূমি দিব নোৱাৰা কেন্দ্ৰ আৰু ৰাজ্য চৰকাৰে বিদেশীক নাগৰিকত্ব প্ৰদানৰ জৰিয়তে ভূমি দিয়াৰ বাবে উঠি পৰি লগাতো অসমীয়া জাতিৰ বাবে ভয়ংকৰ ক্ষতি বুলিও কয় অখিল গগৈয়ে ৷
সভাপতি মণ্ডলীৰ সদস্য নিৰঞ্জন ৰয়, মাধৱ দাস আৰু ৰফিকুল ইছলামৰ পৰিচালনাত অনুষ্ঠিত আৰু তিনি সহস্ৰাধিক লোকে অংশ গ্ৰহণ কৰা এই গণ সমাবেশখনত অসম জাতীয়তাবাদী যুৱ ছাত্ৰ পৰিষদৰ মুখ্য উপদেষ্টা জ্যোতিৰ্ময় কলিতাইও ভাষন প্ৰদান কৰে।
