কংগ্ৰেছ নেত্ৰী ছোনিয়া গান্ধীয়ে গাজাত চলি থকা ইজৰাইলৰ আক্ৰমণ আৰু এই ক্ষেত্ৰত মোদী চৰকাৰৰ নীৰৱতাক লৈ তীব্ৰ সমালোচনা কৰিছে। তেওঁ কয় যে গাজাৰ ঘটনাক লৈ কেন্দ্ৰীয় চৰকাৰৰ এই নীৰৱতা কেৱল নৈতিকভাৱে ভুল নহয়, বৰঞ্চ ই দেশৰ স্বাৰ্থৰ পৰিপন্থী। কংগ্ৰেছৰ সংসদীয় দলৰ অধ্যক্ষা গৰাকীয়ে দাবী কৰে যে ভাৰতে পেলেষ্টাইন, ইৰাণ আৰু মধ্যপ্ৰাচ্যৰ দৰে ঐতিহাসিক মিত্ৰ দেশসমূহৰ পৰা নিজকে আঁতৰাই আনিছে। ইয়াৰ সুযোগ লৈ পাকিস্তানে এতিয়া মধ্যস্থতাকাৰীৰ ভূমিকা ল’বলৈ চেষ্টা কৰিছে বুলিও তেওঁ মন্তব্য কৰে।
দ্য ইণ্ডিয়ান এক্সপ্ৰেছ কাকতত প্ৰকাশিত এক প্ৰবন্ধত ছোনিয়া গান্ধীয়ে প্ৰধানমন্ত্ৰী নৰেন্দ্ৰ মোদীৰ শেহতীয়া ইজৰাইল ভ্ৰমণক এক বিভ্ৰান্তিকৰ কৌশলগত সিদ্ধান্ত বুলি অভিহিত কৰিছে। তেওঁ কয় যে পেলেষ্টাইনৰ নিৰীহ শিশুসকলক নিষ্ঠুৰভাৱে লক্ষ্য কৰি লোৱা হৈছে আৰু ভাৰতে ইয়াৰ বিৰুদ্ধে মাত মতা উচিত। গাজাত ইজৰাইলৰ কাৰ্যকলাপ আৰু পশ্চিম তীৰত পেলেষ্টাইনী পৰিয়ালসমূহক স্থানচ্যুত কৰাৰ বিৰুদ্ধে বিশ্বৰ জনমতৰ প্ৰতি ভাৰতে সঁহাৰি জনোৱা উচিত বুলি তেওঁ মত প্ৰকাশ কৰে।
গানধীয়ে কয় যে মোদী চৰকাৰৰ এই নীৰৱতাক কোনো কাৰণতে গ্ৰহণ কৰিব নোৱাৰি। ৰাষ্ট্ৰসংঘৰ এক আয়োগৰ প্ৰতিবেদনৰ কথা উল্লেখ কৰি তেওঁ কয় যে ইজৰাইলে গাজাত পেলেষ্টাইনীসকলক ধ্বংস কৰাৰ চেষ্টা কৰিছে। ভাৰতৰ বিশিষ্ট ন্যায়াধীশ এছ মুৰুলীধৰৰ নেতৃত্বত গঠিত এই আয়োগৰ প্ৰতিবেদন অনুসৰি গাজাত কমেও ২০ হাজাৰ শিশুৰ মৃত্যু হৈছে আৰু ৪৪ হাজাৰ শিশু আহত হৈছে। ইয়াৰ উপৰিও গাজাৰ ৯৭ শতাংশ বিদ্যালয় আৰু স্বাস্থ্য খণ্ড সম্পূৰ্ণৰূপে ধ্বংস হৈছে।
প্ৰবন্ধটোত তেওঁ লগতে কয় যে হামাছৰ আক্ৰমণ গ্ৰহণযোগ্য নহয়, কিন্তু তাৰ পাছত ইজৰাইলৰ সেনাই যি নিষ্ঠুৰতা দেখুৱাইছে সেয়া অমানৱীয়। আমেৰিকাৰ ডনাল্ড ট্ৰাম্প চৰকাৰৰ সমৰ্থনৰ বাবেই ইজৰাইলে এই আক্ৰমণ চলাই নিবলৈ সক্ষম হৈছে বুলি তেওঁ উল্লেখ কৰে। বিশ্বৰ বহু দেশ যেনে ফ্ৰান্স, ব্ৰিটেইন, কানাডা আৰু অষ্ট্ৰেলিয়াই পেলেষ্টাইনক স্বীকৃতি দিছে আৰু দক্ষিণ আফ্ৰিকাই ইজৰাইলৰ বিৰুদ্ধে আন্তঃৰাষ্ট্ৰীয় ন্যায়ালয়ৰ কাষ চাপিছে। কিন্তু ইমানৰ পাছতো ভাৰতে একো কোৱা নাই। ৫ বছৰীয়া শিশু হিন্দ ৰাজাবৰ কৰুণ মৃত্যুৰ কথাও তেওঁ উল্লেখ কৰে যাক ইজৰাইলৰ সেনাই নিষ্ঠুৰভাৱে হত্যা কৰিছিল।
শেষত ছোনিয়া গান্ধীয়ে কয় যে ভাৰতে নিজৰ নৈতিকতা আৰু কৌশলগত স্বাৰ্থ বিসৰ্জন দি কেৱল প্ৰধানমন্ত্ৰী মোদী আৰু নেতানিয়াহুৰ বন্ধুত্বক গুৰুত্ব দিছে। কংগ্ৰেছৰ সভাপতি মল্লিকাৰ্জুন খৰ্গে আৰু ৰাহুল গান্ধীয়েও এক্সত এই প্ৰবন্ধটো শ্বেয়াৰ কৰি ছোনিয়া গান্ধীৰ মতক সমৰ্থন জনাইছে। ৰাহুল গান্ধীয়ে কয় যে ভাৰতে নিজৰ স্বাধীন বৈদেশিক নীতি ঘূৰাই আনিব লাগে আৰু গাজাৰ মানৱীয় সংকটৰ সময়ত মাত মাতিব লাগে।
