ককৰোচ জনতা পাৰ্টী চমুকৈ চিজেপিৰ প্ৰতিষ্ঠাপক অভিজিৎ দিপকে শেহতীয়াকৈ কমেডিয়ান সময় ৰাইনাৰ জনপ্ৰিয় শ্ব’ ইণ্ডিয়াজ গট লেটেণ্টক লৈ অসন্তুষ্টি প্ৰকাশ কৰিছে। এক শেহতীয়া সাক্ষাৎকাৰত তেওঁ স্পষ্টকৈ কয় যে তেওঁ এই শ্ব’টো একেবাৰেই পচন্দ নকৰে আৰু কেতিয়াও ইয়াত অংশগ্ৰহণ নকৰে। দিপকে সময় ৰাইনাক প্ৰিভিলেজড বা বিশেষ সুবিধাপ্ৰাপ্ত বুলি অভিহিত কৰাৰ পিছতে ছ’চিয়েল মিডিয়াত এক ডাঙৰ বিতৰ্কৰ সূচনা হৈছে। আনফিল্টাৰ্ড বাই সমদিশ নামৰ অনুষ্ঠানটোত নিজৰ প্ৰিয় ষ্টেণ্ড-আপ কমেডিয়ানসকলৰ বিষয়ে আলোচনা কৰি থকাৰ সময়তে তেওঁক ইণ্ডিয়াজ গট লেটেণ্টত যোৱাৰ কথা সোধা হৈছিল আৰু তাৰ উত্তৰতে তেওঁ এই মন্তব্য কৰে।
সাক্ষাৎকাৰটোত দিপকে কয় যে তেওঁ ইণ্ডিয়াজ গট লেটেণ্টলৈ নাযায় কাৰণ তেওঁৰ ইয়াৰ চিন্তা-ধাৰা পচন্দ নহয়। তেওঁৰ মতে, যুদ্ধ নকৰি সহজ পথ বাচি লৈ ওলাই যোৱাৰ মানসিকতা কেৱল বিশেষ সুবিধাপ্ৰাপ্ত লোকৰহে থাকিব পাৰে। তেওঁৰ এই মন্তব্য ইন্টাৰনেটত ভাইৰেল হোৱাৰ লগে লগে নেটিজেনসকলে তেওঁক তীব্ৰ সমালোচনা কৰিবলৈ আৰম্ভ কৰে। বহু ব্যৱহাৰকাৰীয়ে প্ৰশ্ন উত্থাপন কৰিছে যে আমেৰিকাৰ বষ্টন বিশ্ববিদ্যালয়ত পাব্লিক ৰিলেচনছত স্নাতকোত্তৰ ডিগ্ৰী লাভ কৰা অভিজিৎ দিপকে নিজে কেনেকৈ আনক প্ৰিভিলেজড বুলি ক‘ব পাৰে। একাংশ লোকে তেওঁক বিদেশত আৰামদায়ক জীৱন কটাই ইয়াত আহি ভণ্ডামি কৰা বুলিও আক্ষেপ প্ৰকাশ কৰিছে।
উল্লেখ্য যে ইণ্ডিয়াজ গট লেটেণ্ট শ্ব’টো প্ৰথমবাৰৰ বাবে বিতৰ্কৰ মাজলৈ আহিছিল যেতিয়া ইউটিউবাৰ তথা পডকাষ্টাৰ ৰণবীৰ আল্লাহবাদিয়াই এজন প্ৰতিযোগীক এটা অত্যন্ত আপত্তিজনক আৰু অশালীণ প্ৰশ্ন সুধিছিল। এই ঘটনাক লৈ সমগ্ৰ দেশতে ক্ষোভৰ সৃষ্টি হৈছিল আৰু কেইবাখনো এজাহাৰো ৰুজু হৈছিল। ইয়াৰ পিছতে সময় ৰাইনাই শ্ব’টোৰ প্ৰথম ছিজনৰ সকলো খণ্ড ৰাজহুৱা প্লেটফৰ্মৰ পৰা আঁতৰাই পেলাইছিল। অৱশ্যে শ্ব’টোৰ দ্বিতীয়টো ছিজন ইউটিউব আৰু নেটফ্লিক্সত একেলগে মুক্তি দিয়া হৈছে। আলিয়া ভাট আৰু শাৰ্বৰী অতিথি হিচাপে উপস্থিত থকা এই নতুন ছিজনৰ প্ৰথমটো খণ্ডই ইউটিউবত ৪৫ মিলিয়নতকৈও অধিক ভিউজ লাভ কৰাৰ লগতে নেটফ্লিক্সৰ ট্ৰেণ্ডিঙতো শীৰ্ষস্থান দখল কৰিবলৈ সক্ষম হৈছে।
ইফালে ককৰোচ জনতা পাৰ্টী চমুকৈ চিজেপিৰ বিষয়ে ক’বলৈ গ’লে, ৰাজনৈতিক ৰণনীতিবিদ অভিজিৎ দিপকে এই ব্যংগাত্মক ৰাজনৈতিক আন্দোলনটোৰ সূচনা কৰিছিল। ভাৰতৰ মুখ্য ন্যায়াধীশ সূৰ্য কান্তে নিবনুৱা যুৱক-যুৱতী আৰু সক্ৰিয় কৰ্মীসকলক পঁইতাচোৰাৰ সৈতে তুলনা কৰাৰ পিছতে ইয়াৰ প্ৰতিবাদ স্বৰূপে এই দলটো গঠন কৰা হৈছিল। বৰ্তমান এই যুৱ নেতৃত্বাধীন গোটটোৱে নিবনুৱা সমস্যা, পৰীক্ষাৰ খেলিমেলি আৰু ৰাজহুৱা প্ৰতিষ্ঠানসমূহৰ জবাবদিহিতা আদি গুৰুত্বপূৰ্ণ বিষয়সমূহক লৈ কাম কৰি আছে।
