শেহতীয়া এক প্ৰতিবেদন অনুসৰি ২০২৫ চনত সমগ্ৰ বিশ্বত বৃদ্ধি পোৱা কাৰ্বন নিৰ্গমনৰ প্ৰায় এক তৃতীয়াংশ কেৱল আমেৰিকা যুক্তৰাষ্ট্ৰৰ পৰাই হৈছে। গেছৰ দাম বৃদ্ধি পোৱাৰ ফলত শক্তি উৎপাদনকাৰী কোম্পানীসমূহে পুনৰ কয়লাৰ ব্যৱহাৰ আৰম্ভ কৰাৰ বাবেই এই পৰিস্থিতিৰ সৃষ্টি হৈছে। যোৱা বছৰ আমেৰিকাত কয়লাৰ ব্যৱহাৰ দহ শতাংশ বৃদ্ধি পায়, যিয়ে পৰিৱেশ অনুকূল ইন্ধন ব্যৱহাৰৰ লক্ষ্যত বাধাৰ সৃষ্টি কৰি নিৰ্গমনৰ মাত্ৰা বৃদ্ধি কৰিছে।
এনাৰ্জি ইনষ্টিটিউট নামৰ সংস্থাটোৱে আন কেইটামান প্ৰতিষ্ঠানৰ লগ লাগি প্ৰস্তুত কৰা এই প্ৰতিবেদন অনুসৰি, শক্তি খণ্ডৰ পৰা হোৱা বিশ্বব্যাপী কাৰ্বন নিৰ্গমন এক দশমিক এক শতাংশ বৃদ্ধি পাই ৩৫,৮০৬ নিযুত মেট্ৰিক টন হৈছেগৈ। ইয়াৰ ভিতৰত আটাইতকৈ বেছি বৃদ্ধি পাইছে উত্তৰ আমেৰিকাত, যিয়ে যোৱা দহ বছৰৰ ধাৰাবাহিক নিৰ্গমন হ্ৰাসৰ ধাৰা সলনি কৰি পেলাইছে। আনহাতে, সমগ্ৰ বিশ্বতে শক্তিৰ চাহিদাও ক্ৰমান্বয়ে বৃদ্ধি পাইছে। যোৱা বছৰৰ তুলনাত মুঠ শক্তিৰ যোগান এক দশমিক সাত শতাংশ বৃদ্ধি পাইছে আৰু ইয়াৰ ভিতৰত নৱীকৰণযোগ্য শক্তিৰ ব্যৱহাৰৰ হাৰ আটাইতকৈ বেছি। বিশেষকৈ সৌৰ শক্তিৰ উৎপাদন ত্ৰিশ শতাংশলৈকে বৃদ্ধি পাইছে, যিয়ে মুঠ নৱীকৰণযোগ্য শক্তিৰ উৎপাদন ন দশমিক এক শতাংশলৈ বৃদ্ধি কৰিছে।
প্ৰতিবেদনখনত উল্লেখ কৰা অনুসৰি, যোগানতকৈ বৰ্তমান বিদ্যুতৰ চাহিদা অধিক দ্ৰুতগতিত বৃদ্ধি পাইছে। বৈদ্যুতিক বাহন, ডাটা চেণ্টাৰ আৰু কৃত্ৰিম বুদ্ধিমত্তাৰ বহুল ব্যৱহাৰৰ বাবে বিদ্যুতৰ চাহিদা বছৰি তিনি শতাংশ বৃদ্ধি পাইছে। ইয়াৰ লগতে ইউৰোপত কাৰ্বন নিৰ্গমন শূন্য দশমিক পাঁচ শতাংশ আৰু চীনত শূন্য দশমিক সাত শতাংশ বৃদ্ধি পৰিলক্ষিত হৈছে।
আনহাতে, ২০২৫ চনত বিশ্বব্যাপী খাৰুৱা তেলৰ ব্যৱহাৰ এক দশমিক তিনি শতাংশ বৃদ্ধি পাই প্ৰতিদিনে ১০৩ নিযুত বেৰেল হৈছেগৈ আৰু তেলৰ উৎপাদন তিনি দশমিক পাঁচ শতাংশ বৃদ্ধি পাইছে। অৱশ্যে চীনত যোৱা বছৰৰ দৰেই পেট্ৰল আৰু ডিজেলৰ ব্যৱহাৰ ক্ৰমাগতভাৱে হ্ৰাস পোৱা দেখা গৈছে। প্ৰাকৃতিক গেছৰ চাহিদা মূলতঃ ইউৰোপ, মধ্য প্ৰাচ্য আৰু উত্তৰ আমেৰিকাত বৃদ্ধি পাইছে। উল্লেখযোগ্য যে, ইউৰোপ আৰু ভাৰতে নিজৰ প্ৰয়োজনীয় গেছৰ প্ৰায় আধা অংশৰ বাবে কেৱল আমদানিৰ ওপৰতেই নিৰ্ভৰ কৰিবলগীয়া হৈছে।
