নিউজ ১৮ অসমত সম্প্ৰচাৰিত হোৱা এক বিশেষ বাতৰি অনুসৰি, অসম ৰাজ্যিক বিদ্যালয় শিক্ষা পৰিষদৰ অন্তৰ্গত একাংশ ছাত্ৰ-ছাত্ৰী এতিয়া চৰম বিপদত পৰিছে। দ্বাদশ শ্ৰেণীৰ পাঠ্যক্ৰমত নতুনকৈ সংযোজন কৰা সাধাৰণ অধ্যয়ন বিষয়টো লৈ শিক্ষাৰ্থীসকল হাহাকাৰ কৰিবলগীয়া অৱস্থাত পৰিছে। কিয়নো পাঠদান আৰম্ভ হোৱাৰ তিনি মাহ পাৰ হৈ যোৱাৰ পিছতো ছাত্ৰ-ছাত্ৰীসকলে এই নতুন বিষয়টোৰ কিতাপ হাতত পোৱা নাই। শিক্ষা পৰিষদৰ অধ্যক্ষৰ নেতৃত্বত এনে অৰাজক পৰিস্থিতিৰ সৃষ্টি হোৱা বুলি অভিযোগ উঠিছে।
বাতৰিটোত প্ৰকাশ পোৱা অনুসৰি, সাধাৰণ অধ্যয়ন বিষয়টোৰ কেৱল ইংৰাজী মাধ্যমৰ কিতাপহে বৰ্তমান উপলব্ধ হৈছে। যাৰ ফলত অসমীয়া, বড়ো আৰু বঙালী মাধ্যমৰ শিক্ষাৰ্থীসকল বিমোৰত পৰিছে। দুহেজাৰ ছাব্বিশ বৰ্ষৰ পৰা এই বিষয়টো বাধ্যতামূলক কৰা হৈছে আৰু ইয়াত উত্তীৰ্ণ হোৱাটো অতি প্ৰয়োজনীয়। পূৰ্বৰ ছটা বিষয়ৰ সলনি এতিয়া ছাত্ৰ-ছাত্ৰীসকলে সাতটা বিষয় পঢ়িবলগীয়া হৈছে। কিন্তু পৰীক্ষা কাষ চাপি অহাৰ সময়তো কিতাপ নোপোৱাত ছাত্ৰ-ছাত্ৰীসকল দিশহাৰা হৈ পৰিছে।
যোৱা এপ্ৰিল মাহৰ পৰা বিদ্যালয়সমূহত পাঠদান আৰম্ভ হৈছিল আৰু অহা দুহেজাৰ ছাতাইশ বৰ্ষৰ ফেব্ৰুৱাৰী মাহত উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত হ‘ব। নিউজ ১৮ অসমৰ এই প্ৰতিবেদনত উল্লেখ কৰা হৈছে যে পৰিষদৰ অধ্যক্ষ ৰমেশ চন্দ্ৰ জৈনে অসমীয়া আৰু ইংৰাজী কিতাপ উপলব্ধ হোৱা বুলি দাবী কৰিলেও প্ৰকৃততে ৰাজ্যৰ সকলো বিদ্যালয়ে এতিয়াও কিতাপ পোৱা নাই। আনহাতে বড়ো আৰু বঙালী মাধ্যমৰ কিতাপ এতিয়াও ছপা হৈ ওলোৱাই নাই। এই গুৰুতৰ বিষয়টোৰ সন্দৰ্ভত জানিবলৈ সংবাদ মাধ্যমৰ তৰফৰ পৰা অধ্যক্ষগৰাকীক সাক্ষাৎ কৰিবলৈ চেষ্টা কৰা হৈছিল যদিও তেওঁ সমগ্ৰ বিষয়টো ৰহস্যজনকভাৱে এৰাই চলিছে। কিতাপ যোগান ধৰাত কিয় ইমান পলম হৈছে তাক লৈ এতিয়া সৰ্বত্ৰে প্ৰতিক্ৰিয়াৰ সৃষ্টি হৈছে আৰু শিক্ষাৰ্থীসকলৰ ভৱিষ্যতক লৈ ডাঙৰ প্ৰশ্নবোধক চিনৰ সৃষ্টি হৈছে।
